Jobo 33:1-33
33 “Bjale wena Jobo, hle ekwa mantšu a ka,O theetše dilo ka moka tšeo ke di bolelago.
2 Ntheetše hle!Ke swanetše go bolela.
3 Dilo tšeo ke di bolelago di tšwa pelong ya ka,Gomme molomo wa ka o bolela nnete yeo ke e tsebago.
4 Modimo o mpopile ka matla a gagwe,Modimo Ramatlaohle o nneile bophelo a diriša moya wa gagwe.
5 Nkarabe ge e ba o kgona,Ikemišetše go tlo ikemelela pele ga ka.
6 Ke no swana le wena pele ga Modimo wa nnete,Le nna ke bopilwe ka letsopa.
7 O se ke wa boifišwa ke nna,Gomme seo ke tlago go go botša sona se se ke sa go nyamiša.
8 Eupša wena o boletše ke theeditše,Ke be ke dula ke ekwa mantšu a gago ge o re:
9 ‘Ke sekile, gomme ga ke na molato,Ke hlwekile, gomme ga ke na phošo.
10 Eupša Modimo o na le mabaka a go nkganetša,O ntšea ke le lenaba la gagwe.
11 O tsenya dinao tša ka ka setokising,Go bjalo ka ge eka o lebelela dilo ka moka tšeo ke di dirago.’
12 Eupša seo o se bolelago ga se nnete, ke tlo go araba ka re:
Modimo ke yo mogolo kudu go feta motho wa nama le madi.
13 Ke ka baka la’ng o lla ka yena?
Na ke ka gobane ga se a go araba?
14 Modimo o bolela gantšhintšhi,Eupša ga go yo a mo theetšago.
15 O bolela le batho torong, ponong bošego,Ge ba ile ka boroko mepeteng ya bona.
16 O bula ditsebe tša bona,Gomme a dira gore ba kwe dilo tšeo a ba laelago tšona.
17 O thuša motho gore a tlogele go dira dilo tše mpe,Le go mo thuša gore a se ke a ba le boikgogomošo.
18 Modimo o mo šireleditše gore a se ke a theogela lebitleng,A mo šireletša le gore a se ke a bolawa ka sabola.
19 Go na le seo motho a ka ithutago sona ge a robetše mpeteng wa gagwe a ekwa bohloko,Le ge marapo a gagwe a duletše go opa.
20 Ka baka leo, o šišingwa dijoE bile o gana le dijo tše dibosebose.
21 O ota kudu,Gomme a šala ka marapo feela.
22 O kgauswi le go ya lebitleng,O batamela bao ba nyakago go mmolaya.
23 Ge e ba go barongwa ba 1 000 (sekete)Go kgethilwe morongwa* o teeGore a botše motho seo se lokilego,
24 Ke moka Modimo a kwela motho yoo bohloko gomme a re:‘O se ke wa mo lesa a theogela lebitleng,
Ke hweditše tsela ya go mo lopolla!
25 Gona anke nama ya gagwe e be e boletiana go feta ge e be e sa le moswa.Anke a boele a be le matla a go swana le a bosweng bja gagwe.’
26 O tla rapela Modimo gomme yena o tla mo amogela,E bile o tla thaba kudu ge a bona sefahlego sa Modimo,Ke moka Modimo o tla boela a mo lebelela e le motho yo a lokilego.
27 Motho yoo o tla botša batho a re:‘Ke dirile sebe, e bile ga se ka dira se se lokilego,Eupša ga se ka otlwa go ya ka melato ya ka.
28 O mphološitše gore ke se ke ka theogela lebitleng,Gomme ke tla tšwela pele ke phela.’
29 Ruri Modimo o dira dilo tše ka moka!O di direla motho gantšhintšhi.
30 O tla mo phološa gore a se ke a theogela lebitleng,E le gore a tle a ipshine ka bophelo.
31 Ntheetše gabotse wena Jobo!
Homola, gomme go bolele nna.
32 Ge e ba go na le seo o nyakago go se bolela, mpotše.
Bolela, ka gobane ke nyaka go go bontšha gore ga o na molato.
33 Ge e ba go se na seo o nyakago go se bolela, gona ntheetše.Homola, gomme nna ke tla go ruta bohlale.”
Mengwalo ya tlase
^ Phetolelo ya lentšu ka lentšu e re, “moromiwa.”
