“Mathomong Modimo o hlodile magodimo le lefase.”—Genesi 1:1.

SEO BEIBELE E SE BOLELAGO

Bjalo ka ge Genesi 1:1 e bolela, Modimo o hlodile legohle, go akaretša le lefase, kgalekgale, e lego “mathomong.” Thutamahlale ya mehleng yeno e dumelelana le taba ya gore legohle le na le mathomo. Tlhaloso ya morago bjale ya tša thutamahlale e šišinya gore legohle le na le nywaga e ka bago e dibilione tše 14.

Gape Beibele e hlalosa “matšatši” a tshelelago a tlholo. Lega go le bjalo, ga e bolele gore a e be e le matšatši a diiri tše 24. (Genesi 1:31) Ge e le gabotse, Beibele e diriša lentšu “letšatši” go šupa go dinako tša botelele bjo bo sa swanego. Ka mohlala, e bitša nako ka moka ya tlholo gore ke “[letšatši] leo ka lona Jehofa Modimo a dirilego legodimo le lefase.” (Genesi 2:4) Go bonagala “matšatši” a a tlholo a ile a tšea nywaga e dikete tše dintši.—Psalme 90:4.

LEBAKA LEO KA LONA GO TSEBA SEO GO LEGO BOHLOKWA

Dikgopolo tše di fošagetšego tša borathutatlholo di ka dira gore o hlokomologe Beibele ka mo go feletšego. Ka lehlakoreng le lengwe, ge e ba ruri Beibele e hupere pego e ka botwago mabapi le tlholo, gona o tla holwa ke bobolokelo bja yona bja “bohlale.”—Diema 3:21.

“Modimo . . . a re: ‘Anke lefase le tšweletše diphedi go ya ka mehuta ya tšona.’”—Genesi 1:24.

SEO BEIBELE E SE BOLELAGO

Modimo ga se a bopa dilo tše di phelago di le ka sebopego se bonolo gomme ka morago a di dumelela gore di fetogele dibopegong tše di raraganego kudu. Go e na le moo, o bopile “mehuta” ya motheo e raraganego ya dimela le diphoofolo, tšeo ka morago di ilego tša ikatiša “go ya ka mehuta ya tšona.” (Genesi 1:11, 21, 24) Mogato wo, woo o sa tšwelago pele le lehono, o feleleditše ka gore lefase le tlale ka “mehuta” e swanago ya dilo tšeo di phelago tšeo Modimo a di bopilego mathomong.—Psalme 89:11.

Beibele ga e bolele gore go ka ba le phapano e kaakang mohuteng o tee wa diphedi, le ge seo se ka bakwa ke ge diphoofolo tša mohuta woo di ka tswadišana gomme tša tlwaela go phela tikologong ya tšona. Le ge ba bangwe ba tšea go tlwaela tikologo mo go bjalo e le sebopego se itšego sa tlhagelelo, ga go na mohuta o mofsa wa dilo tšeo di phelago woo o bago gona. Nyakišišo ya mehleng yeno e thekga kgopolo ya gore magoro a motheo a dimela le diphoofolo a fetogile ganyenyane lebakeng la nako e telele kudu.

LEBAKA LEO KA LONA GO TSEBA SEO GO LEGO BOHLOKWA

Go nepagala ga Beibele ka tša thutamahlale tabeng ya go hlalosa “mehuta” ya motheo ya dilo tšeo di phelago go tiiša go botega ga yona dilong tše dingwe, go akaretša histori le boporofeta.

“Nna ka diatla tša ka ke phurolotše magodimo.”—Jesaya 45:12.

SEO BEIBELE E SE BOLELAGO

Modimo ke Mothopo wa matla ao a sa felego. (Jobo 37:23) Se se bohlokwa ka gobane borathutamahlale ba ithutile gore matla a ka kgona go fetošwa go ba selo. Beibele e re Modimo ka boyena ke Mothopo wa “matla a magolo” ao a tšweleditšego legohle. (Jesaya 40:26) Modimo o holofetša gore o tla diriša matla a gagwe bakeng sa go dira gore tlholo ya gagwe e dule e le gona, ka gobane ge Beibele e bolela ka letšatši, kgwedi le dinaledi, e re: “[Modimo] o dira gore di dule di le gona ka mo go sa felego.”—Psalme 148:3-6.

LEBAKA LEO KA LONA GO TSEBA SEO GO LEGO BOHLOKWA

Setsebi sa dinaledi e lego Allan Sandage se kile sa re: “Thutamahlale ga e kgone go araba dipotšišo tše di tseneletšego kudu. Ge o thoma go botšiša lebaka la go ba gona ga selo se itšego go e na le gore se se be gona, o ba ka kua ga thutamahlale.” Beibele ga e hlalose feela tlholo ka tsela yeo e dumelelanago le thutamahlale eupša e araba le dipotšišo tšeo thutamahlale e sa kgonego go di araba—tše bjalo ka e rego, Morero wa Modimo ka lefase le batho ke ofe? *