“Wena Mokwi wa thapelo, go wena go tla tla batho ba mehuta ka moka.”—Psalme 65:2.

SEO BATHO BA SE BOLELAGO

Go thwe dithapelo ga di fihle felo. Batho bao ba tlaišegago gantši ba ka belaela ge e ba Modimo a ekwa dithapelo tša bona.

SEO BEIBELE E SE BOLELAGO

Beibele e re: “Gobane mahlo a Jehofa [Modimo] a lebeletše baloki gomme ditsebe tša gagwe di kwa ditopo tša bona; eupša sefahlego sa Jehofa se lwa le bao ba dirago dilo tše mpe.” (1 Petro 3:12) Go molaleng gore Modimo o theetša dithapelo. Lega go le bjalo, o theetša kudu bao ba latelago melao ya gagwe. Ge lengwalo le lengwe le bontšha kamoo Modimo a ikemišeditšego go re theetša ge re mo rapela, le re: “Ye ke kgodišego ye re nago le yona ya gore go sa šetšwe seo re se kgopelago go ya ka thato ya Modimo, Modimo o a re kwa.” (1 Johane 5:14) Ka go re’alo, batho bao ba rapelago ka go tšwa pelong ba swanetše go tseba gore ke dithapelo tša mohuta mang tšeo di dumelelanago le thato ya Modimo.

“Ge o rapela, o se ke wa boaboetša dilo tše di swanago.”—Mateo 6:7.

SEO BATHO BA SE BOLELAGO

Ditho tša madumedi a fapafapanego—a bjalo ka Bobuddha, Bokatholika, Bohindu le Bomoseleme—di rutilwe go diriša dipheta ge di rapela le go bala dithapelo tša tšona.

SEO BEIBELE E SE BOLELAGO

Dithapelo di swanetše go tšwa pelong le go bolelwa ka moya ka moka; ga se tša swanela go swarwa ka hlogo le go boaboeletšwa. Mangwalo a re kgothaletša gore: “Ge o rapela, o se ke wa boaboetša dilo tše di swanago go etša ge batho ba ditšhaba ba dira, gobane ba akanya gore ba tla kwewa ka go diriša ga bona mantšu a mantši. Ka gona le se ke la itshwantšha le bona, gobane Modimo Tatago lena o tseba gore ke dilo dife tšeo le di nyakago le pele le mo kgopela.”—Mateo 6:7, 8.

LEBAKA LEO KA LONA GO LEGO BOHLOKWA

Ge e ba motho a rapela Modimo ka tsela yeo a sa e amogelego, a ka no ba a itshenyetša nako goba a kgopiša Modimo. Beibele e lemoša gore dithapelo tša bao ba ganago go phela ka go dumelelana le thato ya Modimo di a mo “šišimiša.”—Diema 28:9.

“Tsomang Jehofa [Modimo] a sa hwetšagala. Mmitšeng a sa le kgauswi.”—Jesaya 55:6.

SEO BATHO BA SE BOLELAGO

Badumedi ba bangwe ba rapela Maria goba medingwana, e bjalo ka barongwa le batho bao ba tšewago e le “bakgethwa.” Gare ga bona go na le “Mokgethwa” Anthony wa Padua, yo go thwego o hlokomela “dinyakwa tša moya le tša nakwana,” le “Mokgethwa” Jude, yo a hlaloswago e le mokgethwa yo a neago thušo “dinakong tše thata.” Barapedi ba bantši ba rapela “bakgethwa” ba bjalo le barongwa ka kholofelo ya gore medingwana ye e tla ba bolelela le Modimo.

SEO BEIBELE E SE BOLELAGO

Barapedi ba therešo ba swanetše go rapela “Tatago rena wa magodimong.” (Mateo 6:9) Beibele e re kgothaletša gore: “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga.”—Bafilipi 4:6.