Wena o rata dipapadi; molekane wa gago a ka upša a bala. O dira dilo ka šedi e bile o na le thulaganyo; molekane wa gago o tloga a se na thulaganyo. O rata go ba gare ga bagwera; molekane wa gago o rata go ba noši.

O ipotša gore, ‘Ga re swanelane le gatee! Ke ka baka la’ng re sa lemoga seo nakong ya lefereyo?’

Go ka direga gore o ile wa lemoga seo, eupša go fihla bokgoleng bjo itšego. Mohlomongwe ka nako yeo o be o fo amogela dilo, e lego bokgoni bjo o ka dirago gabotse ge o ka bo tsošološa gona bjale ge le nyalane. Sehlogo se se tla go thuša go dira seo. Lega go le bjalo, thoma ka go ela hloko ditherešo tše dingwe mabapi le seo go naganwago gore ke go se swanelane.

Go se swane mo gongwe ke bothata bjo bogolo. Karolo e kgolo ya nakong ya lefereyo ke go bona ge e ba le swanelana. Ka gona, ge batho ba bantši bao ba fereyanago ba lemoga gore ba tloga ba sa swane, ba a kgaogana go e na le go tsena ka bošilo lenyalong ba sa kwane. Eupša go thwe’ng ka go se swane mo go sa rego selo—mohuta wa go se swane mo go sa phemegego lenyalong le ge e le lefe?

Ga go na batho ba babedi bao ba swanago tlwaa. Ka gona, go tlwaelegile gore balekane ba fapane dikarolong tše di latelago:

Dilo tšeo ba di ratago. Mosadi yo a nyetšwego yo a bitšwago Anna * o re: “Ga sa nka ka kgahlegela dipapadi tša ka ntle, eupša monna wa ka o gotše a namela dithaba tšeo di apešitšwego ke lehlwa le go sepela dithokgweng ka matšatši a mantši.”

Mekgwa. Monna yo a nyetšego yo a bitšwago Brian o re: “Mosadi wa ka o kgona go robala bošego kudu gomme a tsoge ka iri ya bohlano mesong, eupša nna ke nyaka go robala diiri tše šupa go ya go tše seswai ka gobane go sego bjalo ke tlo felafela pelo.

Dika. O ka ba o se motho wa polelo mola molekane wa gago a kgona go bolela maikwelo a gagwe. Monna yo a nyetšego yo a bitšwago David o re: “Ke gotše ke sa bolele ka mathata a ka eupša ke nyetše mosadi yo a tšwago lapeng leo go bego go boledišanwa ka selo se sengwe le se sengwe.”

Go se swane go ka ba le mehola. Mosadi yo a nyetšwego yo a bitšwago Helena o re: “Tsela ya ka ya go dira dilo e ka ba e lokile, eupša seo ga se bolele gore ke yona e nnoši e lokilego.”

Nea thekgo. Monna yo a nyetšego yo a bitšwago Adam o re: “Mosadi wa ka Karen ga a na kgahlego le e nyenyane dipapading. Eupša o ile a ya le nna dipapading tše mmalwa gomme a ba a nthuša go reta dibapadi. Ka lehlakoreng le lengwe, Karen o rata dimusiamo tša bokgabo, ka gona ke ya le yena gomme ra fetša nako e ntši yeo a e nyakago re le moo. Ke leka ka gohle go bontšha kgahlego go tša bokgabo ka gobane di bohlokwa go yena.”—Molao wa motheo wa Beibele: 1 Bakorinthe 10:24.

Katološa tsela yeo o bonago dilo ka yona. Tsela yeo molekane wa gago a bonago dilo ka yona ga se gore e fošagetše ka ge e fapana le ya gago. Yeo ke thuto yeo monna yo a nyetšego yo a bitšwago Alex a ithutilego yona. O re: “Ka mehla ke be ke nagana gore go na le tsela e tee feela e šomago ya go dira selo se itšego le go nagana gore tsela le ge e le efe e nngwe yeo e kgethwago e ka se šome. Eupša go ba lenyalong go nthušitše go lemoga gore go na le ditsela tše dintši tša go dira selo se itšego le gore mokgwa o mongwe le o mongwe o šoma ka tsela ya wona.”—Molao wa motheo wa Beibele: 1 Petro 5:5.

Lebelela dilo ka tsela ya kgonthe. Go swanelana ga go bolele gore le swanetše le swane. Ka gona o se ke wa phetha ka gore o tsene lenyalong ka phošo feela ka gobane o bona dilo tše sego kae tšeo le sa swanego ka tšona. Puku ya The Case Against Divorce e re: “Batho ba bantši ba ikemelela ka gore, ‘Ke be ke foufaditšwe ke lerato.’” Lega go le bjalo, puku yeo e tšwela pele ka gore “letšatši le lengwe le le lengwe leo le le fetšago le le mmogo le thabile, le bontšha gore le sa dutše le ka ratana go sa šetšwe go se swane ga dimelo tša lena.” Lekang go ‘tšwela pele le kgotlelelana le ge e ba motho a na le lebaka la go ba le pelaelo ka yo mongwe.’—Bakolose 3:13.

Leka se: Ngwala dilo tšeo o di ratago le tšeo o hwetšago wena le molekane wa gago le swana ka tšona. Ka morago o ngwale tšeo o hwetšago le sa swane ka tšona. O ka hwetša gore dilo tšeo le sa swanego ka tšona ga se bothata gakaalo bjalo ka ge o nagana. Le gona lelokelelo leo le tla go utollela moo o ka kgotlelelago goba wa thekga molekane wa gago. Monna yo a nyetšego yo a bitšwago Kenneth o re: “Ke leboga kudu ge mosadi wa ka a sekamela dilong tšeo di nkgahlago, e bile ke a tseba gore le yena o a leboga ge ke sekamela go tšeo di mo kgahlago. Ke a thaba ge ke mmona a thabile, le ge seo se bolela gore ke gafe se sengwe se itšego.”—Molao wa motheo wa Beibele: Bafilipi 4:5.