Thekinolotši e ka Senya Lenyalo la Gago Bjang?
Ge thekinolotši e dirišwa gabotse e ka tiiša lenyalo. Ka mohlala, thekinolotši e ka thuša banyalani gore ba kgone go boledišana ge ba se mmogo. Seo se ka dira gore ba ikwe ba batamelane.
Eupša banyalani ba bangwe ba diriša thekinolotši gampe. Seo se ka baka mathata ao a latelago . . .
-
e ka ba amoga nako yeo ba bego ba swanetše go e fetša ba le mmogo.
-
e ka dira gore ba tšwele pele ba šoma le ge e se nako ya mošomo.
-
e ka dira gore ba utelane dilo le go se tshepane.
SEO O SWANETŠEGO GO SE TSEBA
GO FETŠA NAKO LE LE MMOGO
Monna yo a bitšwago Michael o re: “Ka dinako tše dingwe ge nna le mosadi wa ka re le gotee, ke ikwa okare ga a na taba le nna. O tla hwetša a kgomaretše founo ya gagwe e bile a re, ‘ke gona ke hwetša nako ya go araba melaetša.’” Monna yo a bitšwago Jonathan o re maemong a bjalo, “o ka hwetša balekane ba le lefelong le tee eupša ba ikwa ba le mafelong a go fapana.”
SEO O KA NAGANAGO KA SONA: Ke ga kae go araba founo goba melaetša go go šitiša ge o boledišana le molekane wa gago?—BAEFESO 5:33.
MOŠOMO
Mešomo ya batho ba bangwe e ba gapeletša gore ba dule ba swere founo mo ba lego gona. Eupša le batho ba bangwe bao mešomo ya bona e sa nyakego gore ba dule ba swere founo, ba ka fetša nako e ntši ba šoma le ge nako ya mošomo e fedile. Monna yo a bitšwago Lee o re: “Go thata go se arabe founo goba melaetša ya mošomo yeo e tsenago ge ke dutše le mosadi wa ka”. Mosadi yo a bitšwago Joy o re: “Ke šomela ka gae, ka gona go thata go tseba gore bjale gona ke nako ya go tšhaiša.”
SEO O KA NAGANAGO KA SONA: Na o theetša molekane wa gago ka kelohloko ge a bolela le wena?—LUKA 8:18.
GO TSHEPEGA
Batho ba bantši ba re ba ile ba ngangišana le balekane ba bona ka ge ba be ba belaela dilo tšeo molekane yo mongwe a di beago inthaneteng. Ba bangwe ba ile ba dumela gore ba fela ba phara dilo tše itšego inthaneteng tšeo ba sa nyakego balekane ba bona ba di tseba.
Batho ba bantši ba dumela gore dipoledišano tša inthaneteng di ka ba kotsi e bile di ka dira gore yo mongwe wa balekane a dire bootswa. Ga go makatše ge boramolao ba re dipoledišano tšeo di baka ditlhalo tše dintši.
SEO O KA NAGANAGO KA SONA: Na o utela molekane wa gago dipoledišano tšeo o bago le tšona le motho wa bong bjo bo fapanago?—DIEMA 4:23.
SEO O KA SE DIRAGO
BEAKANYA DILO TŠA BOHLOKWA PELE
Motho yo a sa nyakego go ja a ka ba le mathata a tša maphelo. Ka mo go swanago, banyalani bao ba sa nyakego go fetša nako ba le go tee, ba ka ba le mathata a lenyalo e bile lenyalo la bona le ka se tie.—Baefeso 5:28, 29.
KELETŠO YA BEIBELE: “Le kgonthišetše dilo tše bohlokwa kudu.”—BAFILIPI 1:10.
Boledišana le molekane wa gago gore go ditšhišinyo tšeo di lego ka mo tlase, ke dife tšeo le ka di dirišago go dira gore didirišwa tša elektroniki di se tsenatsene lenyalong la lena goba le ingwalele tša lena.
-
Go ja dijo mmogo bonyenyane gatee ka letšatši
-
Go ba le nako yeo re no dulago mmogo re sa swara didirišwa tša elektroniki
-
Go beakanya nako yeo re dirago selo seo re se ratago re le mmogo
-
Go tima didirišwa tša elektroniki bošego le go di bea kgole le moo re robalago
-
Go tima didirišwa tša elektroniki ka metsotso e 15 letšatši le lengwe le le lengwe gore re kgone go boledišana ntle le tšhitišo
-
Go tima inthanete didirišweng tša rena tša elektroniki ka nako e itšego letšatši le lengwe le le lengwe
You May Also Like
LENYALO LE LAPA
Re ka Dira Eng Gore re Diriše Thekinolotši Gabotse?
Go diriša thekinolotši go ka thuša banyalani goba gwa senya lenyalo la bona. Ka lapeng la gago le diriša bjang thekinolotši?
LENYALO LE LAPA
O ka Tlogela Bjang Mošomo wa Gago “Mošomong?”
Dintlha tše hlano tšeo di ka thušago gore mošomo wa gago o se ke wa senya lenyalo la gago.
PHAFOGA!
Na o Šomiša Didirišwa tša Thekinolotši ka Bohlale?
Araba dipotšišo tše nne tše bonolo tša go itlhahloba gore o hwetše karabo.
