Psalme 65:2 e re: ‘Wena Mokwi wa dithapelo go wena go tla tla batho ba mehuta ka moka.’

Batho ba bangwe ba re ba no rapela gore ba ikwe ba le kaone, le ge ba sa tshepe gore go na le motho yo a tlogago a ba theeditše. Eupša ga re no rapela Modimo feela gore re ikwe re imologile mathateng a rena. Beibele e re: ‘Jehofa * o kgauswi le bohle bao ba mmitšago gotee le bohle bao ba mmitšago ka go rereša. O a ba kwa ge ba mo llela gore a ba thuše.’—Psalme 145:18, 19.

Ka gona, re ka tshepa gore Jehofa Modimo o kwa dithapelo tša batho bao ba mo hlankelago. Go Jeremia 29:12, o botša bahlanka ba gagwe gore: “Le tla mpitša, la tla la nthapela, gomme ke tla le theetša.”

Baroma 12:12 e re: “Phegelelang thapelong.”

Beibele e re botša gore re ‘rapele re sa kgaotše’ le go ‘tšwela pele re rapela ka dinako ka moka.’ Go molaleng gore Jehofa Modimo o nyaka re mo rapela.—Mateo 26:41; Baefeso 6:18.

Ke ka baka la’ng Modimo a nyaka gore re mo rapele? Ka mohlala: Ke motswadi ofe yoo a ka se thabego ge ngwana wa gagwe a re go yena: “Papa, ke kgopela o nthuše”? Ke nnete gore motswadi yo, a ka ba a šetše a tseba gore ngwana wa gagwe o hloka eng le gore o ikwa bjang. E bile o a bona gore ngwana yo o a mo tshepa le gore ga a mo tšhabe. Ka mo go swanago, ge re rapela Jehofa Modimo, re mmontšha gore re a mo tshepa le gore re nyaka go ba bagwera ba gagwe.—Diema 15:8; Jakobo 4:8.

1 Petro 5:7 e re: ‘Lahlela dipelaelo tša gago ka moka go Modimo, gobane o a go hlokomela.’

Modimo o nyaka gore re mo rapele ka gobane o a re rata e bile o a re hlokomela. O tseba mathata a rena ka moka le dilo tšeo di re tshwenyago gomme o nyaka go re thuša.

Ka mohlala, Kgoši Dafida o feditše bophelo bja gagwe ka moka a rapela Jehofa gore a mo thuše, e bile a mmotša kamoo a ikwago ka gona. (Psalme 23:1-6) Seo se ile sa dira gore Modimo a rate Dafida le go kwa dithapelo tša gagwe tše dintši. (Ditiro 13:22) Go no swana le ge Jehofa a be a theetša dithapelo tša Dafida, le tša rena o a di theetša ka gobane o a re rata.

A ke a mangwe a mantšu ao a ngwadilwego ke yo mongwe wa bangwadi ba dipsalme tša ka Beibeleng. Mopsalme yo, o be a tseba gore Modimo o be a ekwa dithapelo tša gagwe, gomme seo se ile sa mo dira gore a mo rate kudu le go ba mogwera wa gagwe. Dilo tše ka moka, di ile tša mo thuša gore a kgone go kgotlelela mathata a gagwe.—Psalme 116:1-9.

Ge re tshepa gore Modimo o kwa dithapelo tša rena, re tlo dula re mo rapela. Ka mohlala, ekwa seo se ilego sa diragalela Pedro yo a dulago ka Borwa bja Spain. Morwa wa gagwe wa mengwaga e 19 o ile a hlokofala kotsing ya koloi. Ge Pedro a be a ikwa a nyamile, o be a botša Jehofa kamoo a bego a ikwa ka gona. E bile o be a dula a mo rapela gore a mo homotše le go mo thekga. Na Jehofa o ile a kwa thapelo ya gagwe? Ee. O re: “O ile nkaraba ka gore a romele Bakristegotee le nna gore ba tle ba homotše nna le mosadi wa ka le go re thekga.”

Le ge go rapela go sa mo thuša gore morwa wa gagwe a phele gape, eupša Bakristegotee le yena ba thušitše yena le lapa la gagwe ka ditsela tša go fapafapana. Mosadi wa Pedro e lego María Carmen, o re: “Go rapela go nthušitše gore ke kgotlelele bohloko bjo ke bego ke bo kwa, e bile ke be ke tseba gore Jehofa Modimo o be a nkwešiša, ka gore ge ke mo rapela, ke be ke šala ke na le khutšo ya monagano.”

Re kwele go tšwa ka Beibeleng gore ka nnete Modimo ke mokwi wa dithapelo. E bile re kgonne go bona seo go batho bao re sa tšwago go bolela ka bona gore Modimo o kwa dithapelo tša rena. Bjale potšišo ke gore, ke ka baka la eng Modimo a araba dithapelo tše dingwe mola tše dingwe a sa di arabe?