Dimpho tše dingwe di bohlokwa ka gobane re di filwe ke motho yo a nago le matla a taolo goba motho yo re mo tšeelago godimo. Lega go le bjalo, dimpho tše dingwe tšeo di sa bitšego tšhelete e ntši, di tšeelwa godimo ka gobane di tšwa go setho seo se ratwago sa lapa goba mogwera yo a botwago. Go bile bjalo ka mpho yeo Russell a e filego Jordan, yeo go boletšwego ka yona sehlogong se se fetilego. Se se sepedišana bjang le mpho ya topollo?

Sa pele, Beibele e re “Modimo o rometše Morwa wa gagwe yo a tswetšwego a nnoši lefaseng gore re hwetše bophelo ka yena.” (1 Johane 4:9) Ntlha yeo e dira gore mpho ye e be ya bohloka e le ruri. Ga go na yo a fetago Modimo ka bogolo. Mopsalme wa Moheberu ge a ngwala ka yena, o re: “Wena yoo leina la gago e lego Jehofa, ke wena o nnoši o lego Yo Godimodimo godimo ga lefase ka moka.” (Psalme 83:18) Ga go na motho yo mongwe yo re bego re ka hwetša mpho yeo go yena.

Sa bobedi ke gore Modimo ke “Tatago rena.” (Jesaya 63:16) Bjang? O re file bophelo. Go oketša moo, o re hlokomela ka lerato go swana le tate yo lerato yo a hlokomelago bana ba gagwe. E le ge a bitša ba bangwe ba batho ba gagwe ba bogologolo gore ke Efuraime, Modimo o ile a botšiša gore: “Na Efuraime ga se morwa wa ka yo bohlokwa goba ngwana yo ke mo swarago ka lerato? . . . Mala a ka a [huduegile] ka baka la gagwe. Ke tla mo šokela e le ruri.” (Jeremia 31:20) Modimo o ikwa ka tsela e swanago ka barapedi ba gagwe lehono. Ga se feela gore ke Mmopi wa rena yo e lego Ramatlaohle, eupša gape ke Tate le Mogwera wa rena yo a botegago. Na seo ga se dire gore re tšeele godimo mpho le ge e le efe yeo e tšwago go yena?

Dimpho tše dingwe di bohlokwa ka gobane di filwe ka go šušumetšwa ke lerato le le tšwago pelong, e sego ka kgapeletšo. Motho yo a neago mpho ka lerato ga a letele gore a lefše bakeng sa botho bja gagwe.

Modimo o gafile Morwa wa gagwe bakeng sa rena ka gobane a re ratile. Beibele e re: “Re utolletšwe lerato la Modimo ka se, gobane Modimo o rometše Morwa wa gagwe yo a tswetšwego a nnoši.” O dirile se ka morero ofe? “Gore re hwetše bophelo ka yena.” (1 Johane 4:9) Na Modimo o be a gapeletšega go dira bjalo? Le gatee! “Topollo yeo e lefilwego ke Kriste Jesu” ke go bontšha ga Modimo ‘botho bjo bogolo.’—Baroma 3:24.

Ke ka baka la’ng mpho ya Modimo e le pontšho ya ‘botho bjo bogolo’? Beibele e hlalosa gore: “Modimo o bonagatša lerato la gagwe go rena ka gore, ge re be re sa le badiradibe Kriste o ile a re hwela.” (Baroma 5:8) Modimo o šušumeditšwe ke lerato la go hloka boithati gore a gate mogato bakeng sa batho bao ba fokolago, bao ba nyakago thušo le bao ba nago le sebe. Ga se ra hwetša lerato leo ka gobane le re swanela, e bile re ka se tsoge re mo lefile bakeng sa lona. O bonagaditše lerato le legolo kudu historing ka mpho ya gagwe.

Dimpho tše dingwe di bohlokwa ka gobane di bontšha boikgafo bjo bogolo bjo bo dirilwego ke monei wa tšona. Ge motho a ikemišeditše go kgaogana le selo seo a se tšeago se le bohlokwa gomme a re nea sona, re tloga re tšeela mpho yeo godimo ka baka la boikgafo bjo bo dirilwego.

Modimo o “[gafile] Morwa wa gagwe yo a tswetšwego a nnoši.” (Johane 3:16) Ga go na yo mongwe yo a mo ratago go feta yena yo a ka bego a ile a re gafela yena. Mengwageng e sa balegego ya ge Modimo a be a bopa legohle, Jesu o be a šoma le yena gomme a ‘ratwa kudu’ ke Modimo. (Diema 8:30) Jesu ke “Morwa wa lerato” la Modimo, goba yo a rategago, le “seswantšho sa Modimo yo a sa bonagalego.” (Bakolose 1:13-15) Ga se gwa ka gwa ba le batho ba babedi bao ba ratanago go swana le kamoo Modimo le Jesu ba ratanago ka gona.

Lega go le bjalo, Modimo ‘ga se a ka a babalela gaešita le Morwa wa gagwe.’ (Baroma 8:32) Jehofa o re file mpho e di phalago tšohle. O gafile go gontši kudu go phala dimpho ka moka.

Dimpho tše dingwe di bohlokwa ka gobane o be o tloga o di hloka kudu. Ka mohlala, ruri o be o tla leboga kudu motho yo a ithaopetšego go go lefelela kalafo yeo o bego o ka se kgone go e lefela! Ruri mpho yeo e be e tla ba yeo e sa bapišwego!

“Go etša ge ka Adama bohle ba ehwa, ka tsela e swanago, le ka Kriste bohle ba tla phedišwa.” (1 Bakorinthe 15:22) Ka ge re le ditlogolo tša Adama, ka moka ga rena re a ‘hwa,’ ga re kgone go tšhabela mahloko a bolwetši le lehu goba go ipoelanya le Modimo gore re se be le molato pele ga gagwe. Le gona ka ge re le batho ba tlasana, re ka se kgone go ‘iphediša’ goba ra ‘phediša’ motho le ge e le ofe. Beibele e re: “Ga go le o tee wa bona yo le ka mohla a ka kgonago go lopolla ngwanabo, goba go nea Modimo topollo bakeng sa ngwanabo; (tefo ya go lopolla moya wa bona e godimo kudu).” (Psalme 49:7, 8) Re tloga re nyaka thušo ka gobane re ka se kgone go lefelela topollo. Ka ntle le yona, nkabe re lahlegile.

Ka lerato la gagwe le legolo, Jehofa o ithaopetše go lefela seo re ka rego ke kalafo yeo re e nyakago, e le gore ka Jesu ‘bohle ba tle ba phedišwe.’ Topollo e phetha se bjang? “Madi a Jesu Morwa wa gagwe a re hlwekiša sebeng sohle.” Ruri go dumela mading a Jesu ao a tšholotšwego go bula tsela ya go lebalelwa dibe le e išago bophelong bjo bo sa felego. (1 Johane 1:7; 5:13) Ke eng seo topollo e tlago go se direla baratiwa ba rena bao ba hwilego? Beibele e re: “Bjalo  ka ge lehu le tlile ka motho, tsogo ya bahu le yona e tla ka motho [Jesu].”—1 Bakorinthe 15:21. *

Ga go na mpho yeo e kilego ya newa ke motho yo a phagamego goba yeo e šušumeditšwego ke lerato le legolo go feta sehlabelo sa Jesu. Ga go na motho yo a kilego a gafa mo gontši kudu bakeng sa rena go swana le Jehofa Modimo. Le gona ga go na mpho yeo e holago kudu go swana le sehlabelo setee seo se re lokollago sebeng le lehung. Ruri ga go na mpho yeo e ka batamelago bohlokwa bjo bo sa hlalosegego bja topollo.