BOŠORO BJA KA GAE LE BJA TŠA THOBALANO: Mokgatlo wa Ditšhaba tše Kopanego o bega gore: “Mosadi o tee go ba bararo o ile a hlaselwa ka bošoro bja ka gae goba bja tša thobalano ke motho yo a ratanago le yena nengneng bophelong.” Ka manyami, “go akanyetšwa gore, lefaseng ka moka, mosadi o tee go ba bahlano o tla hlaselwa ka go katwa goba maiteko a go katwa.”

BOSENYI BJA DITARATENG: Go begilwe gore kua United States go na le dihlopha tše šoro tše fetago 30 000 tša disenyi. Kua Latin Amerika, go begilwe gore mo e ka bago motho o tee go ba bararo ke mohlaselwa wa bošoro bja bosenyi.

GO BOLAYANA: Go akanyetšwa gore go bolailwe batho bao e nyakilego go ba seripagare sa milione ngwageng wa morago bjale, go feta bao ba bolailwego dintweng. Dinageng tša ka Borwa bja Afrika le tša Amerika Bogare go bolailwe batho ba bantši kudu bao ba fetago ka makga a mane bao ba bolailwego lefaseng ka moka. Batho ba fetago ba 100 000 ba bolailwe Latin Amerika ka ngwaga o tee gomme Brazil e nnoši gwa bolawa bao e ka bago ba 50 000. Na go ka ba le tharollo ya sa ruri ya bošoro?

Ke ka baka la’ng bošoro bo tletše gakaakaa? Go lemogilwe gore go na le dilo tše dintši tšeo di bakago bošoro, go akaretša tše di latelago: kgateletšego yeo e bakwago ke go se lekane ka tša leago le tša boiphedišo, go se hlomphe maphelo a batho ba bangwe, go diriša bjala le dihlaretagi gampe, ge bana ba dula ba bona bošoro bathong ba bagolo le taba ya go bona disenyi tše šoro di sa otlwe.

Ke therešo gore dikarolong tše dingwe tša lefase go na le tšwelopele tabeng ya go fokotša bošoro. Go begilwe gore motseng woo o nago le badudi ba bantši wa São Paulo, Brazil, palo ya dipolao e theogile ka diperesente tše 80 mengwageng e lesome e fetilego. Lega go le bjalo, mehuta ka moka ya bosenyi bjo šoro e atile motseng woo gomme go bolawa mo e ka bago badudi ba 10 go ba 100 000. Ka gona, ke’ng seo se ka thušago go fediša bošoro ka mo go feletšego?

Ge e le gabotse tharollo ya sa ruri ya bošoro e akaretša batho, e lego mekgwa ya bona le boitshwaro. E le gore batho ba šoro ba fetoge, ba swanetše go tlogela mekgwa e bjalo ka boikgantšho, megabaru le boithati gomme ba be le lerato, tlhompho le go tshwenyega ka ba bangwe.

Ke’ng seo se ka tutuetšago motho gore a dire diphetogo tšeo tše dikgolo? Nagana ka seo Beibele e se rutago, ge e re:

• “Se ke seo lerato la Modimo le se bolelago, gore re boloke ditaelo tša gagwe.”​—1 Johane 5:3.

• “Go boifa Jehofa ke go hloya bobe.” *​—Diema 8:13.

 Go rata Modimo le go tšhaba go mo nyamiša ke dilo tše matla tšeo di ka tutuetšago batho ba šoro le go ba thuša go fetoša maphelo a bona​—e sego ganyenyane feela, eupša go fihla bokgoleng bja gore ba fetoše semelo sa bona. Na se se direga e le ka kgonthe?

Ela hloko Alex, * yo a feditšego mengwaga e 19 a le kgolegong ya Brazil ka baka la ditiro tše mmalwa tša go hlasela batho. Ka morago ga go ithuta Beibele le Dihlatse, o ile a ba Hlatse ya Jehofa ka ngwaga wa 2000. Na o tloga a fetogile mekgweng ya gagwe ya bošoro? Ee, le gona Alex o itshola kudu ka baka la dilo ka moka tše mpe tšeo a di dirilego. O re: “Ke rata Modimo ka ge a ntirile gore ke ikwe ke lebaletšwe ka mo go feletšego. Go leboga Jehofa le go mo rata go nthušitše gore ke fetoše ditsela tša ka.”

César, yo le yena a dulago Brazil o be a thubela batho e bile a utswa a itlhamile ka dibetša. O phetše bjalo ka mengwaga e ka bago e 15. O fetošitšwe ke’ng? Ge a be a le kgolegong, Dihlatse tša Jehofa di ile tša ikgokaganya le yena, ke moka le yena a ithuta Beibele. César o hlalosa gore: “Ke be ke thoma go hwetša morero bophelong. Ke ithutile go rata Modimo. Ke ithutile gape le go mmoifa, e lego poifo e botse ya go tlogela go dira dilo tše mpe le tšeo di nyamišago Jehofa. Ke be ke sa nyake gore a bone eka ga ke leboge botho bja gagwe. Lerato le bjalo le poifo di ntutueleditše gore ke fetoge.”

Dikanegelo tša maphelo a batho ba di re bontšha’ng? Di bontšha gore Beibele e tloga e na le matla a go fetoša maphelo a batho​—ka go fetoša tsela ya bona ya go nagana. (Baefeso 4:23) Alex, yo go boletšwego ka yena pejana, o oketša ka gore: “Seo ke bego ke ithuta sona ka Beibeleng se be se le bjalo ka ge eka ke tšhelwa ke meetse ao a hlwekilego, ao ganyenyane-ganyenyane a bego a ntlhwekiša gore ke tlogele menagano e mebe. Ke be ke sa nagane gore nka tsoga ke kgonne go tlogela dilo tše dingwe.” Ee, ge re tlatša menagano ya rena ka molaetša o hlwekilego wa Beibele, o ka tloša goba wa re hlwekiša bobe. Lentšu la Modimo le na le matla a go hlwekiša. (Baefeso 5:26) Le ka dira gore batho ba šoro le baithati ba fetoše ditsela tša bona gore e be ba botho le ba nago le khutšo. (Baroma 12:18) Ka go phela ka melao ya motheo ya Beibele, ba thabela khutšo maphelong a bona.​—Jesaya 48:18.

Dihlatse tša Jehofa tšeo di fetago dimilione tše seswai dinageng tše 240 di lemogile seo se ka thušago go fediša bošoro. Batho bao ba tšwago merafong ka moka le dibopegong ka moka tša bophelo le ditlogong tše di fapanego ba ithutile go rata Modimo le go mmoifa gaešita le go ratana seng sa bona. Batho bao ba phela ka khutšo bjalo ka ge eka ke lapa lefaseng ka bophara. (1 Petro 4:8) Ke mehlala ya kgonthe ya go bontšha gore lefase leo le se nago bošoro le a kgonega.

Beibele e re kgauswinyane Modimo o tla fediša bošoro lefaseng. Lefase la lehono leo le nago le bošoro le letetšwe ke “letšatši la kahlolo le la tshenyego ya batho ba sa boifego Modimo.” (2 Petro 3:5-7) Go ka se sa ba le batho ba šoro bao ba tlaišago ba bangwe. Re ka kgodišega bjang gore Modimo o nyaka go tsena ditaba gare le go fediša bošoro?

Beibele e re Modimo o “hloile le ge e le mang yo a ratago bošoro.” (Psalme 11:5) Mmopi o rata khutšo le toka. (Psalme 33:5; 37:28) Ke ka baka leo a ka se kego a kgotlelela batho ba šoro go ya go ile.

Lefase le lefsa la khutšo le a tla. (Psalme 37:11; 72:14) Ke ka baka la’ng o sa ithute ka mo go oketšegilego mabapi le kamoo o ka swanelegago go phela lefaseng leo le se nago bošoro?