Ke belegetšwe motsaneng wo o lego Saxony, nageng yeo ka nako yeo e bego e bitšwa German Democratic Republic (GDR). Ka gae go be go le bose e bile re be re ratana. Batswadi ba ka ba be ba nthutile mekgwa e mebotse. GDR e be e le mmušo wa Bokomanisi, ka gona batho ba bantši ba Saxony ba be ba se na taba le bodumedi. Ge e le nna ke be ke sa dumele gore Modimo o gona. Ke be ke dumela go boilaModimo le Bokomanisi go ba go fihla ge ke na le mengwaga e 18.

Gore’ng ke be ke kgahlwa ke Bokomanisi? Ke be ke rata taba ya gore batho ka moka ba tšewa ba lekana. Le gona, ke be ke dumela gore batho ka moka ba be ba swanetše go abelwa dilo ka go lekana. Lebaka la se e be le le go thuša gore go se ke gwa ba le ba go huma kudu le ba go diila kudu. Ka gona, ke ile ka tsenela mokgatlo wa bafsa wa Bokomanisi. Ge ke be ke na le mengwaga e 14, ke ile ka fetša nako ke hlwekiša tikologo ka go topela dipampiri gomme ke di iša moo di tlago go dirišwa lefsa. Batho ba toropong ya Aue ba ile ba leboga kudu seo ke bego ke se dira. E bile balaodi ba moo ba ile ba nnea moputso. Le ge ke be ke sa le yo monyenyane, ke be ke šetše ke tsebana le boradipolotiki ba go tuma ba GDR. Ke be ke nagana gore ke swere tsela ya maleba le gore bokamoso bja ka bo a phadima.

Go se go ye kae, dilo di ile tša fetoga. Ge Leboto la Berlin le be le ewa ka 1989, kgwerano ya Bokomanisi ya ka Bohlabela bja Yuropa le yona e ile ya wa. Go ile gwa direga dilo tša go makatša ka go latelana. Ke ile ka thoma go lemoga gore mmušo wa GDR o be o se na toka. Ka mohlala, batho bao ba bego ba sa thekge Bokomanisi ba be ba tšeelwa fase. Ke ile ka ipotšiša gore seo se kgonega bjang? Na ga se rena Makomanisi re bego re re batho ka moka ba tšewa ba lekana? Na Bokomanisi e be e no ba go iphora? Ke ile ka thoma go ba le dipelaelo.

Ke ile ka tlogela dipolotiki gomme ka swarega ka mmino le go penta diswantšho. Ke be ke lora ka go ba setsebi sa mmino ka ge ke be ke tsena sekolong sa mmino e bile go na le kgonagalo ya gore ke ye yunibesithing. Sa go nyamiša ke gore ke ile ka lahla mekgwa e mebotse yeo batswadi ba ka ba bego ba nthutile yona bjaneng. Ke ile ka thoma go rata menate ya lefase kudu, go akaretša go ratana le banenyana ba bantši ka nako e tee. Eupša mmino, go penta diswantšho le go ikgapa ke ikgoroša ga se tša ka tša fediša dipelaelo tša ka. Le diswantšho tšeo ke bego ke di penta di be di  bontšha gore ke na le poifo. Ke be ke ipotšiša gore bokamoso bo ntshwaretše eng le gore morero wa bophelo ke ofe?

Ke ile ka makala ge ke hwetša dikarabo tša dipotšišo tšeo. Mantšiboeng a mangwe ge ke sa le sekolong, ke be ke dutše le barutwana ba bangwe re boledišana ka bokamoso. Yo mongwe wa barutwana bao e be e le Mandy * yo gape e lego Hlatse ya Jehofa. Mantšiboeng ao o ile a mpha keletšo e botse kudu. O ile a re: “Andreas ge e ba o nyaka go tseba ka bophelo le bokamoso, gona o bale Beibele ka kelohloko.”

Ke be ke sa nape ke mo tshepa eupša ke ile ka phetha ka gore ke yo nyaka dikarabo ka Beibeleng. Mandy o ile a re ke bale lengwalo la Daniele kgaolo 2. Lengwalo leo le ile la mmakatša kudu. Boporofeta bjo bo lego lengwalong leo bo hlalosa ka mebušo ya lefase yeo e bego e tla kgoma batho go fihla le lehono. Mandy o ile a mpontšha diporofeto tše dingwe tša ka Beibeleng tšeo di bolelago ka bokamoso bja rena. Bjale ke be ke hwetša dikarabo tša dipotšišo tšeo ke bego ke ipotšiša tšona. Eupša ke be ke ipotšiša gore ke mang a ngwadilego diporofeto tšeo, le gore ke mang a bego a ka bolela e sa le pele ka bokamoso a nepile gakaakaa? Na seo se ra gore Modimo o gona?

Mandy o ile a nkopanya le banyalani bao e lego Dihlatse tša Jehofa, e lego Horst le Angelika. Ba ile ba nthuša gore ke kwešiše Beibele kutšwanyana. Ke ile ka lemoga kapejana gore Dihlatse tša Jehofa ke tšona feela bodumedi bjo bo dulago bo diriša leina la Modimo la Jehofa le go botša batho ka lona. (Psalme 83:18; Mateo 6:9) Ke ile ka ithuta gore Jehofa Modimo o tshepiša batho go tlo phela ka mo go sa felego lefaseng la paradeise. Psalme 37:9 e re: “Bao ba holofetšego Jehofa ke bona bao e tlago go ba beng ba lefase.” Ke ile ka kgahlwa ke gore bophelo bjo, ke bjo Modimo a bo tshepišago batho ka moka bao ba lwelago go phela ka melao ya gagwe ya boitshwaro yeo e hlaloswago ka Beibeleng.

Lega go le bjalo, go be go se bonolo gore ke fetoše mekgwa ya ka gomme ke phele ka go dumelelana le melao ya Modimo. Ke be ke ikgogomoša ka ge ke be ke atlegile go tša mmino. Ka gona go be go nyakega gore ke ithute go ikokobetša. Go feta moo, ke be ke thatafalelwa ke go lahla bophelo bja go hloka boitshwaro. Ke leboga gore ge batho ba katanela go dira seo Beibele e se rutago, Jehofa ga a ba felele pelo, o ba swara ka botho e bile o bona maiteko ao ba a dirago.

Semelo sa ka se be se laolwa ke Bokomanisi le boilaModimo go fihlela ge ke na le mengwaga e 18; eupša go tloga ka nako yeo Beibele e ile ya thoma go fetoša bophelo bja ka. Seo ke ithutilego sona se dirile gore ke se sa belaela ka bokamoso e bile se dirile gore bophelo bja ka bo be le morero. Ka 1993 ke ile ka kolobetšwa gore ke be Hlatse ya Jehofa. Ka 2000 ke ile ka nyalana le Tabitha yo le yena e lego Hlatse ya Jehofa. Re fetša nako e ntši ka mo re ka kgonago re ruta batho gore ba tsebe Beibele. Go swana le nna, batho ba bantši bao re kopanago le bona ba gotše ba dumela go Bokomanisi le boilaModimo. Ke kgotsofala kudu ge ke ba botša gore ba ka tseba Jehofa bjang.

Ge ke thoma go ya lefelong la Dihlatse tša Jehofa la borapedi, batswadi ba ka ba ile ba tšhoga. Eupša ga e sa le ke e ba Hlatse, ba kgona go bona gore ke motho yo mokaone. Ke thabišwa ke gore ga bjale ba ithuta Beibele e bile ba ya le lefelong la Dihlatse tša Jehofa la borapedi.

Nna le Tabitha re thabela lenyalo la rena ka gobane re diriša keletšo yeo Beibele e e neago banyalani. Ka mohlala, ge re diriša keletšo ya Beibele ya gore re botegelane, lenyalo la rena le tia le go feta.—Baheberu 13:4.

Ga ke sa boifa le go belaela ka bokamoso. Ke thabela go ba karolo ya lapa la lefase ka bophara la Dihlatse tša Jehofa, leo le nago le khutšo ya kgonthe le botee. Ka lapeng le re swarana ka go lekana. Ke be ke dutše ke dumela go seo bophelong bja ka ka moka e bile ke duma go se hwetša.