• Morwa wa gago o na le mengwaga e lesome, fela o a ikgogomoša!

• Ngwana yo o nyaka gore batho ka moka ba mo tšeele godimo.

O ipotšiša gore: ‘Ngwana yo o tsenwe ke’ng? Ke nyaka gore a ikwe a ratwa eupša a se ke a tšea gore o phala batho ka moka!’

Na go a kgonega go ruta ngwana gore a be le boikokobetšo ka ntle le go mo dira gore a ikwe a inyatša?

Mengwageng ya morago bjale, batswadi ba kgothaleditšwe go dumelela bana ba bona go dira selo se sengwe le se sengwe seo bana ba se nyakago; go ba reta le ge go sa hlokagale; go se ba phošolle le go se ba nee tayo. Go be go naganwa gore ge bana ba ka dirwa gore ba ikwe ba le bohlokwa, ba tla gola e le batho bao ba ikholofelago. Eupša pheletšo ya seo e bile efe? Puku ya Generation Me e re: “Go e na le go tšweletša bana bao ba thabilego le bao ba tlwaeditšwego gabotse, mokgwa wo wa go ikholofela o tšweleditše bana bao ba iponago ka mo go feteletšego.”

Bana ba bantši bao ba golago ba retwa go sa hlokagale, gantši ba gola e le bao ba sa kgonego go lebeletšana le go nyamišwa, go amogela go phošollwa le gore ka dinako tše dingwe ba ka fela ba palelwa. Ka ge ba rutilwe go tshwenyega feela ka dinyakwa tša bona, ge ba šetše ba gotše ba thatafalelwa ke go ba le segwera seo se swarelelago. Ka baka leo, ba bantši ba bona ba ba le dipelaelo le kgateletšego ya monagano.

Bana ba ikwa e le ba bohlokwa e le ka kgonthe ka baka la dilo tšeo ba kgonnego go itirela tšona, e sego ka go dula ba botšwa gore ba bohlokwa. Seo se nyaka se se fetago taba ya go no itshepa. Ba swanetše go ithuta ka kelohloko mediro yeo ba e kgethilego, ba itlwaetše yona le go kaonefatša moo go nyakegago. (Diema 22:29) Le gona, ba swanetše go šetša dinyakwa tša batho ba bangwe. (1 Bakorinthe 10:24) Dilo tše ka moka di nyaka boikokobetšo.

Reta ngwana wa gago ge go tloga go swanetše gore a retwe. Ge morwedi wa gago a phasa gabotse sekolong, mo rete. Ge a ka hwetša dimaraka tša fase, o se ke wa kitimela go bea morutiši molato. Seo se ka se thuše morwedi wa gago gore a ithute go ikokobetša. Go e na le moo, mo thuše go bona ka moo a ka kaonefatšago nakong e tlago. Mo rete ge feela a swanelwa ke go retwa.

Mo phošolle ge go nyakega. Se ga se bolele gore o swanetše go dulela go swaya ngwana wa gago diphošo. (Bakolose 3:21) Eupša diphošo tše dikgolo di swanetše go lokišwa. Mekgwa e mebe le yona e swanetše go lokišwa. Go sego bjalo, a ka nwelela mekgweng yeo le diphošong tšeo.

Ka mohlala, a re re morwa wa gago o thoma go ikgantšha. Ge a sa phošollwe, a ka thoma go ikgogomoša le go ipea lekatana. Ka gona, botša ngwana wa gago gore go ikgantšha go mo dira motho yo mobe le gore seo se ka feleletša ka go mo leša dihlong. (Diema 27:2) Le gona mo hlalosetše gore motho yo a itebelelago ka tsela e nepagetšego a ka se tšame a kgantšhetša ba bangwe ka bokgoni bja gagwe. Go phošolla ngwana ka lerato go tla mo ruta gore a ikokobetše, go e na le gore a inyatše.—Molao wa motheo wa Beibele: Mateo 23:12.

Thuša ngwana wa gago go lebelela bophelo ka tsela yeo bo lego ka yona. Go lema ngwana ka go mo fa selo se sengwe le se sengwe seo a se nyakago go ka mo dira gore a be le matepe. Ka mohlala, ge e ba ngwana a nyaka selo se o ka se kgonego go se fihlelela, mo hlalosetše gore ke ka baka la eng go le bohlokwa go latela thulaganyo ya go diriša tšhelete. Ge e ba le swanelwa ke go se sa intšha goba go ya maikhutšong, hlalosetša ngwana wa gago gore bophelong go fela go e ba le dilo tša go nyamiša gomme o mmotše gore wena o dira eng ge o nyamišitšwe. Go e na le go šireletša bana ba gago bothateng bjo bongwe le bjo bongwe, ba thuše gore ba tle ba kgone go lebeletšana le ditlhohlo ge e šetše e le batho ba bagolo.—Molao wa motheo wa Beibele: Diema 29:21.

Mo kgothaletše go fana. Kgodiša ngwana wa gago gore “go na le lethabo le legolo go neeng go feta go amogeleng.” (Ditiro 20:35) O ka dira seo bjang? Bobedi bja lena le ka dira lelokelelo la batho bao ba nyakago thušo ya go rekelwa dilo, ya senamelwa goba ya go lokišetšwa dilo tše itšego. Sepela le ngwana wa gago ge o eya go thuša ba bangwe ba bona. Dira gore ngwana wa gago a bone gore o thabile e bile o kgotsofetše ge o dutše o thuša batho ba bangwe. Ka go dira bjalo, o tla be o beela ngwana wa gago mohlala wa go ba le boikokobetšo ka tsela e botse kudu.—Molao wa motheo wa Beibele: Luka 6:38.