JESU KRISTE o ile a re: “Eya gae go ba geno, o ba botše dilo ka moka tšeo Jehofa a go diretšego tšona le kgaugelo yeo a go bontšhitšego yona.” Jesu o boletše mantšu a go monna yo a bego a nyaka go ba molatedi wa gagwe mohlomongwe kua Gadara, ka borwabohlabela bja Lewatle la Galilea. Mantšu ao a Jesu a bontšha gore o be a tseba mokgwa wa rena batho wa go kganyoga go botša ba leloko dilo tšeo di re kgahlilego goba tša bohlokwa.—Mar. 5:19.

Mokgwa wo le lehono o sa le gona, e bile ditšong tše dingwe o bonagala kudu. Ka gona, ge motho a fetoga mohlanka wa Modimo wa therešo e lego Jehofa, ka tlwaelo o nyaka go botša ba leloko ka tumelo ya gagwe e mpsha. Eupša o swanetše go dira seo bjang? A ka fihlelela bjang dipelo tša ba leloko bao ba lego madumeding a mangwe—goba bao ba sa tsenego le kereke? Beibele e nea keletšo e botse le e šomago tabeng ye.

Lekgolong la pele la nywaga, Andrea e bile yo mongwe wa batho ba pele ba go hwetša gore Jesu ke Mesia. Ke mang wa mathomo yo Andrea a ilego a mmotša ka se? “Sa pele yena yo [Andrea] o ile a hwetša Simone ngwanabo, a re go yena: ‘Re hweditše Mesia’ (yeo e bolelago gore ‘Kriste’).” Andrea o ile a iša Petro go Jesu, ka go re’alo a nea Petro sebaka sa gore le yena e be yo mongwe wa barutiwa ba Jesu.—Joh. 1:35-42.

Ka morago ga nywaga e ka bago e tshelelago ge Petro a be a le kua Jopa, o ile a botšwa gore a lebe Kesarea ka leboa gomme a ye ntlong ya Koronelio yo e bego e le tona ya madira. Petro o ile a hwetša go kgobokane bomang ka ntlong yeo? “Go ba gona, Koronelio o be a ba letetše [Petro le bao a bego a sepela le bona] gomme a phuthile metswalo ya gagwe le bagwera ba gagwe ba pelobohloko.” Ka go re’alo, Koronelio o ile a nea ba leloko la gagwe sebaka sa gore ba kwe mantšu a Petro le go itirela phetho ka seo ba se kwelego.—Dit. 10:22-33.

 Re ka ithuta’ng tseleng yeo Andrea le Koronelio ba ilego ba dirišana le meloko ya bona?

Andrea le Koronelio ga se ba ka ba ipotša gore dilo di tla fo itiragalela. Andrea o ile a gata mogato wa pele wa go iša Petro go Jesu, gomme Koronelio le yena o ile a kgobokanya meloko ya gagwe gore e tle e kwe dilo tšeo Petro a bego a tlo di bolela. Eupša Andrea le Koronelio ga se ba ka ba gapeletša meloko ya bona goba go e hlalefetša gore e be balatedi ba Kriste. Na o bona seo re ithutago sona tabeng ye? Re swanetše go ba ekiša. Re ka abelana le ba leloko molaetša wa Beibele gomme ra bula dibaka tša gore ba kopane le therešo ya Beibele le badumedigotee le rena. Lega go le bjalo, re hlompha tokologo ya bona ya boikgethelo e bile ga re nyake go ba gapeletša go amogela therešo. Go bontšha kamoo re ka thušago ba leloko, ela hloko mohlala wa banyalani ba kua Jeremane e lego Jürgen le Petra.

Petra o ile a ithuta Beibele le Dihlatse tša Jehofa gomme a feleletša a kolobeditšwe. Monna wa gagwe e lego Jürgen e be e le molaodi wa mašole. Mathomong Jürgen o be a sa kgahlišwa ke phetho ya mosadi wa gagwe. Eupša ge nako e dutše e eya, o ile a lemoga gore Dihlatse di ruta therešo e tšwago Beibeleng. Le yena o ile a ineela go Jehofa gomme lehono ke mogolo ka phuthegong. Ke keletšo efe yeo gona bjale a e neago mabapi le go fihlelela dipelo tša ba leloko bao ba nago le ditumelo tše di sa swanego le tša rena?

Jürgen o re: “Ga se ra swanela go gapeletša ba leloko go amogela ditumelo tša rena le go ba botša dilo tše dintši tša moya. Seo se ka ba tena. Go ka ba kaone kudu ge ka bohlale re ka fo fela re lahlela a mabedi a mararo. Le gona go thuša kudu gore re kopanye ba leloko le bana babo rena bao ba lekanago le bona le bao ba ratago dilo tša go swana. Se se ka dira gore ba amogele therešo.”

Moapostola Petro le meloko ya Koronelio ba ile ba amogela molaetša wa Beibele kapejana. Ba bangwe ba lekgolong la pele la nywaga bao ba ilego ba kwa therešo ba ile ba tšea nako pele ba ka e amogela.

Batho ba mmalwa bao ba bego ba tswalana le Jesu ba ile ba dumela go yena nakong ya bodiredi bja gagwe bja lefaseng. Ka mohlala, go ka direga gore moapostola Jakobo le moapostola Johane e be e le metswalo ya Jesu le gore mmago bona e lego Salome, e be e le ngwanabo mmago Jesu. Go ka direga gore Salome e be e le yo mongwe wa ‘basadi ba bangwe ba bantši bao ba bego ba hlankela Jesu le baapostola ka dilo tša bona.’—Luka 8:1-3.

Lega go le bjalo, ditho tše dingwe tša lapa labo Jesu ga se tša ka tša bontšha tumelo go yena di tloga fase. Ka mohlala, tiragalong e nngwe ge Jesu a be a na le ngwaga a kolobeditšwe, lešaba le ile la kgobokana ka ntlong go tlo mo kwa a ruta. “Eupša ge ba gabo ba ekwa ka se, ba tšwa gore ba yo mo swara, gobane ba be ba re: ‘O hlakane hlogo.’” Ka morago ga nako e itšego, Jesu o ile a se arabe ka botlalo bana babo ka motswadi o tee ge ba be ba nyaka go tseba ka dithulaganyo tša leeto la gagwe. Ka baka la’ng? Ka gobane “bana babo ba be ba sa dumele go yena.”—Mar. 3:21; Joh. 7:5.

Re ka ithuta’ng tseleng yeo Jesu a ilego a dirišana le ba leloko? Ga se a ka a kgopišega ge ba bangwe ba bona ba be ba re o hlakane hlogo. Gaešita le ka morago ga lehu la gagwe le tsogo, Jesu o ile a kgothatša ba leloko la gagwe ka mo go oketšegilego ka go iponagatša go Jakobo e lego ngwanabo ka motswadi o tee. Go bonagala tiragalo ye e sa kgodiša Jakobo a nnoši gore Jesu e be e le Mesia e le ruri, eupša gape e ile ya kgodiša le bana babo ba bangwe. Ke ka baka leo le bona ba bego ba le gona ge baapostola ba be ba bokane ka phapošing ya ka godimo kua Jerusalema gomme ga  go pelaelo gore le bona ba ile ba amogela moya o mokgethwa. Ge nako e dutše e eya, Jakobo le Juda, e lego ba bangwe ba bana babo Jesu, ba ile ba thabela ditokelo tše di kgahlišago.—Dit. 1:12-14; 2:1-4; 1 Bakor. 15:7.

Go swana le lekgolong la pele la nywaga, go ka feta nako e teletšana pele ba bangwe ba leloko lehono ba ka amogela therešo. Ka mohlala, nagana ka Roswitha yo e bego e le setho se mafolofolo kerekeng ya Roma Khatolika ge monna wa gagwe a be a kolobetšwa gore e be yo mongwe wa Dihlatse tša Jehofa ka 1978. Ka ge mathomong Roswitha a be a fišegela ditumelo tša gagwe, o ile a ganetša monna wa gagwe. Eupša ge nywaga e dutše e eya, o ile a thoma go fetoga gomme a lemoga gore Dihlatse di ruta therešo. Ka 2003 o ile a kolobetšwa. Ke’ng seo se mo thušitšego gore a fetoge? Go e na le gore monna wa gagwe a galefišwe ke tsela yeo Roswitha a bego a mo swara ka yona mathomong, o ile a mo nea sebaka sa gore a fetoše kgopolo. Ke keletšo efe yeo Roswitha a e neago? O re: “Re ka fihlelela dipelo tša ditho tša lapa ka go se di felele pelo, go se hwe matwa le ka go se bee fase.”

Monika o kolobeditšwe ka 1974 gomme barwa ba gagwe ba babedi ya ba Dihlatse ka morago ga nywaga e lesome. Gaešita le ge monna wa gagwe e lego Hans a be a sa ba lwantšhe, eupša o kolobeditšwe ka 2006. Ke keletšo efe yeo lapa le le e neago go tšwa phihlelong ya lona? Le re: “Dulang le botegela Jehofa gomme le se ke la kwanantšha ditabeng tšeo di kgomago tumelo ya lena.” Ke therešo gore go be go le bohlokwa gore lapa le le tšwele pele le kgonthišetša Hans gore le a mo rata. Le gona lapa le ga se la ka la kgaotša go holofela gore ka letšatši le lengwe Hans o tla amogela therešo.

Jesu o kile a hlalosa gore molaetša wa therešo o swana le meetse ao a neago bophelo bjo bo sa felego. (Joh. 4:13, 14) Re nyaka gore meloko ya rena e lapološwe ke go nwa meetse a tonyago le ao a hlwekilego a therešo. Ga re nyake go ba kgamiša ka go ba nweša ona ka kgapeletšo le ka lephakuphaku. Tsela yeo re ba hlalosetšago tumelo ya rena ke yona e tla ba lapološago goba ya ba kgama. Beibele e re “pelo ya moloki e a naganišiša gore e kgone go araba” e bile e re “pelo ya yo bohlale e dira gore molomo wa gagwe o bontšhe temogo, e bile e dira gore molomo wa gagwe o kgodiše ba bangwe.” Re ka diriša bjang keletšo ye?—Die. 15:28; 16:23.

Mosadi a ka ba a nyaka go hlalosetša monna wa gagwe tumelo ya gagwe. Ge e ba a ka “naganišiša gore [a] kgone go araba,” o tla kgetha mantšu a gagwe ka bohlale gomme a se kitimele go bolela. Ga se a swanela go nea monna wa gagwe kgopolo ya gore yena o lokile kudu goba gore o mo phagametše. Mantšu a gagwe ao a naganišišitšwego gabotse a ka lapološa monna wa gagwe le go godiša khutšo ka lapeng. Ke neng moo monna wa gagwe a bago a iketlile le go batamelega? O rata go bolela ka’ng goba go bala eng? Na o rata thutamahlale, dipolotiki goba dipapadi? Mosadi yo a ka dira’ng gore monna wa gagwe a ithute Beibele a dutše a hlompha maikwelo le dipono tša gagwe? Go naganišiša ka dipotšišo tše swanago le tše go tla thuša mosadi go bolela le go dira dilo ka temogo.

Go fihlelela dipelo tša ditho tša lapa tšeo e sego ya tšwa e eba Dihlatse ga go bolele go fo di hlalosetša tumelo ya rena ka šedi. Seo re se bolelago se swanetše go sepedišana le boitshwaro bjo bobotse.

Jürgen yo go boletšwego ka yena pejana o re: “Ka mehla o itshware ka go dumelelana le melao ya motheo ya Beibele. Ye ke tsela e atlegago kudu ya go thuša wa leloko gore a naganišiše gabotse ka rena, gaešita le ge a ka se nape a re botša gore re itshwere gabotse.” Hans, yo a ilego a kolobetšwa mo e nyakilego go ba nywaga e 30 mosadi wa gagwe a kolobeditšwe o dumelelana le seo. O re: “Go itshwara ka tsela ya Bokriste go bohlokwa ka gore go thuša ba leloko go bona mafelelo a mabotse ao therešo e bago le ona maphelong a rena.” Ba leloko ba swanetše go bona gore tumelo ya rena e dira gore re se swane le batho ba bangwe ka tsela yeo e re holago, e sego ka tsela e re gobatšago goba e re gatelelago.

Moapostola Petro o neile basadi bao banna ba bona ba sego tumelong e tee le bona keletšo ye e bohlokwa: “Ikokobeletšeng banna ba lena, e le gore ge e ba go na le bao ba sa kwego Lentšu la Modimo, ba tle ba ruiwe ka boitshwaro bja basadi ba bona ka ntle le gore go bolelwe lentšu, ka baka la ge ba bile dihlatse tše di bonego ka mahlo tša boitshwaro bja lena bjo bo sekilego gotee le tlhompho e tseneletšego. Go ikgabiša ga lena e se be ga ka ntle, e lego ga go logwa ga moriri le ga go rwala dikgabišo tša gauta goba go apara diaparo tša maphadiphadi, eupša e be ga motho wa sephiring  wa pelo wa seaparo se se sa senyegego sa moya wo o homotšego le o boleta, wo e lego wa bohlokwa bjo bogolo mahlong a Modimo.”—1 Pet. 3:1-4.

Petro o ngwadile gore monna a ka thušwa ke boitshwaro bjo bobotse bja mosadi wa gagwe. A naganne ka keletšo ye ya Mangwalo, kgaetšedi yo a bitšwago Christa o be a dutše a leka go fihlelela pelo ya monna wa gagwe ka boitshwaro bja gagwe ga e sa le go tloga ge a kolobetšwa ka 1972. Gaešita le ge monna wa gagwe a kile a ithuta le Dihlatse, ga se a hlwa a amogela therešo. O be a fela a eya dibokeng tša Bokriste gomme o tlwaelane le ditho tša phuthego. Ditho tša phuthego le tšona di hlompha tokologo ya gagwe ya boikgethelo. Christa o dira’ng go leka go fihlelela pelo ya monna wa gagwe?

O re: “Ke ikemišeditše go dula ke dira seo Jehofa a rego ke se dire. Ka nako e swanago, ke leka go rua monna wa ka ‘ntle le go bolela lentšu’ ka boitshwaro bja ka bjo bobotse. Ge e ba a nyaka ke dira dilo tšeo di sa robego melao ya motheo ya Beibele, ke di dira ka pelo e tšhweu. Le gona ke hlompha tokologo ya gagwe ya go ikgethela gomme ka tlogelela tšohle ka diatleng tša Jehofa.”

Mohlala wa Christa o re bontšha bohlokwa bja go kobakobega le maemo. O kgomaretše lenaneo le lebotse la dilo tša moya, go akaretša le go ya dibokeng ka mehla le go tšea karolo ka botlalo bodireding bja Bokriste. Lega go le bjalo, o naganela monna wa gagwe, a lemoga gore ke motho wa pele yo a swanetšego go mo rata, go fetša nako le yena le go mo hlokomela. Ke gabohlokwa kudu gore rena bao re nago le ba leloko bao e sego Dihlatse re bontšhe go kobakobega le maemo le go ba naganela. Beibele e re: “Selo se sengwe le se sengwe se na le nako ya sona e beilwego.” Se se akaretša go fetša nako le ditho tša lapa, kudukudu balekane ba rena bao e sego Dihlatse. Nako yeo le e fetšago le le gotee e dira gore go be le poledišano e botse. Bo-mahlwa-a-di-bona ba re poledišano e botse e fokotša go ikwa ba lewa ke bodutu, go ikwa ba tlogetšwe goba ba na le lehufa.—Mmo. 3:1.

Holger, yoo tatagwe a ilego a kolobetšwa ka morago ga nywaga e 20 ditho tše dingwe ka moka tša lapa di kolobeditšwe o re: “Go bohlokwa go bontšha setho seo sa lapa gore re a se rata le gore re a se rapelela.” Christa o okeditše ka gore ‘a ka se tsoge a feletšwe ke kholofelo ya gore ka letšatši le lengwe monna wa gagwe o tla dumela go Jehofa gomme a amogela therešo.’ Ka mehla re swanetše go ba le pono e botse ka ba leloko bao e sego Dihlatse gomme re holofele gore ka letšatši le lengwe ba tla amogela therešo.

Pakane ya rena ke go dula re nwešana meetse le ba leloko, go ba nea sebaka sa go bona therešo le go kgoma dipelo tša bona ka molaetša wa Beibele. E bile re swanetše go bontšha ‘moya o boleta le tlhompho e tseneletšego’ dilong ka moka.—1 Pet. 3:15.