Batamela Kgaufsi le Modimo

Na go na le Selo le ge e le Sefe Seo se ka re ‘Aroganyago le Lerato la Modimo’?

Baroma 8:38, 39

KE MANG yo a sa nyakego go ratwa? Re a thaba ge re ikwa re ratwa ke ba lapa le bagwera. Lega go le bjalo, ka manyami ditswalano tša batho di senyega gabonolo e bile ga di a kgonthišega. Batho bao re ba ratago ba ka re kweša bohloko, ba re tlogela gaešita le go re lahla. Lega go le bjalo, go na le motho yoo lerato la gagwe le sa fetogego. Lerato leo Jehofa Modimo a nago le lona bakeng sa barapedi ba gagwe le hlaloswa gabotse go Baroma 8:38, 39.

Moapostola Paulo o re: “Ke kgodišegile.” O kgodišegile ka’ng? Ka gore ga go na selo se se ka kgonago go re “aroganya le lerato la Modimo.” Paulo o be a sa bolele ka yena feela eupša o be a akaretša le “rena”—ke gore, bohle bao ba hlankelago Modimo ka potego. Ge a gatelela ntlha ya gagwe, Paulo o lokeletša dilo tšeo di ka se kgonego go thibela lerato la Jehofa go fihlelela bahlanka ba gagwe ba ineetšego.

“Le ge e le lehu goba bophelo.” Jehofa ga a kgaotše go rata batho ba gagwe ge ba e-hwa. E le go bontšha gore o a ba rata, Modimo o ba boloka ka mogopolong wa gagwe gomme o tla ba tsoša lefaseng le lefsa le le tlago la go loka. (Johane 5:28, 29; Kutollo 21:3, 4) Kgabagareng, lerato la Modimo go barapedi ba gagwe bao ba botegago le dula le tiile go sa šetšwe seo bophelo bo ka ba tlišetšago sona tshepedišong ye ya dilo.

“Goba barongwa goba mebušo.” Batho ba ka kgongwa gabonolo ke tutuetšo ya bao ba nago le matla a taolo le mebušo, eupša ga go bjalo ka Jehofa. Dibopiwa tše matla tša moya, tše bjalo ka morongwa yo a fetogilego Sathane, di ka se kgone go kgodiša Modimo gore a kgaotše go rata bahlanka ba gagwe. (Kutollo 12:10) Le ge e le mebušo yeo e ganetšago Bakriste ba therešo, e ka se fetoše pono ya Modimo ka bahlanka ba gagwe.—1 Bakorinthe 4:13.

“Goba dilo tšeo di lego gona, gona bjale goba dilo tše di tlago go tla.” Lerato la Modimo ga le fokotšege ge nako e dutše e e-ya. Ga go na selo se se ka diragalelago bahlanka ba Modimo gona bjale goba nakong e tlago se se ka dirago gore Modimo a kgaotše go ba rata.

“Goba matla.” Paulo o boletše ka balaodi ba lego legodimong le lefaseng—e lego “barongwa” gaešita le “mebušo”—eupša gona bjale o bolela ka “matla.” Lentšu la Segerika leo le dirišitšwego mo le na le tlhaloso e pharaletšego. Go sa šetšwe seo ge e le gabotse le se bolelago, re kgonthišegile ka selo se tee: Ga go na matla legodimong goba lefaseng ao a ka thibelago lerato la Jehofa go fihlelela batho ba gagwe.

“Goba bophagamo goba go iša.” Jehofa o rata batho ba gagwe go sa šetšwe maemo a fapa-fapanego ao ba ikhwetšago ba le go ona.

“Goba sebopiwa le ge e le sefe se sengwe.” Ka mantšu a ao a akaretšago, Paulo o re ga go na selo seo ka mo go feletšego se ka aroganyago barapedi ba botegago le lerato la Jehofa.

Go fapana le lerato la batho, leo le ka fetogago goba la hwelela, lerato la Modimo go bao ba lebeletšego go yena ka tumelo ga le fetoge; ke leo le sa felego. Go tseba se e le ka kgonthe, go re tutueletša go batamela kgaufsi le Jehofa le go leka ka matla go bontšha gore re a mo rata.