Go Aloga ga Sehlopha sa bo-130 sa Gilead

Letšatši la Dikholofelo tše Dikgolo le Ditebelelo tše di Thabišago

KA NTLE le pelaelo, go aloga ga sehlopha sa bo-130 sa Sekolo sa Beibele sa Watchtower sa Gilead go ile gwa tliša dikholofelo le ditebelelo. Ka Mokibelo, March 12, 2011, batho ba ka godimo ga 8 500 ba ile ba kgobokana gore ba be gona tiragalong ya go aloga, go akaretšwa barutwana gotee le malapa a gabo bona le bagwera ba bona. Batho ba be ba sa fagahlela letšatši leo feela eupša ba be ba fagahletše le bokamoso bja baromiwa bao ba tlwaeditšwego gabotse bao ba bego ba tla tloga ba romelwa lefaseng ka moka gore ba yo ruta batho ditherešo tša Beibele.

‘Go Thaba Bao ba Dulago ba Letetše’ Jehofa

Kgopolo ye yeo e homotšago, yeo e tšerwego go Jesaya 30:18, e be e le sehlogo sa polelo yeo e neilwego ke Geoffrey Jackson, e lego setho sa Sehlopha se Bušago sa Dihlatse tša Jehofa le yo e bego e le modulasetulo wa lenaneo. Ka borutho e bile a dira metlae, o ile a lebogiša barutwana ge ba fentše ditlhohlo tša sekolo sa Gilead gomme a ba kgonthišetša gore ba be ba tla kgona go lebeletšana le letšhogo la letšatši le leo le thabišago. Ke ditebelelo dife tša kgonthe tšeo barutwana ba bego ba ka ba le tšona mabapi le bokamoso? O ile a hlalosa dintlha tše tharo tše di šomago tše di tšwago go Jesaya 30:18-21.

Sa pele, Ngwanabo rena Jackson o ile a re, “Le ka letela gore Jehofa o tla kwa dithapelo tša lena.” O ile a hlalosa kgonthišetšo yeo e lego go temana 19 e rego: “[Modimo] o tla le gaugela ge a ekwa le goeletša.” Ge a bontšha gore Seheberung sa mathomo lešala leo le dirišitšwego mo le be le le ka botee, e sego ka bontši, Ngwanabo rena Jackson o ile a bolela gore Jehofa o theetša dithapelo tša rena ka e tee ka e tee. “Bjalo ka Tate, Jehofa ga a botšiše gore, ‘O re’ng o se matla go swana le motho yola yo mongwe?’ Go e na le moo, o theetša yo mongwe le yo mongwe ka šedi. E bile o a araba.”

Sa bobedi, seboledi se ile sa bolela gore re ka letela mathata. “Jehofa ga a re holofetše gore bophelo bo tla ba bonolo, eupša o tla re thuša.” Go etša ge temana 20 e bontšha, Modimo o ile a bolela e sa le pele gore ge Baisiraele ba be ba hlaselwa, ba be ba welwa ke tlalelo le kgatelelo tšeo ba bego ba tla di tlwaela go etša senkgwa le meetse. Go dutše go le bjalo, Jehofa o be a tla dula a ikemišeditše go phološa batho ba gagwe. Barutwana ba Gilead le bona ba tla lebeletšana le mathata le ditlhohlo, gaešita le ge e ka se be tšeo ba di letetšego! Ngwanabo rena Jackson o ile a oketša ka gore: “Eupša le ka letela gore Jehofa o tla ba le lena gore a le thutše go swaragana le tlhohlo e nngwe le e nngwe.”

Sa boraro, Ngwanabo rena Jackson o ile a gopotša barutwana gore go etša ge ditemana 20 le 21 di bontšha, “motho a ka letela tlhahlo—ka gona e tsome!” O ile a bolela gore lehono, Mokriste yo mongwe le yo mongwe o swanetše go theetša ka kelohloko ge Jehofa a bolela a diriša Beibele le dikgatišo tšeo di theilwego Beibeleng. Seboledi se ile sa kgothaletša barutwana ka borutho gore ba tšwele pele ba bala Beibele letšatši le letšatši, ka gobane seo se bolela bophelo.

“Anke le Boifeng Jehofa”

Anthony Morris wa Sehlopha se Bušago o ile a hlalosa seo se bolelwago ke polelwana ya Mangwalo e rego “le boifeng Jehofa.” (2 Dikoronika 19:7) Mantšu ao ga a šupe mohuta le ge e le ofe wa poifo e šoro, eupša a šupa go kganyogo e tseneletšego ya go nyaka go dira se se lokilego, e lego tlhompho e tseneletšego kudu le e tšwago pelong yeo e ka thothomedišago motho ka letšhogo. Ngwanabo rena Morris o ile a kgothatša barutwana a re: “Eyang le mohuta woo wa poifo kabelong ya lena ya boromiwa.” Ba ka bontšha bjang poifo e bjalo ya go boifa Jehofa? Seboledi se ile sa lebiša tlhokomelo ditseleng tše pedi tše di šomago.

 Sa pele, Ngwanabo rena Morris o ile a kgothaletša barutwana gore ba diriše keletšo yeo e hwetšwago go Jakobo 1:19 e rego: ‘Le akgofele go kwa, le diege go bolela.’ O ile a bolela gore barutwana ba be ba ithutile mo gontši kudu thutong ya dikgwedi tše hlano, eupša ba be ba swanetše go ba šedi gore ba se ke ba ya kabelong ya bona gomme ba ikgantšha ka sohle seo ba bego ba ithutile sona. O itše: “Le swanetše go theetša pele. Le theetšeng phuthego ya gabo lena le bao ba etelelago pele nageng yeo le hlankelago go yona; theetšang gore ba re’ng ka naga le setšo sa yona. O se ke wa dikadika gore, ‘Ga ke tsebe.’ Ge e ba thuto ya gago e šomile, gona ge o dutše o ithuta, ke moo o tlago go lemoga gore ga o tsebe selo.”

Sa bobedi, Ngwanabo rena Morris o ile a bala Diema 27:21 e rego: “Silifera e sekišetšwa pitšeng gomme gauta e sekišetšwa sebešong, motho o lekwa go ya ka theto yeo a e hwetšago.” O ile a hlalosa gore go etša ge gauta le silifera di nyaka go sekišwa, le rena re ka lekwa ke theto. Bjang? Theto e ka leka seo re lego sona. E ka lebiša boikgogomošong le go hweng moyeng, goba e ka re dira gore re bone gore re kolota Jehofa gomme re ikemišetše kudu gore le ka mohla re se ke ra hlokomologa ditekanyetšo tša gagwe. Ka go re’alo, Ngwanabo rena Morris o ile a kgothaletša barutwana gore ba amogele ka tsela e nepagetšego theto le ge e le efe yeo ba ka e hwetšago—e le sebaka sa go bontšha gore ba ‘boifa Jehofa’ ka tsela e nepagetšego.

“Tšeelang Thomo ya Lena Godimo”

Guy Pierce wa Sehlopha se Bušago o ile a nea polelo ya thwadi ya lenaneo. O ile a ahlaahla sehlogo se se lego ka mo godimo, a hlalosa gore lentšu “moromiwa” le bolela “motho yo a rongwago go phetha thomo.” O ile a bolela gore ga go makatše gore go na le mehuta e mentši ya baromiwa bao ba nago le dithomo tše di fapafapanego. Ba bantši ba lebiša tlhokomelo go fodišeng malwetši le go nyaka ditharollo tša dipolitiki tša mathata a lefase. O itše: “Lena le fapane.” Bjang?

Ge ba be ba ithuta Beibele, barutwana ba ile ba ithuta mo gontši mabapi le go fodiša malwetši. Ge Jesu a be a tsoša ngwanenyana yo mongwe, batswadi ba gagwe ba ile “ba thaba wa go se kgone go itshwara.” (Mareka 5:42) Ka mo go swanago, ge difofu di be di fodišwa ka mohlolo, di ile tša thaba kudu. Lebaka le lengwe la go dira mehlolo yeo e be e le go re bontšha lehono seo Kriste a tlago go se dira lefaseng le lefsa leo le tlago, e lego nakong yeo ka yona “lešaba le legolo” la batho ba lokilego, bao ba tla phologago bofelo bja tshepedišo ya gona bjale ya dilo, le tlago go fodišwa malwetši le ge e le afe a mmele. (Kutollo 7:9, 14) Baratiwa ba bona, bao ba tlago go ba amogela tsogong, le bona ba tla be ba phetše gabotse mmeleng. Akanya lethabo leo!

Lega go le bjalo, go etša ge Ngwanabo rena Pierce a hlalositše, phodišo ya mmele e ka se tsoge e bile mohuta o bohlokwa kudu wa phodišo. Balwetši bao Jesu a ilego a ba fodiša ba ile ba feleletša ba lwala gape. Bahu bao a ilego a ba tsoša ba ile ba hwa gape. Gaešita le difofu tšeo a ilego a di fodiša mafelelong di ile tša foufala gape, ge di ehwa. Phodišo e bohlokwa kudu e be e le phodišo ya moya yeo Jesu a ilego a e nea. Baromiwa ba Gilead le bona ba na le thomo ya go nea phodišo ya moya. Ba thuša batho gore ba boelane le Tate wa legodimong e le gore ba phele moyeng. Ke feela bao ba fodišitšwego moyeng bao ba tlago go fihlelela pakane ya bophelo bjo bo sa felego. Ngwanabo rena Pierce o itše: “Phodišo yeo ya moya ke yona e neago Modimo theto. E dira gore le atlege bodireding bja lena.”

Dintlha tše Dingwe tše Tharo tše Kgolo tša Letšatši

“Na le e tla ba Letšatši le Lebotse?” Robert Rains wa Komiti ya Lekala la United States o ile a ahlaahla potšišo yeo ye e lego nakong. O ile a kgothaletša barutwana gore ba kgonthišetše gore letšatši le lengwe le le lengwe kabelong ya bona ya boromiwa e ba le lebotse ka go diriša nako ya bona ka bohlale, ka go hlola Lentšung la Modimo ge ba lebeletšane le dipelaelo le ka go ithekga ka Jehofa ka thapelo.

“Na le tla Dira Taelo ya Kgale Gore e be e Mpsha?” Mohlahli wa sekolo sa Gilead Mark Noumair o ile a rotoša potšišo yeo polelong ya gagwe. O ile a ahlaahla lengwalo la 1 Johane 2:7, 8, leo go lona moapostola Johane a boletšego ka  “taelo ya kgale” yeo gape e bego e le “taelo e mpsha.” Bobedi bja tšona di šupa taelo e tee—ya gore balatedi ba Kriste ba ratane ka lerato la go hloka boithati, ka moya wa boikgafo. (Johane 13:34, 35) Taelo yeo e be e le ya kgale ka kgopolo ya gore e be e ile ya newa balatedi ba Jesu nywagasomeng ya pejana ke Kriste ka boyena; lega go le bjalo, e be e le e mpsha ka kgopolo ya gore Bakriste ba be ba lebeletšane le ditlhohlo tše difsa gomme ba swanetše go bontšha lerato ka ditsela tše difsa le tše di feletšego kutšwanyana. Baromiwa le bona ba lebeletšana le maemo a mafsa gomme ba swanetše go ithuta go bontšha lerato ka ditsela tše difsa. Ke’ng seo se ka ba thušago go dira bjalo?

Ngwanabo rena Noumair o ile a eletša ka gore: “Le se ke la fetoga seo le se hloilego.” O ile a lemoša gore ge e ba re bona mokgwa wo re o hloilego, fela re arabela ka wona mokgwa woo, re fetoga seo re se hloilego, e lego tsela ya go ikgobatša. Ka lehlakoreng le lengwe, ge e ba re arabela ditlhohlong tše bjalo ka go nyaka ditsela tše difsa tša go bontšha lerato, re dira gore “seetša sa therešo” se bonege gomme re raka leswiswi la moya.

“Rwala Morwalo.” Mohlahli yo mongwe wa sekolo sa Gilead, Michael Burnett, o ile a ahlaahla sehlogo se. O ile a anega ka batho ba dinageng tša Afrika bao ba rwalago merwalo e boima dihlogong tša bona. Ba diriša kgare, lešela leo le tatilwego leo le bewago hlogong bakeng sa go thuša gore ba se kokonelwe le go se tekateke, e lego seo se dirago gore motho a sepele ka boiketlo. Baromiwa ba Gilead ba tla rwala merwalo e boima ya boikarabelo dikabelong tša bona tša dinageng dišele, eupša ba filwe selo seo se ka swantšhwago le kgare: e lego tlwaetšo e tseneletšego yeo e theilwego Beibeleng. Ge ba dutše ba diriša seo ba ithutilego sona, ba tla kgona go rwala morwalo wa bona gabotse o sa tekateke.

Diphihlelo le Dipoledišano

Tlwaetšo ya Sekolo sa Gilead e akaretša nako yeo e fetšwago bodireding le diphuthego tša kgauswi tša Dihlatse tša Jehofa. William Samuelson, e lego molebeledi wa Lefapha la Dikolo tša Pušo ya Modimo, o ile a anega tše dingwe tša diphihlelo tša barutwana, a diriša sehlogo se se rego, “O se ke wa Khutšiša Seatla sa Gago.” (Mmoledi 11:6) Barutwana ba ile ba dira ditiragatšo go bontšha kamoo ba bego ba le mafolofolo ka gona bodireding, ba hwetša dibaka tša go bolela ditaba tše dibotse difofaneng, mabenkeleng a go jela le mafelong a go tšhela peterole. Ba be ba nea bohlatse ka ntlo le ntlo, dipoledišanong tšeo di sa rulaganyetšwago le ka mangwalo. Ka ntle le pelaelo ga se ba ka ba khutšiša diatla tša bona gomme mafelelo e bile a mabotse kudu.

Setho sa bašomi ba Gilead Kenneth Stovall ka morago o ile a boledišana le banna ba bararo bao ba nago le phihlelo e nabilego ya boromiwa—Barry Hill yo a hlanketšego kua Ecuador le Dominican Republic, Eddie Mobley kua Côte d’Ivoire le Tab Honsberger yo a hlanketšego kua Senegal, Benin le Haiti. Ka moka ga bona ba ile ba ahlaahla gabotse sehlogo se se rego “Leka Jehofa Gomme o Bune Ditšhegofatšo.” (Maleaki 3:10) Ka mohlala, Ngwanabo rena Hill o ile a anega kamoo yena le mosadi wa gagwe ba ilego ba lebeletšana ka gona le go tlwaela tlelaemete ya Ecuador yeo e bego e fetoga go tloga go ya go fiša e bile e tupa marole go ya go ya go fiša e bile e na le maraga. O ile a gopola gore ba tšere nywaga e mebedi le seripa ba hlapela ka dipaketeng. Eupša le ka mohla ga se ba ka ba nagana go tlogela; ba be ba tšea kabelo ya bona e le tšhegofatšo e tšwago go Jehofa. O itše: “E be e le bophelo bja rena.”

Mafelelong a lenaneo, yo mongwe wa barutwana o ile a bala lengwalo le le kgomago le le tšwago sehlopheng se se alogago, leo le hlalosago tebogo e tšwago pelong bakeng sa sekolo. Lengwalo le itše: “Tumelo ya rena e matlafaditšwe kudu, fela re a tseba gore ke gona re sa tlo šoma.” Barutwana ka moka ba ile ba amogela di-diploma tša bona ke moka sehlopha sa abelwa go ya dinageng tše di fapafapanego. Ngwanabo rena Jackson o ile a phetha lenaneo ka go kgonthišetša barutwana gore ba ka letela go bona Jehofa a ba thuša maphelong a bona kua pele, kudukudu ge ba lebeletšane le ditlhohlo. Bohle bao ba bego ba le gona ba ile ba sepela ba na le dikholofelo tše dikgolo le ditebelelo tše di thabišago. Ga go pelaelo gore Jehofa o tla diriša baromiwa ba ba bafsa go dira dilo tše dikgolo tše dibotse.

 [Chart/​Map on page 31]

DIPALOPALO TŠA SEHLOPHA

9 dinaga tše di emetšwego

34,0 palogare ya nywaga

18,6 palogare ya nywaga ba kolobeditšwe

13,1 palogare ya nywaga bodireding bja nako e tletšego

[Mmapa]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Sehlopha se abetšwe dinageng tšeo di bontšhitšwego ka mo tlase

DIKABELO TŠA BOROMIWA

ARGENTINA

ARMENIA

BURKINA FASO

BURUNDI

CONGO (KINSHASA)

CZECH REPUBLIC

HAITI

HONG KONG

INDONESIA

KENYA

LITHUANIA

MALAYSIA

MOZAMBIQUE

NEPAL

PAPUA NEW GUINEA

ROMANIA

SENEGAL

TANZANIA

UGANDA

ZIMBABWE

[Seswantšho go letlakala 31]

Sehlopha se se Alogago sa bo-130 sa Sekolo sa Beibele sa Watchtower sa Gilead

Lelokelelong le le lego ka mo tlase, methaladi e balwa go tloga ka pele go ya ka morago, gomme maina a lokeleditšwe go tloga ka go le letshadi go ya ka go le letona mothalading o mongwe le o mongwe.

(1) Molina, Z.; Bassolino, S.; Alatsis, C.; Arroyo, A.; Niño, L.; Merkling, S.; Clark, M.

(2) Little, C.; Tibaudo, S.; Jakobsson, S.; Moreno, J.; Rodriguez, A.; Lee, K.; Cárdenas, H.; Aguilar, L.

(3) Clairbush, A.; Polley, A.; Caldwell, S.; Adame, J.; Hildebrandt, S.; Shoemaker, I.; Grohman, N.; Galvez, G.

(4) Clark, J.; Bassolino, A.; Packham, K.; Adame, J.; Knaus, M.; Niño, M.; Moreno, R.; Galvez, J.

(5) Rodriguez, D.; Geynes, M.; Molina, J.; Aguilar, A.; Alatsis, I.; Manno, A.; Grohman, R.; Packham, J.

(6) Geynes, S.; Cárdenas, M.; Arroyo, C.; Manno, C.; Merkling, J.; Lee, H.; Clairbush, X.; Jakobsson, P.

(7) Little, J.; Hildebrandt, B.; Shoemaker, M.; Knaus, K.; Caldwell, J.; Tibaudo, F.; Polley, C.