Batamela Kgauswi le Modimo

O Gopola Gore “re Lerole”

“KE BE ke sa dumele gore Jehofa o be a ka ntebalela ka mo go feletšego e bile ke nagana gore ke tla rwala morwalo wo bophelo bja ka ka moka.” Se ke seo se ngwadilwego ke mosadi yo mongwe wa Mokriste mabapi le diphošo tša gagwe tša nakong e fetilego. Letswalo le molato ruri ke morwalo o boima. Lega go le bjalo, Beibele e nea khomotšo yeo e ka fokotšago bohloko bja badiradibe bao ba itsholago. Ela hloko mantšu a mopsalme Dafida ao a lego go Psalme 103:8-14.

Dafida o be a tseba gore “Jehofa o a gaugela” e bile ga a “dule a nyaka diphošo” tša rena. (Ditemana 8-10) Ge Modimo a hwetša motheo wa go bontšha kwelobohloko, o dira bjalo ka mo go feletšego le ka pelo e tšhweu. Dafida, e lego sereti sa sethakga, o diriša ditshwantšhanyo tše tharo go swantšha kgaugelo e kgolo yeo Modimo a re bontšhago yona.

“Go etša ge magodimo a phagametše lefase, le botho bja gagwe ke bjo bo bogolo ka tsela yeo go bao ba mmoifago.” (Temana 11) Ge re lebelela godimo leratadimeng la bošego, re ka se kwešiše bokgole bjo bogolo bjo bo lego gona magareng ga lefase le legodimo leo le tletšego dinaledi. Dafida o gatelela bogolo bja kgaugelo ya Jehofa, e lego karolo ya lerato la gagwe. Seithuti se sengwe se re kgaugelo ye ke ya batho ‘bao ba boifago’ Modimo—bao ba “hlomphago matla a gagwe a taolo ka boikokobetšo le ka go tšwa pelong.”

“Go etša ge bohlabela bo le kgole le bodikela, le dikarogo tša rena o di lahletše kgole le rena ka tsela yeo.” (Temana 12) Bjo ke bokgole bjo bokaaka’ng? Ke bokgole bjo bo fetago bjoo re ka bo naganago. Puku e nngwe ya ditšhupetšo tša Beibele e re: “Fofa go fihla bokgoleng bjoo o ka bo akanyago gomme ge o dutše o phatša lefaufau o lebile bohlabela, o ba kgole kudu le bodikela ge o dutše o fofa.” Dafida mo o re botša gore ge Modimo a re lebalela dibe tša rena, o di lahlela kgole kudu le rena go feta kamoo re ka naganago.

“Go etša ge tate a gaugela bana ba gagwe, le Jehofa o gaugetše bao ba mmoifago.” (Temana 13) Bjalo ka ge Dafida e be e le tate, o be a tseba kamoo tate yo lerato a ikwago ka gona pelong ya gagwe. Tate yo bjalo o tutueletšega go bontšha bana ba gagwe kwelobohloko, kudukudu ge ba ekwa bohloko. Dafida o re kgonthišetša gore tatago rena wa legodimong o gaugela bana ba gagwe, kudukudu ge dipelo tša bona tšeo di itsholago e le tše “robegilego le [tše] setlegilego” ka baka la dibe tša bona.—Psalme 51:17.

Ka morago ga ditshwantšhanyo tše tše tharo, Dafida o utolla seo se tutueletšago Jehofa go gaugela batho ba sa phethagalago ka gore: “Yena o tseba gabotse kamoo re bopegilego ka gona, a gopola gore re lerole.” (Temana 14) Jehofa o a tseba gore re dibopiwa tšeo di dirilwego ka lerole, tšeo di nago le mafokodi. Ka ge a ela hloko tshekamelo ya rena ya tlhago ya sebe, Jehofa o “ikemišeditše go lebalela”—ge feela re itshola go tšwa pelong.—Psalme 86:5.

Na mantšu a Dafida a mabapi le kgaugelo ya Jehofa a go kgoma pelo? Mosadi yo a tsopotšwego matsenong o ile a ithuta seo Beibele e se bolelago mabapi le go ikemišetša ga Modimo go lebalela gomme o ile a tutueletšega go bolela gore: “Ke thoma go ikwa nka kgona go batamela Jehofa gomme ke kwa ke imologile.” * Ke ka baka la’ng o sa ithute ka mo go oketšegilego mabapi le kgaugelo ya Modimo le kamoo o ka e hwetšago ka gona? Mohlomongwe le wena o tla ikwa o imologile.

Mmalo wa Beibele o šišintšwego bakeng sa August:

▪ Dipsalme 87-118

[Mongwalo wa tlase]

[Ntlhakgolo go letlakala 13]

“Ke thoma go ikwa nka kgona go batamela Jehofa gomme ke kwa ke imologile”