Thutong ya gagwe ya Thabeng, Jesu o boditše balatedi ba gagwe gore: “Lena le letswai la lefase, eupša ge letswai le felelwa ke matla a lona, go toka ga lona go tla tsošološwa bjang? Ga le sa dirišetšwa selo le ge e le sefe ge e se go lahlelwa ka ntle gore le gatakelwe ke batho.” (Mateo 5:13) Letswai ke sethibela-go-bola. Lega go le bjalo, go ka direga gore papišo ya Jesu e be e era gore barutiwa ba gagwe ba be ba ka kgona e bile ba swanetše go šireletša ba bangwe gore ba se ke ba bola boitshwarong le moyeng.

Lega go le bjalo, ge The International Standard Bible Encyclopedia e bolela ka tlhaloso ya Jesu ya mabapi le go tapa ga letswai, e re: “Letswai leo le tšwago tikologong ya Lewatle le le Hwilego ge e le gabotse le be le tswakane le diminerale tše dingwe; ka gona letswai le be le ka tološwa motswakong woo gomme gwa šala selo seo se sego bose.” Ka gona, ke mo go kwagalago gore Jesu o hlalositše gore mašalela ga a “sa dirišetšwa selo le ge e le sefe ge e se go lahlelwa ka ntle gore [a] gatakelwe ke batho.” Saeklopedia e oketša ka gore: “Gaešita le ge go se seke ga letswai leo le tšwago Lewatleng le le Hwilego go be go dira gore le phalwe ke matswai a mawatleng a mantši, go hwetšagala ga lona gabonolo (le be le ka fo olelwa lebopong) go be go dira gore e be letswai leo le dirišwago Palestina.”

Jesu o boletše ka papišo ya mosadi yoo ka morago ga go lahlegelwa ke e tee ya diterakema tša gagwe tše lesome a ilego a tšhuma lebone gomme a swiela ntlo ya gagwe ka kelohloko go fihlela a e hwetša. (Luka 15:8-10) Mehleng ya Jesu, terakema e be e nyakile e lekana le mogolo wa letšatši, ka gona go timelelwa ke tšhelete e be e le tahlegelo e kgolo. Lega go le bjalo, papišo yeo a e hlalositšego e be e le therešo bophelong ka mabaka a mangwe.

Dipuku tše dingwe tša ditšhupetšo di bontšha gore basadi gantši ba be ba diriša ditšhelete tša tšhipi e le dilo tša go kgabiša. Ka gona, mohlomongwe Jesu o be a šupa tšhelete ya tšhipi yeo e bego e le mpho ya mojabohwa goba e le karolo ya magadi ao a ntšheditšwego mosadi. Go sa šetšwe gore go be go le bjalo goba go se bjalo, ke mo go kwagalago gore go lahlegelwa ga mosadi ke e tee ya ditšhelete tša gagwe tše lesome tša tšhipi go be go ka mo dira gore a tshwenyege kudu ka go nyaka go e hwetša.

Go oketša moo, dintlo tša batho ba tlwaelegilego ba mehleng ya Jesu di be di dirilwe ka tsela ya gore di se tsene seetša le phišo ka mo go ka kgonegago. Di be di ena le mafasetere a sego kae, ge e ba a be a le gona. Mabato gantši a be a alwa ka mahlaka goba dikotana tše di omilego tša dimela tše di fapafapanego. Ge tšhelete ya tšhipi e be e ka wela fase, go be go ka ba thata go e hwetša. Mohlalosi yo mongwe o re: “Ka gona, ge selo se senyenyane bjalo ka tšhelete ya tšhipi se be se ka timela lefelong le bjalo, seetša sa lebone le go swiela ka ntlong, e be e le ditsela tše kaonekaone tša go se nyaka.”