E BE e le mesong e tlwaelegilego nageng ya Afrika Bodikela. Moyeng go be go kwala monko wa mero yeo e kgabakgabago le wa reise. Basadi ba be ba feta ba rwele merwalo e megolo kudu dihlogong ba sa e swareletša. Modumo wa lesego leo le tšwago pelong o be o tswakane le kwano e matla kudu. Gateetee ke ge letšatši le thoma go fiša wa go ntšha kwena ka bodibeng.

Sehlopha sa bana ge se bona Yovo, goba motho yo mošweu, ka tlwaelo se ile sa thoma go opela le go bina. Koša yeo e be e thoma ka gore “Yovo, Yovo, bon soir” gomme e feleletša ka mantšu a rego: “Go ka ba bjang ge o ka re nea mpho ka ge re go opeletše le go go binela?” Mošemanyana yo mongwe yena o be a sa opele. Ge ke le gare ke sepela, o ile a ntatela gomme a thoma go dira ditšhupetšo ka diatla. Go be go bonala eka ke polelo ya diatla. Ge ke le United States, ke be ke ithutile go peleta ka Polelo ya Diatla ya Amerika (ASL), eupša Benin ke naga yeo go yona go bolelwago Sefora.

Ke ile ka peleta ka thata ditlhaka tše seswai tša leina la ka. Mošemanyana o ile a myemyela ka lethabo. O ile a ntshwara ka seatla gomme a ntshepediša ditseleng tše disesane a nkiša gagabo, e lego ntlong e tlwaelegilego ya diphapoši tše pedi ya go agwa ka ditena tša samente. Ba lapa labo ba ile ba ntikologa. Batho ka moka ba be ba bolela polelo ya diatla. Bjale go be go tla dirwa’ng? Ke ile ka peleta leina la ka ka diatla ke moka ka ngwala fase gore ke nna moromiwa yo a rutago Beibele le gore ke be ke tla boa. Baagišani ba bangwe bao ba kgonago go bolela ba ile ba re tlatša, ka moka ba dumela ka dihlogo. Ke ile ka nagana gore: ‘Ruri ke Itsentše Ditabeng!

Ge ke boetše gae ke ile ka nagana gore, ‘Go swanetše go ba go ena le motho yo a ka thušago batho ba go ithuta ka kholofetšo ya Modimo e rego: “Ditsebe tša difoa di tla thibologa.”’ (Jesaya 35:5) Ke ile ka dira nyakišišo e itšego. Go balwa ga batho mo go bego go sa tšwa go dirwa go be go utolotše gore go be go ena le difoa gotee le batho ba sa kwego gabotse ba 12 000 bao ba tsebjago Benin. Ke ile ka tomola mahlo ge ke utolla gore dikolong tša difoa go be go dirišwa ASL, e sego Polelo ya Diatla ya Fora. Eupša ke ile ka nyama kudu ge ke hwetša gore go be go se le o tee wa Dihlatse tša Jehofa yo a bego a tseba ASL mo. Ke ile ka botša Hlatse ya moo ka go fegelwa ka re: “Ke be ke duma eka motho yo a tsebago ASL a ka tla a thuša.” E ile ya araba ka gore: “Akere wena o gona?” Ruri Hlatse yeo e be e nepile! Ke ile ka otara puku ya go nea batho dikeletšo le diDVD  tša ASL tšeo di gatišišwego ke Dihlatse tša Jehofa. Dithapelo tša ka tša go kgopela thušo di ile tša arabja ge Hlatse yeo e bego e tseba ASL gabotse e be e tloga Cameroon e hudugela Benin.

Batho ba bantši ba ile ba kwa gore ke be ke ithuta polelo ya diatla. Ke ile ka botšwa gore ke etele Brice, mothadi wa diswantšho yo a bolelago polelo ya diatla. Lefelo leo a šomelago go lona, leo le agilwego ka matlakala a mepalema ao a rokagantšwego, le be le tsena moyana o lapološago phišong e nago le monola. Leboto le be le na le mebalabala ka ge a tšere nywaga e mentši a phumola diporatšhe tša gagwe go lona. O ile a phumola ditulwana tše mmalwa gomme a ntsepelela ka mahlong, a emetše gore ke thome. Ke ile ka tsenya DVD ka gare ga sedirišwa sa ka se senyenyane sa go bapala diDVD. O ile a gogela setulwana sa gagwe kgauswi le sekirini se senyenyane. O ile a dira ditšhupetšo a re: “Ke a kwešiša! Ke a kwešiša!” Bana ba motseng ba ile ba bokana gomme ba tamola melala gore ba bone. Yo mongwe o ile a goeletša a re: “Ke ka baka la’ng ba bogetše filimi yeo e se nago modumo?”

Nako le nako ge ke be ke boela go Brice, batho bao ba bego ba kgobokanela DVD ba be ba oketšega. Go se go ye kae ke ge Brice le ba bangwe ba thoma go tla dibokeng tša rena tša Bokriste. Go leka go ba tolokela go ile gwa nthuša go gatela pele. Ge sehlopha seo se dutše se gola, ba bangwe ba ile ba ba ba thoma go ntsoma. Ka mohlala, koloi ya ka ya kgale e ile ya ba le medumo e sa tlwaelegago ge e be e tsena ka dikoting tseleng ge ke be ke leka go efoga dipudi le dinku tšeo di timetšego. Ke ge gateetee ke ekwa koloi e itiwa ka morago. Ke ile ka ipotša gore, ‘Joo nna joo, e se ke ya ba e le gore e senyegile gape!’ Aowaa, e be e le monna wa sefoa yo a bego a kitimiša koloi ya ka a leka ka gohle gore ke mmone—ka go itia koloing!

Go ile gwa ba le dihlopha tša ASL metseng e mengwe. Ge go be go rulaganywa mananeo a polelo ya diatla kopanong ya rena e kgolo ya ngwaga le ngwaga, ke ile ka ba gare ga bao ba ilego ba kgopelwa gore ba toloke. Ge ke be ke namela sethaleng ke letile seboledi gore se thome, ke ile ka nagana ka nakwana morago kua ge ke be ke thoma kabelong ya ka. Ke be ke fela ke nagana gore: ‘Nka dira eng se se oketšegilego ke le moromiwa Afrika?’ Ge ke lebelela batheetši, ke ile ka tseba gore ke hweditše karabo—ke go ba moromiwa yo a thušago difoa. Ga ke sa ipotša gore: ‘Ruri ke itsentše ditabeng!’