Herman le Linda ba thabela gore ba ile ba kopana. Linda, yo a ilego a hlalana le monna wa gagwe wa pele, e bile o bitša Herman gore ke “monna gare ga banna.” Lega go le bjalo, ba dumela gore lenyalo la bobedi le ka tliša ditlhohlo tšeo di sa kago tša ba gona lenyalong la pele. *

Ge e ba o tsene lenyalong gape, o ikwa bjang ka lenyalo la gago la bobedi? Mosadi yo a bitšwago Tamara, yo a ilego a nyalwa ka morago ga nywaga e meraro a hlalane le monna wa gagwe, o re: “Ge o tsena lenyalong la mathomo, o ba le maikwelo a kgethegilego a gore lenyalo la gago e tla ba la sa ruri. Eupša ge o tsena lenyalong la bobedi, o ka no se be le maikwelo ao, ka ge o dula o gopola gore lenyalo la gago la pele le ile la phuhlama.”

Lega go le bjalo, banyalani ba bantši ba hweditše lethabo la kgonthe le leo le swarelelago ka morago ga  ge ba tsene lenyalong la bobedi. Ba ile ba dira gore manyalo a bona a atlege—gomme le wena o ka atlega! Bjang? Ela hloko ditlhohlo tše tharo tše tlwaelegilego le kamoo melao ya motheo ya Beibele e ka go thušago ka gona go lebeletšana le tšona. *

Ellen yo a dulago Afrika Borwa o re: “Ga ke kgone go fo lebala seo ke se gopolago ka lenyalo la ka la pele, kudukudu ge re etela mafelo ao nna le monna wa ka wa pele re bego re eya maikhutšong go ona. Ka dinako tše dingwe ke feleletša ke bapiša monna yo ke nago le yena le wa pele.” Ka lehlakoreng le lengwe, ge e ba molekane wa gago a ile a ba lenyalong, o ka tenwa ke ge a dula a bolela ka lenyalo leo.

TŠHIŠINYO: Amogela gore ga go kgonege gore wena goba molekane wa gago le fo lebala ka manyalo a lena a pele, kudukudu ge e ba a ile a swarelela nywaga e mmalwa. Ge e le gabotse, batho ba bangwe ba dumela gore ka phošo ba ile ba bitša balekane ba bona ka maina a balekane ba pele! O ka lebeletšana bjang le boemo bjo goba a mangwe a swanago le bjona? Beibele e eletša ka gore: “Lekang gore le kwešišane.”—1 Petro 3:8, New Century Version.

O se ke wa thibela gore go bolelwe ka lenyalo la pele ka baka la lehufa. Ge e ba molekane wa gago a ikwa a nyaka go bolela ka bophelo bja gagwe le molekane wa pele, mo theetše ka kwelobohloko. Le gona, o se ke wa akgofela go phetha ka gore o go bapiša le molekane yoo. Ian yo a nyetšego gape nywaga e lesome e fetilego o re: “Mosadi wa ka Kaitlyn le ka mohla o be a sa ke a iletša go bolela ka mosadi wa ka yo a hlokofetšego. Go e na le moo, o be a lebelela seo e le tsela ya gore a ithute seo ke lego sona lehono.” E bile o ka lemoga gore dipoledišano tše bjalo di tla go thuša go hlagolela segwera sa kgauswi le molekane wa gago o mofsa.

Ela hloko dika tše dibotse le tša moswananoši tša molekane wa gago wa gona bjale. Ke therešo gore molekane wa gago a ka ba a se na dika tše itšego goba dilo tšeo a di kgonago tša go swana le tša molekane wa pele. Eupša molekane wa gago wa gona bjale a ka ba a mo phala dilong tše dingwe. Ka gona, tiiša motheo wa lenyalo la gago la gona bjale, “e sego ka go [bapiša] le motho yo mongwe,” eupša ka go naganišiša le go leboga seo o se ratago ka molekane wa gago. (Bagalatia 6:4) Monna yo a bitšwago Edmond, yo a nyetšego gabedi, o bea taba ka tsela ye: “Ka ge bagwera ba babedi ba ka se swane, le lenyalo la bobedi le ka se swane le la pele.”

O ka lekalekanya bjang dilo tše dibotse tšeo o di gopolago ka lenyalo la gago la pele le bophelo bjo o bo thomilego le molekane wa gago o mofsa? Jared o re: “Ka nako e nngwe ke ile ka hlalosetša mosadi wa ka gore lenyalo la ka la pele le be le swana le puku e botse yeo ke e ngwadilego le mosadi wa ka wa pele. Ke fela ke e bula gomme ke e bala gore ke gopole diphihlelo tša rena tše kgahlišago. Eupša ga ke phele ka gare ga puku yeo. Go e na le moo, nna le mosadi wa ka o mofsa re ngwala puku ya rena gotee, gomme ke gona moo ke phelago ka lethabo gona bjale.”

Javier yo a nyetšego gape ka morago ga nywaga e tshela a hlalane le mosadi wa gagwe, o re: “Go tšere nako e itšego re nyalane ge mosadi wa ka a be a ikwa eka ba bangwe ba bagwera ba ka ba a mo lekodišiša.” Monna yo a nyetšego yo a bitšwago Leo o be a le boemong bjo bo fapanego. O re: “Batho ba bangwe ba be ba botša mosadi wa ka kamoo ba bego ba rata monna wa gagwe wa pele le go mo hlologela—ke dutše ke le gona!”

TŠHIŠINYO: Leka go ipea boemong bja bagwera ba gago. Ian yo a tsopotšwego pejana o re: “Ke nagana gore ka dinako tše dingwe bagwera ba kgale ba kwešwa bohloko kudu le go thatafalelwa ke go tlwaelana le molekane o mofsa yo a tšeetšego wa pele legato go banyalani bao ba bego ba ba tseba.” Ka gona ‘e ba yo a lekalekanego, yo a bontšhago boleta bjohle go batho ka moka.’ (Tito 3:2) Nea bagwera ba gago le ba lapa leno nako ya gore ba tlwaele. Ka ge lenyalo la gago le fetogile, le bagwera ba gago ba ka fetoga. Javier, yo a tsopotšwego pejana, o re ge nako e dutše e eya, yena le mosadi wa gagwe ba ile ba tsošološa  segwera le bagwera ba bona ba kgale. O tlaleletša ka gore: “Eupša re leka le go dira bagwera ba bafsa, gomme seo le sona se a thuša.”

Naganela maikwelo a molekane wa gago ge o fetša nako o na le bagwera ba kgale. Ka mohlala, ge go ka direga gore go bolelwe ka lenyalo la gago la pele, diriša temogo le kahlolo e botse gore molekane wa gago a se ke a ikwa a phaelwa ka thoko. Seema sa Beibele se re: “Ge e ba motho a ka bolela a se a nagana, mantšu ao a ka hlaba bjalo ka tšhoša. Eupša motho yo bohlale o ba šedi ka dilo tšeo a di bolelago. Mantšu ao a ka fodiša go hlabega moo.”—Diema 12:18, Holy Bible—Easy-to-Read Version.

Andrew yo a ilego a tlogelwa ke mosadi wa gagwe wa pele, o re: “Ke be ke dula ke boifa gore ke tla hlanogelwa gape.” Ka morago, o ile a nyala mosadi wa gagwe o mofsa e lego Riley. Andrew o re: “Gantši ke be ke ipotšiša ge e ba ke tla ka ke dire dilo gabotse go swana le monna wa Riley wa pele. Le gona ke be ke tshwenyegile mabapi le ge e ba a be a tla mpona ke sa swanelege ke moka a ntlogela gomme a ratana le monna yo mongwe.”

TŠHIŠINYO: Boledišana ka bolokologi le molekane wa gago ka dilo tšeo di go tshwenyago. Beibele e re: “Maano a a fela ge batho ba sa ntšhetšane sa mafahleng.” (Diema 15:22) Go ntšhetšana sa mafahleng mafelelong go thušitše Andrew le Riley gore ba botane. Andrew o re: “Ke ile ka botša Riley gore le ka mohla nka se diriše tlhalo e le tsela e bonolo ya go tšhabela mathata gomme Riley le yena o ile a nkgonthišetša ka seo. Ganyenyane-ganyenyane ke ile ka thoma go mmota ka mo go feletšego.”

Ge e ba molekane wa gago wa gona bjale a ile a hlanogelwa lenyalong la pele, dira sohle seo o ka se kgonago gore a go bote. Ka mohlala, Michel le Sabine, bao manyalo a bona a pele a fedišitšwego ke tlhalo, ba ile ba kwana gore ba botšane ge e ba ba ile ba boledišana goba ba kopana le balekane ba bona ba pele. Sabine o re: “Kwano ye e ile ya dira gore re ikwe re šireletšegile.”—Baefeso 4:25.

Manyalo a mantši a bobedi a atlegile, le la gago le ka atlega. Go ba gona, mohlomongwe o itseba gakaone ge o ipapiša le nakong ya ge o be o tsena lenyalong la mathomo. Andrew yo a tsopotšwego pejana o re: “Ke homoditšwe kudu ke go nyalana le Riley. Ka morago ga nywaga e 13 re nyalane, re na le tswalano ya kgauswi kudu—yeo le ka mohla re sa nyakego e re lahlegela.”