Bethania e be e le motse o monyenyane wo o bego o le bokgole bja dikhilomithara tše tharo go tloga Jerusalema. (Johane 11:18) Go ile gwa ba le masetlapelo gona motsaneng woo dibeke tše mmalwa pele ga lehu la Jesu. Latsaro, e lego yo mongwe wa bagwera ba Jesu ba paale, o ile a babja go sa letelwa ke moka a hwa.

Ge Jesu a be a thoma go kwa ditaba tšeo, o ile a botša barutiwa ba gagwe gore Latsaro o be a robetše gomme o ikemišeditše go mo tsoša. (Johane 11:11) Eupša barutiwa ba Jesu ba be ba sa mo kwešiše, ka gona Jesu o ile a ba botša ka go lebanya gore: “Latsaro o hwile.”—Johane 11:14.

Matšatši a mane ka morago ga poloko, Jesu o ile a fihla Bethania gomme o be a nyaka go homotša Mareta, kgaetšedi ya mohu. Mareta o itše: “Ge nkabe o be o le mo, kgaetšedi ya ka nkabe a se a hwa.” (Johane 11:17, 21) Jesu o mo arabile ka gore: “Ke nna tsogo le bophelo. Yo a dumelago go nna, gaešita le ge a ka hwa, o tla phela.”—Johane 11:25.

E le ge a bontšha gore mantšu a gagwe ga se a lefeela, Jesu o ile a batamela lebitla ke moka a goeletša ka gore: “Latsaro, tšwaa.” (Johane 11:43) Bao ba bego ba bogetše ba ile ba makatšwa ke ge monna yo a bego a hwile a etšwa.

Jesu o be a tsošitše batho ba babedi nakong e fetilego. Ka lekga le lengwe o ile a tsoša mosetsana yo monyenyane yo a bego a hwile, e lego morwedi wa Jairo. Pele ga ge Jesu a ka mo tsoša, o ile a mo hlalosa e le yo a robetšego.—Luka 8:52.

Ela hloko gore ge Jesu a be a bolela ka lehu la Latsaro le morwedi wa Jairo, o ile a swantšha lehu le boroko. Yeo ke tshwantšhanyo e botse. Ka baka la’ng? Go robala ke boemo bja go se kwe selo gomme go fetiša gabotse kgopolo ya go khutša bohloko le tlaišego. (Mmoledi 9:5; bona lepokisi le le sepedišanago le sehlogo se le le rego,  “Lehu le Swana le Boroko bjo Bogolo.”) Barutiwa ba pele ba Jesu ba be ba kwešiša  gabotse boemo bja bahu. Encyclopedia of Religion and Ethics e re: “Balatedi ba Jesu ba be ba tšea lehu le swana le boroko, gomme lebitla le swana le lefelo la go khutša . . . bakeng sa bao ba hwetšego tumelong.” *

Re homotšwa ke go tseba gore bahu ba robetše lebitleng e bile ga ba tlaišege. Ka go re’alo, re a tseba gore go direga eng ka rena ge re ehwa gomme ga go sa nyakega gore re tšhoge.

Le ge re ipshina ka boroko bošego, ke mang yo a nyakago go robalela sa ruri? Re na le kholofelo efe mabapi le gore bahu bao ba robetšego mabitleng ba tla buša ba phela—ka ge go bile bjalo ka Latsaro le morwedi wa Jairo?

Mopatriareka Jobo o ile a botšiša potšišo yeo ge a be a le kgauswi le go hwa. O botšišitše gore: “Ge e ba monna a ehwa, na a ka buša a phela?”—Jobo 14:14.

Ge a be a bolela le Modimo Ramatlaohle, Jobo o ile a araba potšišo ya gagwe ka noši ka gore: “O tla bitša, gomme nna ke tla go araba. O tla hlologela modiro wa diatla tša gago.” (Jobo 14:15) Jobo o be a kgodišegile gore Jehofa o be a hlologela letšatši leo ka lona A tlago go tsoša mohlanka wa Gagwe yo a botegago. Na Jobo o be a duma selo seo se bego se ka se kgonege? Le gatee.

Batho bao Jesu a ba tsošitšego ba neile bohlatse bjo bo lego molaleng bja gore Modimo o neile Jesu matla a go fenya lehu. Ge e le gabotse, Beibele e bolela gore ga bjale Jesu o na le “dinotlelo tša lehu.” (Kutollo 1:18) Ka gona Jesu o tla notlolla dikgoro tša lebitla, go swana le ge a ile a laela gore leswika la lebitla la Latsaro le pshikološwe.

Beibele e bolela gantši ka kholofetšo ye ya tsogo. Morongwa o ile a kgonthišetša moporofeta Daniele gore: “O tla khutša, eupša wa tlo emelela gore o tšee kabelo ya gago bofelong bja matšatši.” (Daniele 12:13) Jesu o ile a botša Basadutsei, e lego baetapele ba Bojuda bao ba bego ba ganetša kholofetšo ya tsogo, gore: “Le fošitše, ka baka la gore ga le tsebe Mangwalo gaešita le matla a Modimo.” (Mateo 22:23, 29) Moapostola Paulo o itše: “Ke na le kholofelo go Modimo . . . ya gore go tla ba le tsogo ya ba lokilego gotee le ba sa lokago.”—Ditiro 24:15.

Tsogo ye ya ba lokilego gotee le ba sa lokago e tla direga neng? Morongwa o boditše Daniele yo a lokilego gore o be a tlo tsoga “bofelong bja matšatši.” Ka mo go swanago, Mareta o be a dumela gore kgaetšedi ya gagwe, Latsaro, o be a tla “tsoga tsogong letšatšing la mafelelo.”—Johane 11:24.

Beibele e kgokaganya ‘letšatši le la bofelo’ le pušo ya Mmušo wa Kriste. Paulo o ngwadile gore: “Gobane o [Kriste] swanetše go buša e le kgoši go fihla ge Modimo a beile manaba a gagwe ka moka tlase ga dinao tša gagwe. Lehu ke lenaba leo le tlago go fedišwa mafelelong.” (1 Bakorinthe 15:25, 26) Le ke lebaka le matla la gore re rapelele gore Mmušo wa Modimo o tle le gore thato ya Modimo e dirwe mo lefaseng. *

Ka ge Jobo a be a tseba se gabotse, thato ya Modimo ke go tsoša bahu. Ge letšatši leo le fihla, lehu le tla fedišwa e le ka kgonthe. Le ka mohla go ka se be le yo a tlago go ipotšiša gore, ‘Na lehu ke mafelelo a dilo ka moka?’