GO KILE gwa ba le sehlogo sa ditaba se se kgahlišago kudu seo se bego se le kuranteng ya kua Korea yeo e bitšwago The Chosun Ilbo. Se be se na le potšišo e rego: “‘Shim Cheong wa Pelo e Botse,’ Yoo a Bego a sa Tsebe Selo ka Jesu—Na o Ile Diheleng?”

Sehlogo seo se be se galefiša ba bangwe ka ge Shim Cheong e be e le kgarebe e ratwago ya nonwane ya Makorea yeo e ilego ya gafa bophelo bja yona go thuša tatago yona wa sefofu. Go theoša le nywaga, e be e hlompšha kudu ke batho ba bantši. Ge e le gabotse, kua Korea, Shim Cheong o lebelelwa e le mohlala o mobotse wa go ba morwedi wa go ikgafa.

Go batho ba bantši, kgopolo ya gore motho yo bjalo o tla tlaišwa mollong wa dihele ka ge e be e se Mokriste yo a kolobeditšwego e be e sa loka e bile e be e kgopiša. Go ba gona, taba ye e swanetše go ba e diregile kgale pele molaetša wa Kriste o ka bolelwa motsaneng wa gabo.

Sehlogong se sa kuranta go be go ena le poledišano le moruti. O ile a botšišwa gore ge e ba batho ka moka bao ba hwilego ba sa tsebe selo ka Jesu ba lahletšwe mollong wa dihele. O arabile ka gore: “Ga re tsebe. Re fo ipotša gore go na le Seo Modimo a Tlago go se Dira [ka batho ba bjalo].”

The New Catholic Encyclopedia e re: “Kolobetšo e bohlokwa gore motho a phološwe. Go etša ge Kriste a boletše, ntle le gore motho a tswalwe gape ka meetse le Moya o Mokgethwa, a ka se tsene Mmušong wa Modimo (Jn 3.5).” Ka baka la se, ba bangwe ba dumela gore bao ba hwilego ba sa kolobetšwa ba lahlelwa mollong wa dihele goba ba tlaišwa ka tsela e itšego ka morago ga lehu.

Lega go le bjalo, go na le batho ba bangwe ba bantši bao ba rego tumelo yeo ga e kwagale. Batho ba dimilione ba hwile ba sa tsebe selo ka Beibele. Na ba swanelwa ke tlaišo ya ka mo go sa felego? Beibele e re’ng ka taba ye?

Beibele e bolela ka mo go kwagalago gore Modimo ga se a hloya bao ba bego ba phela ba sa tsebe melao ya gagwe. Ditiro 17:30 e re kgonthišetša ka gore: “Modimo o hlokomologile dinako tša go se tsebe mo go bjalo.” Ka gona, Beibele e holofetša eng ka bao ba hwilego ba sa hwetša sebaka sa go ithuta ka Modimo?

Karabo ya potšišo ye e ka hwetšwa tseleng yeo Jesu a ilego a araba sesenyi seo se bego se kokotetšwe kgauswi le yena. Monna yoo o ile a re go Jesu: “O nkgopole ge o tsena Mmušong wa gago.” Jesu o ile a araba ka gore: “Ruri ke go botša lehono, o tla ba le nna Paradeiseng.”—Luka 23:39-43.

Na Jesu o be a holofetša monna yo gore o tla ya legodimong? Aowa. Monna yo o be a sa “tswalwa gape” ka meetse le moya, e lego senyakwa sa pele sa go tsena Mmušong wa magodimo. (Johane 3:3-6) Go e na le moo, Jesu o be a holofetša monna yoo gore o tla phela gape Paradeiseng. Ka ge e be e le Mojuda, monna yo o swanetše go ba a be a tlwaelane le go phela Paradeiseng—serapeng sa Edene—seo se hlaloswago pukung ya pele ya Beibele. (Genesi 2:8) Kholofetšo ya Jesu e neile monna yo kholofelo ya go tsošetšwa Paradeiseng yeo e tlago go tsošološwa lefaseng.

Ge e le gabotse, Beibele e holofetša “tsogo ya ba lokilego gotee le ba sa lokago.” (Ditiro 24:15) “Ba sa lokago” ke bao ba bego ba sa phele ka melao ya Modimo ya go loka ka ge ba be ba sa tsebe thato ya Modimo. Jesu o tla tsoša sesenyi sa go se loke seo se boletšego le yena, gotee le ba dimilione goba mohlomongwe ba dibilione bao ba hwilego ba sa tsebe Modimo. Ke moka, lefaseng la Paradeise, ba tla rutwa melao ya Modimo gomme ba tla newa sebaka sa go bontšha gore ba rata Modimo ka go kwa ditaelo tša gagwe.

Ge ba sa lokago ba tsošwa, na ba tla ahlolwa go ya ka ditiro tša bona tša nako e fetilego? Aowa. Baroma 6:7 e re: “Yo a hwilego o hunologile sebeng sa gagwe.” Ba sa lokago ba tla be ba lefeletše dibe tša bona ka go hwa. Ka gona, ba tla ahlolwa go ya ka seo ba se dirago ka morago ga tsogo ya bona, e sego go ya ka mediro ya bona ya pele ba ehwa. Ba tla holega bjang?

Ka morago ga tsogo, ba sa lokago ba tla ba le sebaka sa go ithuta melao ya Modimo, yeo e tlago go utollwa ge go bulwa mangwalo a go phuthwa a seswantšhetšo. Ke ka nako yeo moo ba tlago go ahlolwa ‘go ya ka mediro ya bona,’ go bona ge e ba ba tla kwa melao ya Modimo goba aowa. (Kutollo 20:12, 13) Go bontši bja bao ba sa lokago, se e tla ba e se sebaka sa bobedi, eupša e tla ba e le sebaka sa bona sa pele sa kgonthe sa gore ba hwetše bophelo bjo bo sa felego mo lefaseng ka go ithuta le go dira thato ya Modimo.

Thuto ye ya Beibele e thušitše ba bantši go ba le tumelo gape go Modimo. Yeong Sug e bile yo mongwe wa batho ba bjalo. O godišitšwe e le Mokatholika yoo a ineetšego. Ditho tša lapa labo e be e le baruti. Ka ge a be a rata go ba moitlami wa mosadi, o ile a ya go dula moo go dulago basadi ba baitlami. Ka morago, o ile a tlogela ka ge a be a nyamišitšwe ke seo a se bonego moo. Go feta moo, o be a sa kgone go kwešiša thuto ya mollo wa dihele ka baka la gore o be a nagana gore go tlaiša batho mollong wa dihele ga go bontšhe toka goba lerato.

Ke moka, Hlatse ya Jehofa e ile ya bontšha Yeong Sug mantšu a a tšwago ka Beibeleng: “Bao ba phelago ba a tseba gore ba tlo hwa; eupša ge e le bahu ga ba tsebe selo le gatee.” (Mmoledi 9:5) Hlatse yeo e mo thušitše go bona gore bagologolo ba gabo ga ba tlaišwe mollong wa dihele. Go e na le moo, ba robetše lehung, ba emetše tsogo.

Ka ge a tseba gore batho ba bantši ga se ba ka ba kwa therešo e tšwago Beibeleng, Yeong Sug o ile a tšeela godimo mantšu a Jesu ao a hwetšwago go Mateo 24:14 a rego: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.” Ga bjale o bolela ditaba tše dibotse le go botša ba bangwe ka kholofelo ya gagwe e kgahlišago yeo e theilwego Beibeleng.

Beibele e re botša gore: “Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira se se lokilego o a amogelega go yena.” (Ditiro 10:34, 35) Ye ke yona toka yeo ka moka re ka e letelago go Modimo, yoo ‘a ratago toko le toka.’—Psalme 33:5.