Smita, * mosadi wa nywaga e 35 wa Dhaka, kua Bangladesh, o be a tsebja e le motho yo a nago le lerato le tlhokomelo. Batho ba be ba mo tseba e le mosadi yo mofsa, yo a nyetšwego, yoo a dulago a thabile, a šoma ka thata e bile a thuša ba bangwe gore ba tsebe seo a ithutilego sona ka Modimo. Lapa la gagwe le bagwera ba ile ba tšhoga gakaakaang gateetee ge Smita a swarwa ke bolwetši bjoo bo ilego bja feleletša ka go mmolaya!

James le mosadi wa gagwe, banyalani ba bafsa bao ba lego nywageng ya bona ya bo-30, le bona ba be ba na le botumo bjo bo swanago le bja Smita. Seruthwaneng se sengwe, ba ile ba etela bagwera ba bona Lebopong la ka Bodikela la United States. Ga se ba ka ba boa legaeng la bona la kua New York. Ge ba sa le moo, ba ile ba ba kotsing e šoro ya koloi, ba tlogela baratiwa le bašomigotee le bona go ikwa ba lahlegetšwe o šoro.

Lehono bokgopo le tlaišego di atile kudu. Dintwa di bolaya batho le mašole. Bosenyi le bošoro di tlaiša batho bao ba se nago molato. Dikotsi tše di bolayago le malwetši ao a golofatšago di diragalela batho bohle go sa šetšwe nywaga goba maemo a bona bophelong. Dikotsi tša tlhago di wela batho ka go se kgetholle. Kgethollo le go hloka toka di aparetše. Mohlomongwe le wena o kile wa tlaišwa ke maemo a.

Ke ga tlhago go botšiša dipotšišo tše swanago le tše:

• Ke ka baka la’ng dilo tše mpe di diragalela batho ba lokilego?

• Na Modimo o ikarabela ka dilo tše?

• Na dikotsi di fo itiragalela, goba di bakwa ke batho?

• Na e ka ba ke Karma, yeo e bolelago gore ditiro tša motho tša nakong e fetilego ke tšona di bakago tlaišego?

• Ge e ba Modimo ramatlaohle a le gona, ke ka baka la’ng a sa šireletše batho ba lokilego dikotsing tše?

• Na re tla ka ra imologa bobeng le tlaišegong?

E le gore re arabe dipotšišo tše, re swanetše go kwešiša karabo ya dipotšišo tše pedi tša bohlokwa: Ke ka baka la’ng dilo tše mpe di diragalela batho ka moka le gona Modimo o tla dira eng ka se?