Ngwaga le ngwaga, re gatiša le go phatlalatša Dibeibele tše dimilione tše makgolo gotee le dikgatišo tšeo di theilwego Beibeleng. Lefaseng ka bophara re aga diofisi tša makala tšeo di nago le mafelo a go gatiša e bile re šomela go tšona. Diphuthego tše dikete tše masome di bokana meagong ya borapedi yeo e sa bitšego kudu eupša e le e kgahlišago yeo e bitšwago Diholo tša Mmušo. Ke mang yo a lefelelago ditshenyagalelo tše ka moka?

Modiro wa rena o thekgwa ka mo go feletšego ka meneelo ya boithatelo. (2 Bakorinthe 9:7) Ka 1879, kgatišo ya bobedi ya makasine wo e itše: “Re dumela gore ‘Zion’s Watch Tower’ [ka ge makasine wo o be o bitšwa bjalo ka nako yeo] e thekgwa ke JEHOFA, gomme ge se se le ka tsela ye le ka mohla e ka se ke ya kgopela goba ya lopa batho gore ba e thekge.” Pono ya rena ga se ya fetoga tabeng yeo.

Meneelo e romelwa ka go lebanya go e nngwe ya diofisi tša rena tša makala goba e tsenywa ka lepokising la moneelo leo le lego Holong e nngwe le e nngwe ya Mmušo. Eupša le ka mohla ga re ntšhe karolo ya lesome, ga re ntšhe koleke goba go lefiša batho bakeng sa ditirelo goba dikgatišo tša rena. Ga re lefše ge re dira modiro wa rena wa boboledi, re ruta ka phuthegong goba go thuša ka go aga mafelo a borapedi. Go ba gona, Jesu o itše: “Le amogetše feela, neang feela.” (Mateo 10:8) Badiredi ka moka bao ba šomago diofising tša rena tša makala le ntlongkgolo ya lefase ka bophara, go akaretša le ditho tša Sehlopha se Bušago sa Dihlatse tša Jehofa, ke ditho tša mokgatlo wa bodumedi tšeo di sa hwetšego mogolo.

Le gona tšhelete ya moneelo e dirišetšwa mediro ya tlhakodišo. Bakriste ba lekgolong la pele la nywaga ba be ba thabela go tšea karolo medirong ya go hlakodiša bao ba bego ba le tlalelong. (Baroma 15:26) Le rena ka tsela e swanago, re thuša bao ba lego tlalelong ka go aga lefsa magae a bona le mafelo a rena a borapedi le ka go aba dijo, diaparo le go thuša ka tša kalafo.