MOLAO WA MOTHEO WA BEIBELE: “Tšwelang pele . . . le lebalelana ka bolokologi le ge e ba motho a na le lebaka la go ba le pelaelo ka yo mongwe. Go etša ge Jehofa a le lebaletše ka bolokologi, le lena le dire bjalo.”—Bakolose 3:13.

Seo se ra go re’ng? Ka Beibeleng, sebe se swantšhwa le molato gomme go lebalela go swantšhwa le go phumola molato. (Luka 11:4) Puku e nngwe ya ditšhupetšo e bolela gore ka Mangwalong lentšu la Segerika leo le fetoletšwego e le ‘lebalela’ le bolela go “phumola molato, e sego go o nyaka.” Ka go re’alo, ge re kgetha go lebalela motho yo a re fošeditšego, ga go nyakege gore a re lefe ka tsela e itšego. Go ikemišetša ga rena go lebalela ga go bolele gore re amogela boitshwaro bja gagwe goba go nyenyefatša bohloko bjoo a re kwešitšego bjona. Go e na le moo, re kgetha go se kgopišege, gaešita le ge re na le ‘lebaka le le kwagalago la go ba le pelaelo.’

Na go a kgonega mehleng yeno? Ka ge re le batho ba sa phethagalago, bohle re dira sebe. (Baroma 3:23) Ka gona, ke gabohlale gore re tlwaele go lebalela ba bangwe, ka gobane go se go ye kae le rena go tla nyakega gore ba bangwe ba re lebalele. Go feta moo, ge re kgetha go lebalela, le rena re a holega. Bjang?

Ge re galefa e bile re boloka sekgopi—gomme re sa lebalele—re a ikgobatša. Maikwelo a bjalo a fošagetšego a ka re amoga lethabo, a šitiša maphelo a rena gomme a re šulafaletša bophelo. Le gona a ka bea bophelo kotsing e kgolo. Pego ya Journal of the American College of Cardiology yeo e ngwadilwego ke Ngaka Yoichi Chida le Andrew Steptoe e lego Moprofesara wa Thuto ya tša Monagano, e bontšha gore: “Dinyakišišo tšeo di sa tšwago go dirwa di laetša gore go galefa le go hloka bogwera gotee le bolwetši bja pelo (coronary heart disease [CHD]) di kotsi ge di kopane.”

Se se kgahlišago ke gore go lebalela go na le mehola. Ge re lebalela ba bangwe ka bolokologi, re boloka botee le khutšo gomme ka go dira bjalo ra šireletša ditswalano. Se bohlokwa kudu ke gore re bontšha gore re ekiša Modimo, yo a lebalelago ka bolokologi badiradibe bao ba itsholago gomme o letetše gore le rena re dire se se swanago.—Mareka 11:25; Baefeso 4:32; 5:1.