Linda: Ge ke na le mengwaga e 12, mma o ile a mpotša gore ke be ke na le ngwanešo yo ba ilego ba mo iša gore a thwalwe (adoption). Ke be ke ipotšiša ge e ba le yena a belegwe e le sefoa go swana le nna. Eupša ke godile ke sa mo tsebe.

Sally: Ke be ke sa tsebe gore ke thwetšwe. Motho yo ke bego ke nagana gore ke mma o be a mpetha o šoro e bile a ntshwara bjalo ka lekgoba, ka gona ke gotše ke dula ke nyamile e bile ke lewa ke bodutu—e lego morwalo o mongwe mothong yo a belegwego e le sefoa. Ke moka ke ile ka kopana le Dihlatse tša Jehofa gomme ka thoma go ithuta Beibele. Ge mosadi yo a nkgodišitšego a be a lemoga seo, o ile a mpetha ka lepanta gomme a fetoša dinotlelo tša mojako, a ntswalelela ka ntlong. Ge ke na le mengwaga e 20, ke ile ka tšhaba gae gomme Dihlatse tša ntšea tša dula le nna. Mathomong a 2012, ke ile ka kolobetšwa.

 Linda: Ge ke be ke na le mengwaga e 20, ke ile ka thoma go ithuta le Dihlatse tša Jehofa. Ka morago, ke ile ka thoma go ya dikopanong tša selete kua Jakarta, moo lenaneo le bego le fetolelwa ka polelo ya diatla bakeng sa difoa. Ge ke le moo ke ile ka kopana le batho ba bantši ba difoa, go akaretša le Sally, e lego ngwanenyana wa Hlatse yo a bego a dula ka Leboa la Sumatra. Ke ile ka kwa ke mo rata kudu eupša ke sa tsebe gore ka baka la eng.

Sally: Nna le Linda re ile ra ba bagwera ba bagolo. Ke ile ka bona re swana, eupša ka se iše taba yeo hlogong.

Linda: Ka August 2012, letšatši pele nka kolobetšwa, ke ile ka ikwa ke tloga ke duma go hwetša ngwanešo yo a timetšego. Ke ile ka lopa Jehofa ka re: “Hle nthuše go hwetša ngwanešo ka gobane ke nyaka go mmotša ka wena.” Gateetee ka morago ga moo, go sa letelwa mma o ile a hwetša molaetša o tšwago go motho yo a bego a tseba gore ngwanešo yo a timetšego o kae. Wo e bile mogato wa mathomo wa megato e mentši yeo e ilego ya feleletša ka gore ke kopane le Sally.

Sally: Ge Linda a be a ntlhalosetša gore ke nna ngwanabo yo e lego kgale a timetše, kapejana ke ile ka namela sefofane ka ya Jakarta gore ke yo kopana le yena. Ka morago ga go tšwa lefelong la tšhireletšo la boemafofaneng, ke ile ka bona Linda—a na le tate, mma le mogolwake—ba letile go tlo ntumediša. Ke be ke thothomela ke hlakahlakane maikwelong. Re ile ra gokarelana gomme ra atlana—mma o ile a nkgokarela nako e telele go ba feta ka moka. Ka moka ga rena re be re lla. Ge tate le mma ba be ba lla gomme ba kgopela tshwarelo ka ge ba ile ba nkiša gore ke yo thwalwa, re ile ra lla ra gokarelana gape.

Linda: Ka baka la ge re godišitšwe ka ditsela tše di sa swanego, re ile ra swanelwa ke go ithuta go phela gotee go sa šetšwe dimelo tša rena le mekgwa e sa swanego. Eupša re ratana kudu.

Sally: Gona bjale nna le Linda re dula gotee gomme re phuthegong e tee ya polelo ya diatla kua Jakarta.

Linda: Nna le Sally re be re arogane mengwaga ya ka godimo ga e 20. Re leboga Jehofa gore mafelelong re kopane!