Go kile gwa ba le monna yo mongwe yo a bego a dula nageng ya Utsi. Monna yoo o be a rata Jehofa. Leina la gagwe e be e le Jobo. E be e le mohumi e bile a na le lapa le legolo. O be a lokile, a thuša batho ba go hlaka, basadi bao ba hlokofaletšwego ke banna le bana bao ba bego ba se na batswadi. Eupša na Jobo o be a ka se tsoge a bile le mathata feela ka gobane a be a lokile?

Jobo o be a sa tsebe gore Sathane Diabolo o mo lebeletše. Jehofa o ile a re go Sathane: ‘Na o bone mohlanka wa ka Jobo? Ga go na motho yo a swanago le yena lefaseng. O a nkwa, e bile o dira dilo tše dibotse.’ Sathane a araba Jehofa a re: ‘Ke nnete gore Jobo o a go kwa. Akere o a mo šireletša le go mo šegofatša. O mo neile naga le diruiwa. Ge o ka mo amoga tšona, a ka se sa go rata.’ Jehofa a re go Sathane: ‘Wena mo amoge tšona. Eupša o se ke wa mmolaya.’ Ke ka baka la eng Jehofa a ile a dumelela Sathane gore a tlišetše Jobo mathata? Jehofa o be a tseba gore Jobo o tla kgona go kgotlelela mathata ao.

Sathane o ile a thoma go tlišetša Jobo mathata. Sa pele, o ile a romela batho bao ba bitšwago Baseba gore ba tlo utswa dikgomo tša Jobo le dipokolo tša gagwe. Ke moka, mollo o ile wa fiša dinku ka moka tša Jobo. Ka morago, batho ba bangwe bao ba bitšwago Bakaladea ba ile ba tla gomme ba utswa dikamela tša gagwe, gomme ba bolaya badiši ba tšona. Ka morago ga moo, Jobo o ile a botšwa ditaba tše bohloko kudu. O ile a botšwa gore bana ba gagwe ba wetšwe ke ntlo yeo ba bego ba diretše monyanya ka go yona, gomme ba hwile ka moka. Jobo o ile a kwa bohloko kudu, eupša ga se a ka a tlogela go rata Jehofa.

Sathane o be a nyaka gore Jobo a kwe bohloko  kudukudu. O ile a dira gore Jobo a tšwe dišo tše bohloko kudu mmeleng wa gagwe ka moka. Jobo o be a sa tsebe gore ke ka baka la eng a diragalelwa ke dilo tšeo ka moka. Eupša o ile a no tšwela pele a rata Jehofa. Jehofa o be a bona dilo tšeo ka moka, gomme a thabišwa ke gore Jobo o be a kgotleletše.

Ka morago, Sathane o ile a romela banna ba bararo go Jobo gore ba mo leke. Banna bao ba ile ba re go Jobo: ‘Mathata a a go wela ka gobane o dirile sebe gomme wa se uta. Jehofa o a go otla.’ Jobo a re go bona: ‘Ga se ka dira sebe.’ Eupša Jobo o ile a thoma go nagana gore Jehofa ke yena a mo tlišetšago mathata, ka gona a bolela gore Jehofa o a mo hlakiša.

Gare ga banna bao ba bararo, go be go na le lesogana leo le bitšwago Elihu. Lesogana leo le be le theeditše ge Jobo a dutše a boledišana le banna bao. Ge ba feditše, Elihu o ile a bolela a re: ‘Dilo ka moka tšeo le di boletšego di fošagetše. Jehofa o lokile go phala batho ka moka. A ka se tsoge a dirile dilo tše mpe. O bona dilo ka moka, e bile o thuša batho ge ba le mathateng.’

Mafelelong, Jehofa o ile a bolela le Jobo a re: ‘O be o le kae ge ke dira legodimo le lefase? Ke ka baka la eng o re ke nna ke go hlakišago? O no bolela dilo tše o sa di tsebego.’ Jobo o ile a dumela phošo ya gagwe gomme a re: ‘Ke be ke fošitše. Ke be ke kwele ka wena, eupša ga bjale ke go tseba gabotse. Ga go na selo seo se go palelago. Ke kgopela tshwarelo ka seo ke se boletšego.’

Mathata a Jobo a ile a fela. Jehofa o ile a dira gore Jobo a fole bolwetšing bja gagwe gomme a mo nea dilo tše dintši tša go feta tša pele. Jobo o ile a phela nako e telele a thabile. Jehofa o ile a šegofatša Jobo ka gobane a ile a mo kwa le ge a be a na le mathata. Na o tla swana le Jobo, gomme wa tšwela pele o rata Jehofa le ge o ka ba le mathata?