1, 2. Go bonagala molebeledi yo mongwe wa mosepedi a be a ikwa bjang ka batho bao go bolelwago ka bona ka Beibeleng gomme ke ka baka la’ng go be go ka thabiša go ba le bagwera ba bjalo?

“O BOLELA ka batho ba ka Beibeleng eka e kile ya ba bagwera ba gagwe.” Se ke seo mosadi yo mongwe wa Mokriste a ilego a se bolela ka morago ga go kwa polelo yeo e bego e newa ke mokgalabje yo e lego molebeledi wa mosepedi. Go bile bjalo ka gobane ngwanabo rena yo o feditše nywaga e mentši a ithuta Lentšu la Modimo e bile a le ruta ba bangwe​—go ba go fihla ge banna le basadi ba tumelo bao go bolelwago ka bona ka Beibeleng ba bonagala eka ke kgale e le bagwera ba gagwe.

² Ke mang ruri yo a bego a ka se thabele gore batho bao go bolelwago ka bona ka Beibeleng e be bagwera ba gagwe? Na o ba bona e le batho ba kgonthe? Akanya gore go be go tla ba bjang go sepela le go boledišana le banna le basadi ba tumelo ba bjalo ka Noa, Aborahama, Ruthe, Eliya le Esitere gomme o ba tseba gakaone. Nagana feela kamoo ba bego ba tla go kgoma ka gona bophelong​—ruri ba be ba tla go eletša le go go kgothatša kudu!​—Bala Diema 13:20.

3. (a) Re ka holwa bjang ke go ithuta ka banna le basadi ba tumelo ba ka Beibeleng? (b) Re tlo ahlaahla dipotšišo dife?

³ Ke therešo gore go tla kgonega gore re be bagwera ba bona nakong ya “tsogo ya ba lokilego.” (Dit. 24:15) Lega go le bjalo, le mo nakong ye re ka holwa ke go ithuta ka banna le basadi ba tumelo ba ka Beibeleng. Bjang? Moapostola Paulo o neile karabo ye e kwagalago: “Le be baekiši ba bao ka tumelo le go se fele pelo ba jago bohwa bja dikholofetšo.” (Baheb. 6:12) Ka ge re tlo thoma go ithuta ka banna le basadi ba ba tumelo, anke re hlahlobeng dipotšišo tše mmalwa tšeo di rotošwago ke mantšu a a Paulo, tše bjalo ka gore: Ge e le gabotse tumelo ke’ng, gona ke ka baka la’ng re swanetše go ba le yona? Re ka ekiša bjang banna le basadi ba tumelo ba ka Beibeleng?

4. Batho ba bangwe ba nagana gore tumelo ke’ng gomme ke ka baka la’ng ba tloga ba fošitše?

⁴ Tumelo ke seka se se kgahlišago seo banna le basadi bao re tlago go ithuta ka bona kgatišong ye ba se bontšhitšego. Batho ba bantši lehono ga ba kwešiše seo se bolelwago ke tumelo, ba nagana gore ke go fo dumela ntle le mabaka. Lega go le bjalo, ba tloga ba fošitše. Go ba le tumelo ga go bolele go ba madumelatšohle; ga se go fo dira dilo ka tsela yeo o ikwago ka yona eupša ke go ba le tumelo ya kgonthe. Go kotsi go ba madumelatšohle. O ka ikwa ka tsela ye lehono gomme gosasa maikwelo  ao a ba a ile. Gaešita le go fo dumela go Modimo ga se gwa lekana ka gobane le “batemona le bona ba a dumela e bile ba a thothomela.”​—Jak. 2:19.

5, 6. (a) Tumelo ya rena e theilwe dilong dife tše pedi tšeo di sa bonwego? (b) Tumelo ya rena e swanetše go tia gakaaka’ng? Bontšha.

⁵ Go ba le tumelo go feta kgole go fo ba madumelatšohle. Ela hloko kamoo Beibele e hlalosago tumelo ka gona. (Bala Baheberu 11:1.) Paulo o boletše gore tumelo e akaretša dilo tše pedi tšeo re ka se kgonego go di bona. Sa pele, e akaretša dilo tša mehleng yeno “tšeo di sa bonwego.” Mahlo a rena ga a kgone go bona dilo tša kgonthe tšeo di lego gona legodimong​—bjalo ka Jehofa Modimo, Morwa wa gagwe goba Mmušo woo ga bjale o bušago legodimong. Sa bobedi, tumelo e akaretša dilo tše di ‘holofeditšwego’​—ditiragalo tšeo di sa tlago. Mo nakong ye re ka se kgone go bona lefase le lefsa leo Mmušo wa Modimo o tlago go le tliša kgauswinyane. Eupša, na seo se bolela gore go ba le tumelo dilong tše bjalo tša kgonthe le dilong tšeo re di holofeditšwego ga go na motheo?

⁶ Le gatee! Paulo o hlalositše gore tumelo ya kgonthe e na le motheo wa kgonthe. Ge a be a re tumelo ke “tebelelo e kgonthišeditšwego,” o dirišitše mantšu ao gape a ka fetolelwago e le “lengwalo la molao.” Akanya motho yo mongwe a nyaka go go fa ntlo. A ka fo tla a swere lengwalo leo la molao gomme a re: “Ntlo ya gago še.” Re a tseba gore ga a re gore o tla dula ka gare ga lengwalo leo; o fo ba a e ra gore lengwalo leo ke tlamo ya molao yeo ge e le gabotse re ka rego ke ntlo ka boyona. Ka mo go swanago, bohlatse bja tumelo ya rena ke bjo bo kgodišago e bile bo tiile moo e lego gore bo ka lekanywa le tumelo ya rena ka boyona.

7. Tumelo ya kgonthe e akaretša’ng?

⁷ Ka gona, tumelo ya kgonthe e akaretša bohlatse bjo bo tiilego le kgodišego e sa šišinyegego yeo e lebišitšwego go Jehofa Modimo. Tumelo e dira gore re mmone e le Tatago rena yo lerato gomme re dumele gore o tla phethagatša dikholofetšo tša gagwe ka moka. Eupša tumelo e tiilego e akaretša mo gontši. Go swana le semela, e swanetše go nošetšwa gore e gole. E swanetše go bontšhwa ka mediro, go sego bjalo e tlo hwa.​—Jak. 2:26.

8. Ke ka baka la’ng go le bohlokwa go ba le tumelo?

⁸ Ke ka baka la’ng go le bohlokwa go ba le tumelo? Paulo o re neile karabo e kgotsofatšago. (Bala Baheberu 11:6.) Ga go kgonege gore re rapele Jehofa le go mo kgahliša ge re se na tumelo. Ka gona tumelo e bohlokwa gore re fihlelele morero wa gagwe o mogolo wo a o hlametšego dibopiwa tše bohlale. Morero woo ke go batamela Tatago rena wa legodimong Jehofa le go mo tagafatša.

9. Jehofa o bontšhitše bjang gore o lemoga kamoo re tlogago re hloka tumelo?

⁹ Jehofa o tseba kamoo re tlogago re hloka tumelo, ke ka baka leo a re neilego mehlala ya go re ruta kamoo re ka matlafatšago le go  bontšha tumelo ya rena. O šegofaditše phuthego ya Bokriste ka mehlala e mebotse ya banna bao ba etelelago pele. Lentšu la gagwe le re: “Le ekiše tumelo ya bona.” (Baheb. 13:7) E bile o re neile mo gontši. Paulo o ngwadile ka “leru le legolo . . . la dihlatse,” e lego banna le basadi ba bogologolo bao ba re tlogeletšego mehlala e mebotse kudu ya tumelo. (Baheb. 12:1) Batho bao ba botegago bao Paulo a ngwadilego ka bona go Baheberu kgaolo 11 ga se bona feela. Beibele e tletše ka dikanegelo tša kgonthe tša banna le basadi, batho ba bagolo le ba banyenyane, bao ba tšwago ditlogong tše di sa swanego, bao ba ilego ba bontšha tumelo e bile ba re swaretše thuto e kgolo yeo re e hlokago mehleng ye ya go se be le tumelo.

10. Thuto ya rena ya motho ka noši e ka re thuša bjang go ekiša tumelo ya banna le basadi ba botegago ba dipegong tša Beibele?

¹⁰ O ka se kgone go ekiša motho ntle le gore o mo tsebe gabotse. Ge o dutše o bala kgatišo ye, o tla lemoga gore go dirilwe nyakišišo e tseneletšego go go thuša go tseba banna le basadi ba ba tumelo. Go re’ng o sa itirele nyakišišo e nngwe e oketšegilego? Thutong ya gago ya motho ka noši, dira nyakišišo ka Beibeleng o diriša dikgatišo tšeo o nago le tšona. Ge o dutše o naganišiša ka seo o ithutago sona, ipone o le moo gomme o bone le dilo tšeo o balago ka tšona dipegong tšeo tša Beibele. Leka go bona mafelo ao o balago ka wona, o kwe medumo o be o dupelele le menkgo ya moo. Sa bohlokwa kudu, leka go ikwa go swana le batho bao ba lego pegong yeo. Ge o dutše o ikwa go swana le banna le basadi bao ba tumelo, ba tla ba ba kgonthe go wena, wa tlwaelana le bona gomme ba bangwe ba bona ba tla ba bjalo ka ge eka ke bagwera ba gago ba kgale.

11, 12. (a) Ke bjang o ka ikwago o gwerane le Aborama le Sarai? (b) O ka holwa bjang ke mohlala wa Hanna, Eliya goba Samuele?

¹¹ Ge o thoma go ba tseba gabotse, o tla nyaka go ba ekiša. Ka mohlala, akanya o letetšwe ke kabelo e mpsha. Mokgatlo wa Jehofa o go laleditše go katološa bodiredi bja gago ka tsela e itšego. Mohlomongwe o kgopetšwe go ya tšhemong yeo go nago le tlhokagalo e kgolo ya bagoeledi, goba o laleditšwe go tsenela mohuta o mongwe wa boboledi woo o sa kago wa o dira peleng goba o sa o tlwaelago. Ge o dutše o nagana ka kabelo ye e bile o rapela ka yona, na o be o ka se holwe ke go naganišiša ka mohlala wa Aborama? Yena le Sarai ba ile ba ikemišetša go tlogela manobonobo a Uri gomme ba ile ba putswa kudu ka baka la seo. Ge o dutše o ekiša mohlala wa bona, o tla ikwa o ba tseba gakaone go feta pejana.

¹² Ka mo go swanago, o be o tla dira’ng ge motho yo mongwe yo o tlwaelanego kudu le yena a be a ka go swara makgwakgwa gomme wa nyama​—wa ba wa ikwa o lekega go se ye dibokeng? Ge o ka naganišiša ka mohlala wa Hanna le kamoo a sego a dumelela boitshwaro bjo bo sa kgahlišego bja Penina bo  mo thibela go rapela Jehofa, o tla thušega gore o dire phetho e botse​—seo se ka dira gore o kwe eka Hanna ke mogwera wa gago wa paale. Le gona, ge o ka ikwa o nyamišwa ke maikwelo a go se swanelege, o ka kgahlišwa ke Eliya ge o dutše o ithuta ka mathata a gagwe le tsela yeo Jehofa a ilego a mo homotša ka yona. Bafsa bao bana bao ba tsenago le bona dikolo ba ba gateletšago go itshwara ka tsela e gobogilego ba ka ikwa ba kgahlišwa ke Samuele ka morago ga go ithuta kamoo a ilego a lebeletšana le kgobogo ya barwa ba Eli kua taberenakeleng.

13. Na go ekiša tumelo ya batho ba ka Beibeleng go dira gore tumelo ya gago e se be bohlokwa? Hlalosa.

¹³ Na go ekiša tumelo ya batho bao ba ka Beibeleng go dira gore tumelo ya gago e se be bohlokwa go Jehofa? Ga go bjalo le gatee! O se lebale gore Lentšu la Jehofa le re kgothaletša go ekiša tumelo ya ba bangwe. (1 Bakor. 4:16; 11:1; 2 Bathes. 3:7, 9) Sa go kgahliša ke gore ba bangwe ba batho bao re tlago go ithuta ka bona ka kgatišong ye le bona ba be ba ekiša tumelo ya babotegi bao ba phetšego pele ga bona. Ka mohlala, re tla lemoga gore go Kgaolo 17 ya puku ye, go bonagala Maria a ile a tsopola mantšu a Hanna, e lego seo se bontšhago gore o be a ekiša mohlala wa gagwe. Na seo se ile sa dira gore tumelo ya Maria e be e fokolago? Ga go bjalo! Go e na le moo, mohlala wa Hanna o ile wa thuša Maria go tiiša tumelo ya gagwe e le gore le yena a itirele leina le lebotse le Jehofa Modimo.

14, 15. Kgatišo ye e na le dikarolo dife tše dingwe, gona re ka di diriša bjang?

¹⁴ Puku ye e hlametšwe go go thuša go matlafatša tumelo ya gago. Dikgaolo tše di latelago di tšerwe lelokelelong la dihlogo tša “Ekišang Tumelo ya Bona” tšeo di gatišitšwego ka go Morokami go tloga ka 2008 go fihla ka 2013. Lega go le bjalo, go tsentšwe dikarolo tše difsa. Go tsentšwe dipotšišo gore o kgone go ahlaahla le go diriša seo o ithutago sona. Diswantšho tše dintši tša mebala e kgahlišago tšeo di neago ditaba ka botlalo di hlamilwe ge go be go dirwa puku ye, tše dingwe tšeo di bego di le gona di ile tša godišwa le go botsefatšwa. Go akareditšwe le dikarolo tše dingwe tše di holago tše bjalo ka tatelano ya ditiragalo le mebapa. Puku ye ya Ekiša Tumelo ya Bona e hlametšwe go dirišwa thutong ya motho ka noši, borapeding bja lapa le Thutong ya Beibele ya Phuthego. Malapa a mangwe a ka thabela go fo ipalela dikanegelo tše ka go hlaboša.

¹⁵ Eka puku ye e ka go thuša go ekiša tumelo ya bahlanka ba botegago ba Jehofa ba bogologolo. Le gona eka e ka go thuša go matlafatša tumelo ya gago ge o dutše o batamelana le Tatago wa legodimong Jehofa!