WÓLTAʼÍGÍÍ 2
Ayóó Áhonóolin Yę́ę Haa Náádiilyá
Łaʼ diyin yá naalʼaʼí atsʼą́ą́jí silı̨́ı̨́ʼ, éí áłtsé hastiin dóó asdzání God hooʼáłígíí doo jidínóozįįł da biniyé yíniʼ áyiilaa. Ákójiidzaago biniinaa, anoonééł dóó ádił niʼiidzííh hazlı̨́ı̨́ʼ
BÍLAʼASHDLAʼII tʼahdoo álnééhdą́ą́ʼ, God éí tʼóó ahayóí níłchʼi nidaalʼaʼí áyiilaa. Diyin yá naalʼaʼí łaʼ bitsʼą́ą́jí silı̨́ı̨́ʼ, éí Séítan, Devil bidiʼnínígíí, Íídendi honahagiz bee Íiv hodínéeshʼah niizı̨́ı̨́ʼ. Éí God tsin bineestʼąʼ bąąhdóó oosą́ą́ʼ lágo hodííniid yę́ę, Séítan honííʼaaʼgo dííyı̨́ı̨́ł hodííniid.
Séítan éí tłʼiish choyoosʼįįdgo ání, asdzání dóó bahastiin, éí yáʼádaatʼéhígíí God hatsʼą́ąjįʼ kóyósin. Díí níłchʼigo naalʼaʼí doo yáʼáshóonii silı̨́ʼígíí Íiv ííłní; tsin bineestʼąʼ baa hóchįʼ yę́ę bąąhdóó ooyą́ąʼgo, doo dínóohnéeł da. Áko Séítan éí, God haʼáłchíní bichʼįʼ hayoochʼííd níigo yikʼihodiiʼą́. Inóʼáahii Séítan éí God doo bikʼeh hóʼı̨́ı̨́jígo yáʼátʼééh, háálá éí ayóó ił ééhózin, dóó ádá nahatʼá góneʼ ahóótʼiʼ ní. Díí éí nahasdzáán bikáaʼgi tsʼídá áłtsé yoochʼííd bee haʼoodzíʼígíí átʼé. Íiyisíí baa hwiinítʼínígíí yeeʼ, God tʼáá ałtso bee bóhólníihii nilı̨́įgi. Éí hó hojooʼáałgi daatsʼí bee hóhólnííh, dóó tʼáá ákogi átʼéii daatsʼí bee hojooʼááł, áádóó bikʼi hojooʼáłígíí daatsʼí bá yáʼátʼéeh.
Íiv éí Séítan biyoochʼííd yoosdląąd. Áko tsin bineestʼąʼ łaʼ deeshı̨́ı̨́ł jiniizı̨́įʼgo łaʼ jííyą́ą́ʼ. Tʼahádóó hahastiin łaʼ baazhníʼą́ągo ałdóʼ łaʼ yiyííyą́ą́ʼ. Áádóó bąąhági átʼéii biih jííʼáázh. Áłtsʼísígo ájíítʼįįd shı̨́ı̨́ nahalin ndi, God yeeʼ bichʼįʼ nijílteeʼgo ájítʼı̨́. God áhodííniid yę́ę tʼáá ákójínéehgo doo bikʼeh hojííłʼįįd da. Ádam dóó Íiv ákójiidzaago, Áhoolaii binahatʼaʼ doo jiniizı̨́ı̨́ʼ dago bee ííshjání ázhdiilyaa. Háálá Áhoolaii éí tʼáá ałtsoní hai nílá, iiná hadíłtʼéhígíí tʼáá bił.
Yisdáʼiiníiłii éí “nitsiitsʼiin yidoołjish; ni éí bikétal dííłjish.”—Genesis 3:15
Díí ádajíítʼįįdígíí biniinaa God há nihoníʼą́. God átséedi díí yee haadzííʼ, Yisdáʼiiníiłii doogáłígíí éí díí tłʼiish ádílʼínígíí Séítan, yidiyoołhééł. God éí Ádam dóó Íiv doo tʼáá akǫ́ǫ́ neestseed da, háálá áłchíní tʼahdoo daa chíhígíí yaa joobaʼgo biniinaa. Áko díí áłchíní éí bá chodahooʼı̨́įgo yá áyiilaa. Háálá God éí Yisdáʼiiníiłii yidoołʼaałgo, díí Íídengi doo tsʼííd áhóótʼįįd yę́ę hashtʼéii doodlííł. God yihodeezʼánę́ę Diyin Bizaad biiʼ Yisdáʼiiníiłii doogáłígíí bihodoolníiłgi dóó átʼínígíí bééhodoozįįłgi, tʼáá ałkééʼ ííshjání áyoolíiłgo hoolzhiizh.
God éí Ádam dóó Íiv, Ííden Ayóó Áhonóolin yę́ędę́ę́ʼ chʼíhoníłchą́ą́ʼ, éí bitsʼą́ądi dáʼákʼeh binjilnishgo ajiyą́ą doo. Íiv azhʼniiltsąąd áádóó Kéin jischı̨́, éí tsʼídá áłtsé Ádam dóó Íiv hweʼawééʼ. Éí bikéédóó haʼáłchíní łaʼ nináádahwiizlı̨́ı̨́ʼ, Éíbel áádóó Seth ałdóʼ, éí bitsʼą́ą́dóó oochíłígíí éí Nóah hazlı̨́ı̨́ʼ.
—Genesis wóltaʼii 3dóó 5jįʼ; Revelation wóltaʼii 12:9gi biiʼ baa haneʼ.
