MBWENU shi nikibaasika omuntu kuguma ari omwesigwa ahari Ruhanga, yaagyezibwa ekirenga kandi okworoba kwe kutarikurugamu karungi koona? Ekibuuzo ekyo kikabuuzibwa kandi kyagarukwamu omu bwire bwa Yobu.

Obu Abaisraeli baabaire bakiri Misri, Yobu omunyabuzaare wa Abrahamu, akaba naatuura omu kicweka hati ekirikumanywa nka Buharaabu. Omu bwire obwo, bamaraika bakerundaanira omu maisho ga Ruhanga, kandi Sitaani omugomi nawe akaba ari nabo. Omu rweteeraine rwa bamaraika boona, Yehova akooreka obwesigye obu yaabaire aine omu muheereza we omwesigwa Yobu. Nangwa, Yehova akagira ngu tihariiho muntu ondiijo owaabaire aine obwesigwa nk’obwa Yobu. Kwonka Sitaani akagira ngu Yobu akaba naaheereza Ruhanga ahabw’okugira ngu akaba naamuha emigisha kandi arikumurinda. Sitaani akoongyera yaagira ngu Yobu yaayakwa byona ebi aine, naabaasa kukyena Ruhanga.

Ruhanga akaikiriza Sitaani kukora aha butungi bwa Yobu, abaana be n’amagara ge. Yobu, ahabw’obutamanya ngu ni Sitaani owaabaire naamuhitsyaho ebyo byona, akebuuza ahabw’enki Ruhanga yaabaire naareka obureemezi obwo bwona kumuhikaho. Kwonka nabwo, Yobu tarayehakaine Ruhanga.

Banywani ba Yobu bashatu bakaija kumureeba. Omu bigambo byabo ebihandiikirwe omu kitabo kya Yobu, abashaija abo omu muringo ogutahikire bakateeraho kuhamiza Yobu ngu akaba naafubirwa aha bw’ebibi ebi yaabaire naakora bwesherekye. Bakamugira ngu Ruhanga tarikusiima abaheereza be kandi ngu tarikubeesiga. Yobu akanga emiteekateekyere yaabo etahikire. N’obumanzi, Yobu akamaririra kurinda obwesigwa bwe kuhistya aha kufa!

Kwonka Yobu akakora enshobe y’okwehoozaho ekirenga. Omutsigazi muto orikwetwa Elihu, owaabaire ahurikiize okugaanira kwabo kwona, akagamba. Elihu akahana Yobu ahabw’okuremwa kwetegyereza ngu okujuririra Yehova nk’ohikire kutegyeka nikikira okweza eiziina ry’omuntu. Elihu akahana na banywani ba Yobu ababi.

Yehova akagamba na Yobu, yaateeraho kuteereza emiteekateekyere ya Yobu. Arikugamba aha bihangirwe bitari bimwe na bimwe, Yehova akeegyesa Yobu omu muringo ogurikwetegyerezibwa abantu waagyeragyeranisa n’amaani ge maingi. Yobu omu bucureezi akaikiriza okuhanwa kwa Yehova. Yehova, ahabw’okugira ngu “aine embabazi nyingi n’okusaasira,” akagaruka yaaha Yobu amagara marungi, yaamuha kabiri obutungi bwe kandi yaamuha n’abaana ikumi. (Yakobo 5:11) Yobu ahabw’okuguma ari omwesigwa ahari Yehova n’omu kugyezibwa kw’amaani, akagarukamu Sitaani owaagizire ngu abantu tibarikubaasa kuguma bari abeesigwa ahari Ruhanga baagyezibwa.

​—Byegami aha kitabo kya Yobu.