Omu Baibuli harimu amakuru marungi agarikworeka ngu abantu nibaija kutuura omu nsi ebiro byona. (Zaaburi 37:29) Baibuli erimu ebitabo 66. Ruhanga akakoresa abashaija abeesigwa nka 40 kugihandiika. Ebitabo bitaano ebirikubanza bikahandiikwa Musa emyaka nka 3,500 enyima. Ekitabo ekirikuheererukayo kikahandiikwa entumwa Yohaana emyaka nka 1,900 enyima. Abaagihandiikire bakahandiika ebiteekateeko by’oha? Ruhanga akakoresa omwoyo gurikwera kuha abahandiiki abo ebi baahandiikire. (2 Samueli 23:2) Bakahandiika ebiteekateeko bya Ruhanga beitu bitari byabo. N’ahabw’ekyo, Yehova niwe yaahandiikiise Baibuli.—Shoma 2 Timoseo 3:16; 2 Petero 1:20, 21.

Nitumanya ngu Baibuli neeruga ahari Ruhanga ahakuba neegamba aha biraabeho omu biro by’omumaisho kandi bibaho. Tihaine omuntu orikubaasa kukora ekyo. (Yoshua 23:14) Ruhanga ow’Obushoboorozi Bwona niwe wenka orikumanya gye ebirikuba nibiza kubaho.—Shoma Isaaya 42:9; 46:10.

Ahabw’okugira ngu Baibuli neeruga ahari Ruhanga, n’ey’omutaano. Baibuli nyingi munonga zibaasize kugabwa omu ndimi nyingi. N’obu eraabe yaahandiikirwe ira neikirizana n’ebya sayansi ebihikire. Kandi n’ebi abashaija 40 baahandiikire nibiikirizana. * Ekindi, ebi Baibuli erikugamba ahari rukundo buzima nibyoreka ngu neeruga ahari Ruhanga oine rukundo, neehwera n’abantu kugira emitwarize mirungi. Ebi byona nibireetera  abantu baingi kwikiriza ngu Baibuli n’Ekigambo kya Ruhanga.—Shoma 1 Abatesalonika 2:13.

Kimwe aha bintu bikuru ebi erikugambaho n’ekigyendererwa kya rukundo eki Ruhanga ainiire abantu. Neeyoreka oku omuntu ira yaafeereirwe omugisha gw’okuguma omu paradiso n’oku eraije kugarurwaho.—Shoma Okushuuruurwa 21:4, 5.

Baibuli erimu n’ebiragiro, emisingye n’obuhabuzi. Kandi erimu ebirikukwata aha ku Ruhanga yaabaire atwariza abantu. Ebyo nibituhwera kumanya emitwarize ye. N’ahabw’ekyo, Baibuli neekuhwera kumanya Ruhanga. Neeyoreka oku orikubaasa kuba munywani we.—Shoma Zaaburi 19:7, 11; Yakobo 2:23; 4:8.

Akatabo aka nikaija kukuhwera kwetegyereza Baibuli orikukoresa omuringo nk’ogu Yesu yaakoreise. Akaba agamba ebyahandiikirwe kandi ‘ashoboorora’ amakuru gaabyo.—Shoma Luka 24:27, 45.

Amakuru marungi kuruga ahari Ruhanga nigo garikukirayo kureeta okushemererwa. Kwonka abamwe tibarikugafaho kandi abandi nibaganga. Kwonka ekyo kitakaakumaramu amaani. Okumanya Ruhanga nikikubaasisa kugira amatsiko g’okutunga amagara agatahwaho.—Shoma Yohaana 17:3.