Iwe n’ou ori nawe omu bushwere timurikubaasa kwetantarira kimwe oburemeezi. Nibubaasa kureetwa okugira enyehurira zitarikushushana, emiteekateekyere n’emitwarize etarikushushana. Nari oburemeezi nibubaasa kuruga ahandi.

Noobaasa kwenda kwehuzya oburemeezi, kwonka Baibuli neetuhabura kushoboorora oburemeezi obu turikuba twine. (Matayo 5:23, 24) Omuringo murungi gw’okushoboororamu oburemeezi n’okugyendera aha misingye ya Baibuli.

EKI BAIBULI ERIKWEGYESA: ‘Hariho . . . obunaku bw’okugamba.’ (Omubuurizi 3:1, 7) Mwine kugira obwire bw’okugaaniira aha buremeezi obu mwine. Gambira ou ori nawe omu bushwere oku orikwehurira n’eki orikuteekateeka aha buremeezi obwo. Obutoosha ogambe “amazima” n’ou ori nawe omu bushwere. (Abaefeso 4:25) N’obu waakuba oine ekiniga, yetantare kurwana. Waagarukamu oikaikaine, nikikuhwera kwetantara kutongana.—Enfumu 15:4; 26:20.

N’obu mwakuba mutaikirizaine, yoreka ngu nookunda ou ori nawe omu bushwere kandi ngu noomuha ekitiinisa. (Abakolosai 4:6) Teeraho kushoboorora oburemeezi ahonaaho kandi ogume noogaaniira nawe.—Abaefeso 4:26.

EKI ORIKUBAASA KUKORA:

• Taho obwire burungi bw’okugaaniira aha buremeezi obu mwine

• Ou ori nawe omu bushwere yaaba aine eki arikugamba, yetantare kugamba

EKI BAIBULI ERIKWEGYESA: “Mukundane buzima; omu kuhaana ekitiinisa, buri muntu ateekateekye ahari mugyenzi we okumweshumba.” (Abarooma 12:10) Ou ori nawe omu bushwere yaaba naagamba, ni kikuru kuhurikiza gye. Fayo kwetegyereza ebi arikugamba “n’omutima omucureezi.” (1 Petero 3:8; Yakobo 1:19) Hurikiza oyihire aha omutima. Kyaba nikibaasika, noobaasa kureka ebi waaba nookora omuhurikize nari omushabe ngu mugaaniire bwanyima. Waamanya ngu oine kukwatanisa n’ou ori nawe omu bushwere omu bi orikukora, nikiija kukuhwera ‘kutarahuka kugira ekiniga.’—Omubuurizi 7:9.

EKI ORIKUBAASA KUKORA:

• Guma ohurikiize kandi ogire emiteekateekyere ehikire n’obu yaakukugambira ebitarikukushemeza

• Yetegyereze eki arikukugambira, omuringo ogu yaagambamu, n’eiraka eri yaakoresa

EKI BAIBULI ERIKWEGYESA: “Omu kufa kubi okw’emiringo yoona habamu omugasho; kwonka okugamba kwonka kureeta obworo.” (Enfumu 14:23) Okwikirizana kwonka aha ku muraashoboorore oburemeezi tikirikumara. Mwine kuteeraho kuta omu nkora ebi mwacwamu. Eki nikibaasa kubeetengyesa kukora n’amaani kwonka niharugamu ebirungi. (Enfumu 10:4) Mwakorera hamwe, nimwija kutunga emigisha ahabw’okukora n’amaani.—Omubuurizi 4:9.

EKI ORIKUBAASA KUKORA:

• Mucwemu eki buri omwe aine kukora kubaasa kushoboorora oburemeezi obu mwine

• Mugume nimweshwijuma kureeba yaaba nimuta omu nkora ebi murikucwamu