Amatsiko Buzima Haine eki Garikuhwera?

DANIEL akaba aine emyaka ikumi yonka kwonka akaba arwaire ekookoro kumara omwaka. Abashaho banywani be bakaba beehwaire amatsiko. Kwonka we Daniel akaba ahamiire aha matsiko. Akaba aine amatsiko ngu naija kukura abe omucondooza, kandi ahwere omu kusherura omubazi gw’ekookoro. Okukira munonga akaba aine amatsiko omu mushaho owaabaire naija kumureeba kandi owaabaire ari omuhangu omu kujanjaba ekookoro nk’ei Daniel yaabaire aine. Kwonka eizooba ku ryahikire, omushaho omuhangu ogwo akacwamu kushazamu okutaayaaya kwe ahabw’embeera mbi y’obwire. Daniel akeehwa amatsiko. Obu nibwo yaabanza kureebwa atamirwe ensi. Akafa omu biro bikye.

Ebyahikire ahari Daniel bikagambwa orikukora aha by’obujanjabi owaayegire aha ku amatsiko n’okwehwa amatsiko birikubaasa kukwata aha magara. Noobaasa kuba orahuriire ebitebyo nk’ebi. Omuntu okaikwire kandi ari haihi kufa kwonka abaasize kuhika aha bintu bikuru ebi ainiire ekihika nk’omunyabuzaare kumutaayaayira, nari okwijuka omukoro mukuru. Bwanyima y’okuhika aha kintu nk’eki, omuntu naabaasa kurahuka kufa. Ekirikuhwera abantu kwehangaana niki? Mbwenu shi amatsiko nigabaasa kuhangaana omuntu nk’oku abamwe barikwikiriza?

Abacondooza baingi omu by’ekishaho nibagira ngu okuba endeebera birungi, okugira amatsiko, n’ezindi nyehurira nungi nibikora kihango aha magara g’omuntu. Kwonka abamwe tibarikwikirizana n’emiteekateekyere egyo. Abacondooza abamwe nibagira ngu ebyo n’ebitebyo ebi saayansi etarikubaasa kuhamya. Nibakunda kugira ngu endwara z’omubiri niziba zireetsirwe ekintu ekiri omu mubiri.

Okubangaanisa aha bukuru bw’amatsiko ti kisya. Enkumi n’enkumi z’emyaka enyima, the Greek philosopher Aristotle akashabwa kushoboorora amatsiko kandi akagarukamu ati: “N’ekirooto eki omuntu arikuba aine yaaba atagwejegyeire.” Kandi omu myaka ya juba, ow’eby’obutegyeki omuri America orikwetwa Benjamin Franklin akagira ati: “Omuntu orikwesiga amatsiko, naija kufa aine enjara.”

Mbwenu shi ni mazima ki agarikukwata aha matsiko? Mbwenu shi butoosha nibiba biri ebirooto ebi abantu barikuba baine kwonka ebitarikuza kuhikiirira? Nari hariho enshonga zihikire ezishemereire kutureetera kureeba amatsiko nk’ekintu ekyabuzima kandi ekiine omugasho eki twena twine kugira, ahabw’amagara marungi n’okushemererwa?