Abazaire abarikutaho eky’okureeberaho, nibagyendera aha bi barikwegyesa. Nk’eky’okureeberaho, toine kuteekateeka ngu omwana waawe naija kugamba amazima yaaba arakuhuriireho noogira oti: “Mugire ngu tindi muka,” waaba otarikwenda kugamba n’omuntu orikwiguza aha rwigi.

“Hariho engamba ngu ‘kora eki naakugambira, beitu kitari eki ndikukora.’ Kwonka ekyo tikirikukora aha baana. Bari nk’omufaratsi nibanyuunyuta buri kimwe eki turikugamba n’eki turikukora, nibaija kutugambira eky’okureeberaho kyaitu kyaba kitarikuhikaana n’ebi turikubeegyesa.”​—David.

OMUSINGYE GWA BAIBULI: ‘Iwe orikubuurira abandi okutaiba, noiba?’​—Abarooma 2:21.

Abaana nangwa n’emishogoyo nibakwatwaho ebi abazaire baabo barikukora kukira ondiijo muntu, otwariiremu n’ab’orwingano rwabo. Eki nikimanyisa ngu niiwe ohikire kuhabura abaana baawe omuhanda oguhikire, waaba nookora ebi orikugambira abandi.

“Nitubaasa kugarukamu ekintu emirundi igana twebuuze yaaba omwana naahurira, kwonka omurundi gumwe ogu turaaremwe kukora eki turikugamba, omwana naija kukitugambira. Abaana nibata omutima ahari buri kimwe eki turikukora, n’obu turikuba tutarikuteekateeka ngu nibakikora.”​—Nicole.

OMUSINGYE GWA BAIBULI: ‘Obwengye oburikuruga omu iguru tiburimu bugobya.’​—Yakobo 3:17.

Shwijuma emitindo eyaawe. Ni by’okweshemeza ki ebi orikureeba? Nootwariza ota omukundwa waawe n’abaana? Oine banywani ki? Noofayo aha bandi? Omu bugufu, eki orikwenda ngu abaana baawe babe, nikyo ori?

“Nyowe na ibanyi titurikushaba abaana baitu kukuratira omutindo, ogu itwe tutarikwenda kukuratira.”​—Christine.

Shaba okusaasirwa ahabw’enshobe zaawe. Abaana baawe nibakimanya ngu tohikiriire. Waagambira omukundwa waawe n’abaana baawe ngu “munsaasire” kyaba nikyetengyesa, nooyegyesa abaana baawe kuba ab’amazima kandi abacureezi.

“Abaana baitu nibaba nibenda kuhurira turikwikiriza ngu twakora enshobe, kandi nibaba nibenda kuhurira turikushaba okusaasirwa ahabw’enshobe zaitu. Twaba tutakikozire, nibaija kushereka enshobe zaabo.”​—Robin.