OMURI 1970, abarikwetegyereza ebizoirwe omu itaka bakazoora omuzingo gwokiibwe omuri Israeli ahari Ein Gedi, haihi n’enkungu ya Dead Sea. Bakabona omuzingo ogu, obu baabaire nibazikuura ebitsigarira bya sinagogi, eyaayokiibwe obu baacwekyereza ekyaro, nk’omu kyasha kya mukaaga Y.A.K. Ahabw’okugira ngu omuzingo ogu gukaba guri omu mbeera mbi, kikaba kitarikubaasika kuguzingurura kushoma ebiriho gutacwekire. Kwonka nitusiima abahangu abaakoreise ekyoma n’omuringo gw’okushoma ebitazinguriirwe, reero bakareeba ebiri aha muzingo ogu. Ekyoma eki kiine enkora erikukibaasisa kuteera ebishushani, n’okushoma ebiri aha muzingo gutazinguriirwe.

Omuzingo ogu gukaba guriho ki? N’ebigambo by’omu Baibuli. Ebiri aha muzingo ogu n’emishororongo y’okubanza omu kitabo ky’Abaleevi. Emishororongo egi erimu eiziina rya Ruhanga omu nyuguta ina ez’Oruheburaayo. Okucondooza nikworeka ngu omuzingo ogu nigubaasa kuba gwahandiikirwe aha gati y’ekyasha ky’okubanza Y.A.K. n’ekyasha kya kana Y.A.K., ekirikugureetera kuba ogwa kabiri omu bukuru aha bihandiiko bya Qumran nari Dead Sea ebyabandize kujumburwa. Gil Zohar akahandiika omu rupapura rw’amakuru Jerusalem Post ati: “Kuhitsya obu ebiri aha kacweka k’ekitabo ky’Abaleevi omuri Ein Gedi byashomwa, hakaba hahingwireho emyaka rukumi kuruga obu baazoora emizingo erikukirayo obukuru eya Dead Sea omuri 100 Y.A. kuhika aha mizingo erikukurataho obukuru eya Aleppo Codex omu 930 Y.A.K.” Kurugiirira aha bahangu, ebihandiikirwe aha muzingo ogu ogutazinguriirwe nibyoreka ngu ebihandiiko bya Baamasoreti ebirikwetwa Tora “birinzirwe gye kumara emyaka rukumi, kandi ngu tibirimu nshobe z’abavunuuzi.”