LUZIA AINE OKUGURU KWA BUMOSHO KWONKA. Obu yaabaire ari omwana, akarwara polio, endwara erikuturira munonga, kandi erikuremesa ebicweka by’omubiri ebimwe kuhurizana n’obwongo. Luzia ku yaahikize emyaka 16, omukazi ou yaabaire naakorera akamugira ati: “Ruhanga akakufubira n’endwara egi ahabw’okugira ngu okaba ori omugomi kandi ekirikunugwa ahari nyoko.” Hahingwireho obwire, kwonka na hati Luzia naijuka oku ekyo kyamukozire kubi.

DAMARIS KU YAARWAIRE EKOOKORO Y’OBWONGO, ishe akamubuuza ati: “Okozire ki kuza kuhikwaho eki? Oshemereire kuba okozire ekintu kibi munonga. Niyo nshonga ahabw’enki Ruhanga ariyo naakufubira.” Ebigambo ebyo bikamaramu Damaris amaani.

Kumara emyaka mingi abantu batwire nibateekateeka ngu okurwara n’ekifubiro kuruga ahari Ruhanga. Ekitabo Manners and Customs of Bible Lands nikigira ngu obu Kristo yaabaire ari omu nsi, baingi bakaba nibaikiriza ngu “omuntu yaashiisha, nari abanyabuzaare be bakashiisha, naatunga ekifubiro ky’endwara.” Ekitabo Medieval Medicine and the Plague nikigira ngu emyaka mingi Yesu aherize kuruga omu nsi, “abantu abamwe bakaba nibaikiriza ngu Ruhanga naareeta endwara kubafubira ahabw’eby’okushiisha byabo.” Mbwenu shi obukaikuru bw’abantu omuri Europe ku baitsirwe endwara egi omu kyasha kya 14, Ruhanga akaba abacwereire orubanja ngu n’abantu babi? Nari endwara egyo ekareetwa akakooko, nk’oku abacondooza omu by’ekishaho baayetegyereize? Abamwe nibabaasa kwebuuza bati: Mbwenu shi Ruhanga buzima naakoresa endwara kubonabonesa abantu ahabw’ebibi byabo? *

TEEKATEEKA AHARI EKI: Ahabw’enki Yesu yaakirize abaabaire barwaire, Ruhanga ku araabe naakoresa endwara n’okubonabona kufubira abantu? Mbwenu shi obwo Yesu takaabaire naahakanisa ebikorwa bya Ruhanga? (Matayo 4:23, 24) Ekyo akaba atarikubaasa kukikora. Akagira ati: “Obutoosha nkora ebimushemeza,” kandi “nyowe nkora nk’oku Tata yandagiire.”​—Yohaana 8:29; 14:31.

Baibuli neeyoreka gye ngu Yehova Ruhanga n’omuringaaniza. (Eky’Ebiragiro 32:4) Nk’eky’okureeberaho, Ruhanga tarikubaasa kureetera enyonyi kutunga butandu, ekaita abantu baingi munonga abataine rubanja, ahabw’okwenda kufubira omuntu omwe ori omu nyonyi egyo! Abrahamu omuheereza wa Ruhanga omwesigwa arikugamba aha kuhikiirira kwa Ruhanga, akagira ngu Ruhanga tarikubaasa “kucwekyereza abahikiriire hamwe n’ababi.” Akagira ngu ekyo “nikikabure.” (Okutandika 18:23, 25) Kandi Baibuli neegira ngu “Ruhanga tarikora kubi” nari “okukora ebitahikire.”​—Yobu 34:10-12.

Twabonabona titushemereire kugira ngu Ruhanga ariyo naatufubira ahabw’ekibi eki tukozire. Yesu akashoboorora gye enshonga egi obu we n’abeegi be baareeba omushaija empumi. ‘Abeegi be bakamubuuza bati: Rabi, owaasiisire n’oha, n’omushaija ogu, nari n’abaamuzaire, nikyo yaazaariirwe ari empumi? Yesu akagarukamu ati: Tarahumisiibwe kushiisha kwe nari okw’abazaire be, kureka kikabaho ngu emirimo ya Ruhanga eyorekyerwe ahariwe.’​—Yohaana 9:1-3.

Ahabw’okugira ngu abeegi ba Yesu bakaba baine emiteekateekyere etahikire, baine kuba baatangaire Yesu ku yaabagambiire ngu omushaija ogwo tarabaire mpumi ahabw’okushiisha kwe nari okw’abazaire  be. Yesu ku yaakirize omushaija ogwo, akooreka ngu okugira ngu okubonabona n’ekifubiro kuruga ahari Ruhanga kigwire. (Yohaana 9:6, 7) Abaine endwara z’amaani obunaku obu nikibaasa kubahuumuriza kumanya ngu Ruhanga tiwe arikubarwaza.

Ebyahandiikirwe nibituhamiza biti:

• “Ruhanga tabaasa kwohibwa kibi, kandi nawe” tarikugyeza muntu weena. (YAKOBO 1:13) Buzima ebintu bibi ebitwire nibiteganisa abantu kumara ebyasha bingi nk’endwara, obusaasi, n’okufa, nibiija kurugaho.

• Yesu Kristo akakiza “boona abaabaire barwaire.” (MATAYO 8:16) Omwana wa Ruhanga obu yaakiza abarwaire, akooreka eki Obukama bwa Ruhanga buraakore omu nsi yoona.

• ‘[Ruhanga] naija kuragaza amarira goona aha maisho gaabo; tiharikwija kubaho okufa bundi, n’obu kwakuba okucura nari okurira nari obusaasi, ahakuba ebya ira nibiija kuhwaho.’​—OKUSHUURUURWA 21:3-5.

Ahabw’enki abantu nibatunga obusaasi n’okubonabona kwingi? Abantu batwire nibateekateeka aha kibuuzo ekyo kumara emyaka mingi. Ku araabe atari Ruhanga n’oha orikureetaho okubonabona? Ebibuuzo ebi nibiija kugarukwamu omu kicweka ekirikukurataho.