1. Noobaasa kwebuuza ki?

OBUMWE nooyerarikirira ku orikuteekateeka aha birikuza kubaho omu biro by’omumaisho, ebirikutwariramu okucwekyerera kw’ediini z’ebishuba, okutaahirira kwa Googi wa Magoogi, n’orutaro rwa Haramagedoni? Oreebuurizeho oti: ‘Ebintu ebi ebirikutiinisa ku biraabeho, ninyija kuguma mpami?’ Ku oraabe oreebuurizeho otyo, okushwijuma ebigambo bya Yesu, eby’Ekyahandiikirwe ekikuru eky’ekicweka eki, nikiija kukuhwera munonga. Yesu akagambira abakuratsi be ati: “Emitima yaanyu etarishoberwa; mwikirize.” (Yoh. 14:1) Okwikiriza kuhami nikwija kukuhwera kworekyera ebiro by’omumaisho oine obumanzi.

2. Nitubaasa kuhamya tuta okwikiriza kwaitu, kandi nituza kushwijuma ki omu kicweka eki?

² Nitubaasa kuhamya okwikiriza kwaitu kwija kwemera okugyezibwa okuraabeho omumaisho, turikureeba oku twine kutwaza omu okugyezibwa okwa hati. Twateekateeka aha ku turikutwaza omu kugyezibwa okwa hati, nitubaasa kureeba ahu twine kuhamya okwikiriza kwaitu. Buri kusingura ekigyezo, okwikiriza kwaitu nikwongyera kuhama. Eki nikiija kutuhwera kugumisiriza okugyezibwa okuraabeho nyentsya. Omu kicweka eki, nituza kushwijuma embeera ina ezaayorekire ngu abeegi ba Yesu baine kwongyera aha kwikiriza kwabo. Reero nituza kureeba oku naitwe turikubaasa kuhikwaho embeera nk’ezo hati, n’oku embeera ezi zirikubaasa kututebeekanisiza ebiraabeho omu biro by’omumaisho.

3. Omuri Matayo 6:30, 33, Yesu akagamba ahari ki ekiine akakwate n’okwikiriza?

³ N’ekya butoosha omutwe gw’eka kwenda kuha omukazi we n’abaana eby’okurya birikumara, ebijwaro, n’oburaaro. Eki tikyorobi  kukora omu biro ebi ebigumire. Obumwe, ab’eishe-emwe nibafeerwa emirimo yaabo, kandi n’obu barikuteeraho kusherura ogundi tibarikubaasa kugutunga. Abandi nibanga kukora omurimo ogutashemereire kukorwa Abakristaayo. Omu mbeera ezi zoona, twine kugira okwikiriza kuhami ngu Yehova naija kutuhwera kutunga eby’okubaisaho amaka gaitu. Enshonga egi Yesu akagigambira abeegi be butunu omu Rubazo rwe orw’aha Rushozi. (Shoma Matayo 6:30, 33.) Twaba nituhamiza kimwe ngu Yehova tarikwija kututsigaho, nitwija kuta omutima aha kwebembeza ebikuru nibyo eby’Obukama. Twareeba oku Yehova arikutuhwera kutunga eby’okutubaisaho, nitwija kwongyera kumwirira haihi kandi okwikiriza kwaitu nikwija kuhama.

4-5. Niki ekyahwereire eka emwe kusingura okwerarikirira aha by’okwebaisaho?

⁴ Yetegyereze oku eka emwe omuri Venezuela yaareebire obuhwezi bwa Yehova obu baabaire beerarikiriire aha by’okwebaisaho. Haine obu ab’eka ya Castro baabaire nibatunga esente ziringaniire ez’okwebaisaho kuruga omu misiri yaabo. Bwanyima, emihiri yaija n’embundu ekabagyemesereza kuruga omu itaka ryabo, baaritwara. Ishebo, Miguel, naagira ati: “Hati nitubaisibwaho ebi turikuhinga omu eitaka rikye ry’empangisano. Nintandika buri izooba ndikushaba Yehova kutuha eby’okurya by’eizooba eryo.” Embeera z’eka ya Castro tizoorobi, kwonka ahabw’okwikiririza kimwe omuri Tataitwe ngu naija kubaha eby’okubabaisaho buri izooba, butoosha nibaza omu nteerane z’ekibiina, kandi nibeejumba n’omu kubuurira. Nibeebembeza eby’Obukama kandi Yehova naabahwera kutunga eby’okubabaisaho.

⁵ Omu mbeera ezo ezigumire, Miguel n’omukazi we, Yurai, bareebire oku Yehova arikubareeberera. Obumwe Yehova naakoresa ab’eishe-emwe kuha Miguel eby’okubaisaho eka ye nari kumuhwera kutunga omurimo. Kandi obundi, Yehova naababaasisa kutunga eby’okwebaisaho kurabira omu ntebeekanisa y’okuhwera abahikirweho ebihikiirizi aha ofiisi y’eitaagi. Yehova agumire naabashagika. N’ekirugiremu, baareebire oku okwikiriza kw’eka yaabo kurikwongyera kuhama. Yoseli muhara waabo omukuru bwanyima y’okugamba omuringo gumwe ogu Yehova yaabahwerairemu, naagira ati: “Nikihuumuriza kureeba omukono gwa Yehova butunu. Niimureeba nka munywani wangye ou ndikubaasa kwesiga obwire bwona.” Naayongyeraho ati: “Okugyezibwa kw’eka yaitu kututebeekanisiize okugyezibwa kw’amaani okuraabeho omu biro by’omumaisho.”

6. Noobaasa kuhamya ota okwikiriza kwawe waaba oine oburemeezi omu by’entaatsya?

⁶ Oine oburemeezi omu by’entaatsya? Kyaba nikwo kiri, buzima embeera zikugumiire. Kwonka, noobaasa kukoresa obwire obwo kuhamya okwikiriza kwawe. Shaba kandi oshome ebigambo bya Yesu ebiri omu Matayo 6:25-34 reero obiteekateekyeho. Shwijuma eby’okureeberaho eby’obunaku obu ebirikworeka ngu Yehova naareeberera  abarikwecurengyera emirimo y’Obukama. (1 Kor. 15:58) Eki nikiija kukuhwera kwongyera kwesiga Sho ow’omu iguru ngu nk’oku ahweraire abandi abari omu mbeera nk’eyaawe, naiwe naija kukuhwera. Naamanya ebi orikwenda, kandi naamanya oku arikwija kubikuha. Waayetegyereza oku Yehova ariyo naakuhwera, okwikiriza kwawe nikwija kwongyera kuhama kugira ngu oije oyemere ebigyezo by’amaani omu biro by’omumaisho.—Hab. 3:17, 18.

7. Omu Matayo 8:23-26, “eihunga ry’amaani” rikagyeza rita okwikiriza kw’abeegi ba Yesu?

⁷ Eizooba rimwe Yesu akaba ari n’abeegi omu bwato aha nyanja, reero haabaho eihunga ry’amaani. Yesu akakoresa embeera egyo kubahwera kumanya ahu baine kwongyera amaani omu kwikiriza kwabo. (Shoma Matayo 8:23-26.) Eihunga ku ryatabukire, amaizi gakeeshuka omu bwato, kwonka Yesu akaba agwejegyeire. Abeegi ku baamwimukize bakamugambira kubacungura, akabahana omu muringo gw’embabazi ati: “Nimutiina ki, imwe abaine okwikiriza kukye?” Abeegi abo abaabaire batiinire bakaba baine kukimanya ngu Yehova naabaasa kurinda Yesu n’abari nawe kutahikwaho akabi. Nooreeba eishomo rikuru? Okwikiriza kuhami nikubaasa kutuhwera kusingura “eihunga ry’amaani,” yaaba n’erya butunu nari ery’akamanyiso.

8-9. Okwikiriza kwa Anel kukagyezibwa kuta, kandi niki ekyamuhweraire?

⁸ Yetegyereze oku Anel, munyaanyazi-itwe otari mu bushwere kuruga Puerto Rico, yaaraabire omu kugyezibwa kw’amaani ahabw’okugira okwikiriza kuhami. Bakateerwa “eihunga ry’amaani” erya butoosha. Ekigyezo ekyo kikabaho omu 2017 obu eihunga eririkwetwa Maria ryacwekyereza enju ya Anel. Ahabw’eihunga eryo akafeerwa omurimo gwe. “Nkeerarikirira munonga omu bwire obwo obugumire,” nikwo Anel arikugira, “kwonka nkeega kwesiga Yehova kurabira omu kushaba n’okutaikiriza okwerarikirira kuumaramu amaani.”

⁹ Anel naagira ngu okworoba nikyo ekintu ekindi ekyamuhweraire kwemera okugyezibwa. Naagira ati: “Okukuratira obuhabuzi bw’ekibiina kikampwera kuguma nyikaikaine. Nkareeba omukono gwa Yehova kurabira omu b’eishe-emwe abaangumize omu by’omwoyo, n’obuhwezi bw’eby’omubiri obu baampaire.” Naayongyera ati: “Yehova akampa bingi kukira ebi naakubaasize kushaba, kandi okwikiriza kwangye kukahama munonga.”

10. Noobaasa kukora ki waahikwaho “eihunga ry’amaani”?

¹⁰ Oriyo nooraba omu ‘ihunga ry’amaani’? Eki nikibaasa kutwariramu embeera zigumire ahabw’ekihikiirizi ekirikwereeta. Nari niribaasa kuba riri eihunga ery’akamanyiso, nk’okugira endwara y’amaani erikukureetera kugira amaganya n’okushobangirirwa. Obumwe noobaasa kwerarikirira, kwonka okwerarikirira  tikushemeire kukureetera kurekyera aho kugumizamu nooyesiga Yehova. Yirira haihi Yehova orikumweshengyereza omu kushaba. Hamya okwikiriza kwawe orikuteekateeka aha mirundi ey’enyima obu Yehova yaakuhwera. (Zab. 77:11, 12) Noobaasa kugira obwesigye ngu tarikwija kukutsigaho hati n’omu biro by’omumaisho.

11. Ahabw’enki tushemereire kumariirira kworobera obuhabuzi bw’abarikureeberera ekibiina?

¹¹ Niki ekindi ekirikubaasa kukuhwera kwemera okugyezibwa? Nk’oku Anel yaagamba aha kworoba. Yega kwesiga abu Yehova na Yesu barikwesiga. Obumwe, abatoorainwe kwebembera ekibiina nibabaasa kutugambira kukuratira obuhabuzi oburikureebeka nk’obutarikukora makuru ahariitwe. Kwonka, twayoroba Yehova naatuha emigisha. Nitukimanya gye kuruga omu Kigambo kye n’eby’okureeberaho by’abaheereza be abeesigwa ngu okworoba ni kujuna amagara. (Kur. 14:1-4; 2 Bus. 20:17) Teekateeka aha by’okureeberaho nk’ebyo. Waakikora nikiija kukuhwera kumariirira kukuratira obuhabuzi bw’ekibiina hati n’omu biro by’omumaisho. (Heb. 13:17) Ekiraarugyemu torikwija kutiina na kakye eihunga ry’amaani eri tworekyeire.—Enf. 3:25.

12. Luka 18:1-8 nihooreka hata ngu okugira okwikiriza kwine akakwate n’okugumisiriza obutari buringaaniza?

¹² Yesu akaba naamanya ngu obutari buringaaniza nibwija kugyeza okwikiriza kw’abeegi be. Kubaasa kubahwera kusingura oburemeezi obwo, akaha eky’okureeberaho ekiri omu kitabo kya Luka. Yesu akabagambira aha mufaakazi owaabaire naasherura oburingaaniza ow’omuramuzi. Akaba naahamya ngu okugumisiriza kwe nikwija kurugamu ebirungi. Aha muheru, omuramuzi akahurira okweshengyereza kwe. Eki nitukyegaho ki? Yehova n’omuringaaniza. N’ahabw’ekyo Yesu akagira ati: “Nimugira ngu Ruhanga tarishoboorora entoore ze, ezimutakira nyomushana na nyekiro?” (Shoma Luka 18:1-8.) Reero Yesu akoongyeraho ati: ‘Omwana w’omuntu ku ariija, ebyo naija kushanga okwikiriza oku omu nsi?’ Twahikwaho obutari buringaaniza, twine kworeka omu kugumisiriza kwaitu ngu twine okwikiriza kuhami nk’omukazi ogwo efaakazi. Twaba twine okwikiriza nk’okwo, nitubaasa kuhamya ngu Yehova naija kugira eki yaakora kutuhwera juba nari nyentsya. Kandi twine n’okwikiririza omu maani g’okushaba. Obumwe, okushaba kwaitu nikubaasa kuruga ebi tubaire tutarikuteekateeka.

13. Okushaba kukahwera kuta eka emwe eyaahikirweho obutari buringaaniza?

¹³ Teekateeka aha ky’okureeberaho kya munyaanyazi-itwe Vero, owa Democratic Republic of Congo. Vero, iba otari mu mazima, na muhara waabo w’emyaka 15 bakaba bakahunga omu kyaro kyabo ahabw’okutaahirirwa baarwebandira b’embundu. Omu kuhunga, bakahika ahu baarwebandira abo  baabaire bari bakingire n’oruguuto kandi baabatiinatiinisa kubaita. Vero ku yaatandikire kurira, omuhara akateeraho kumucureeza arikushaba omu iraka ririkuhurirwa munonga arikukoresa eiziina Yehova omu kushaba kwe. Ku yaaherize kushaba, omuduumizi wa baarwebandira abo akamubuuza ati: “Mwishiki we, n’oha owaakwegyeise kushaba?” Akamugarukamu ati: “Ni maama, arikukoresa okushaba kw’eky’okureeberaho okuri omu Matayo 6:9-13.” Omuduumizi ogwo akamugira ati: “Mwishiki we, ogyende n’abazaire baawe omu busingye, kandi Yehova Ruhanga waawe n’abarinde!”

14. Okwikiriza kwaitu nikubaasa kugyezibwa kuta, kandi niki ekiraatuhwere kugumisiriza?

¹⁴ Eby’okureeberaho nk’ebyo nibitwegyesa ngu titushemereire kugaya amaani g’okushaba. Kwonka shi okushaba kwaitu kwaba kutagarukirwemu ahonaaho nari omu muringo gw’eky’okutangaaza? Nk’efaakazi omu ky’okureeberaho kya Yesu, guma nooshaba, orikuhamya ngu Ruhanga tarikwija kukutsigaho, kandi omu bwire buhikire naija kureeba oku araagarukyemu okushaba kwawe. Gumizamu nooyeshengyereza Yehova kukuha omwoyo gurikwera. (Fil. 4:13) Ijuka ngu juba Yehova naija kukuha emigisha mingi obaase n’okwebwa okubonabona kwona okw’enyima. Yehova yaakuhwera kwemera okugyezibwa hati, ekyo nikiija kukugumya ahabw’ebiri haihi kubaho.—1 Pet. 1:6, 7.

15. Nk’oku kiri omu Matayo 17:19, 20, abeegi ba Yesu bakatunga buremeezi ki?

¹⁵ Yesu akeegyesa abeegi be ngu okwikiriza nikwija kubahwera kusingura emirabanamu. (Shoma Matayo 17:19, 20.) Nk’eky’okureeberaho haine obu baaremwa kubinga daimoni, n’obu baraabe baabaire baakikozireho. Oburemeezi bukaba burahi? Yesu akagira ngu bakaba baine kugira okwikiriza kwingi. Akabagira ngu baagira okwikiriza kwingi, nibabaasa kusingura oburemeezi oburi nk’enshozi! Naitwe hati, nitubaasa kuhikwaho oburemeezi oburikureebeka nk’obutarikubaasika.

16. Okwikiriza kuhweraire kuta Geydi kwemera akagwe n’obusaasi bwingi?

¹⁶ Yetegyereze eky’okureeberaho kya munyaanyazi-itwe Geydi, owa Guatemala. Iba orikwetwa Edi, akaitwa barikuruga omu ruteerane rw’ekibiina. Okwikiriza kwa Geydi kumuhwera kuta kwemera obusaasi obwo? Naagira ati: “Okushaba nikumpwera kwegyekyera Yehova oburemeezi bwangye, ekirikundeetera kugira obusingye. Nindeeba oku Yehova arikunfaho arikukoresa ab’eka yangye n’abanywani omu kibiina. Okugira bingi by’okukora omu kibiina kya Yehova nikimpwera kuraba omu izooba rimwe-rimwe ntarikwerarikirira munonga ahari nyenkyakare. Bwanyima y’okuraba omu mbeera egi, nyegire ngu n’obu ndagyezibwe kirikwingana ki omu biro by’omumaisho, ninyija kusingura ahabw’okuhwerwa Yehova, Yesu, n’ekibiina.”

17. Noobaasa kukora ki waaba oine oburemeezi oburi nk’orushozi?

 ¹⁷ Oine enaku nyingi ahabw’okufeerwa omukundwa? Yongyera kwikiririza omu kuzooka orikushoma aha barikugambwaho omu Baibuli abaazookire. Oine obusaasi ahabw’okubingwa kw’omwe omu ka yaawe? Yeyegyese oyongyere kuhamya oku Ruhanga arikuhana nikwo kurikukirayo oburungi. Oburemeezi obu oine, bureebe nk’omugisha gw’okuhamya okwikiriza kwawe. Gambira Yehova ebiri omu mutima gwawe. Oteetaanisa aha bandi, kureka guma haihi n’ab’eishe-emwe na banyaanyako. (Enf. 18:1) Yejumbe omu biraakuhwere kugumisiriza, nangwa n’obu oraabikore orikurira. (Zab. 126:5, 6) Guma nooyejumba omu nteerane butoosha, omu kubuurira, n’okushoma Baibuli. Kandi ta omutima aha migisha nyamwingi ei Yehova akubiikiire. Waaguma nooreeba oku Yehova arikukuhwera, okwikiriza kwawe omuriwe nikwija kweyongyera kuhama.

18. Waamanya ahu oine obweremwa omu kwikiriza kwawe, noobaasa kukora ki?

¹⁸ Ebigyezo eby’enyima nari ebya hati byayoreka ahu oine obweremwa omu kwikiriza kwawe, otahwa amaani. Gureebe nk’omugisha gw’okuhamya okwikiriza kwawe. Shaba nk’oku entumwa za Yesu, abaagizire bati: “Twongyereho okwikiriza.” (Luk. 17:5) Kandi, teekateeka aha by’okureeberaho ebyagambwaho omu kicweka eki. Nka Miguel na Yurai, ijuka emirundi yoona obu Yehova yaakuhwera. Nka muhara wa Vero na Anel, yeshengyereze Yehova, na munonga omu buremeezi bw’amaani. Kandi nka Geydi, yetegyereze ngu Yehova naabaasa kukuhwera kurabira omu b’eka yaawe nari abanywani. Waikiriza Yehova kukuhwera kuraba omu buremeezi bwawe, noija kwongyera kugira obwesigye ngu naija kukuhwera kuraba omu kugyezibwa kwona okuraabeho omu biro by’omumaisho.

19. Yesu akaba aine bwesigye ki, kandi itwe nitubaasa kugira buhame ki?

¹⁹ Yesu akooreka abeegi be ahu baabaire baine obweremwa omu kwikiriza kwabo, kwonka akaba atarikubangaanisa ngu Yehova yaabahwera nibaija kusingura okugyezibwa okw’ebiro by’omumaisho. (Yoh. 14:1; 16:33) Akaba naahamiza kimwe ngu okwikiriza nikwija kuhwera abantu nyamwingi kuhonokaho omu okubonabona bwingi. (Kush. 7:9, 14) Noija kuba omwe aharibo? Ahabw’embabazi za Yehova ezitatushemereire, noija kuba omwe aha baraahonokeho waakora kyona ekirikubaasika kuhamya okwikiriza kwawe hati!—Heb. 10:39.