1, 2. (a) Ahabw’enki ni kikuru ‘kwezirikira okushaba’? (b) Ni bibuuzo ki ebirikukwata aha kushaba ebi tushemereire kwebuuza?

“OBWIRE obugumire munonga kuguma nooreeba omu kiro, ni bwaba buri haihi kusheesha,” nikwo omushaija omwe owaakozireho nyekiro yaagizire. Hatariho kubanganisa, abararaireho nibareeba nyekiro nimubaasa kwikirizana nawe. Abakristaayo obunaku obu nabo tikirikuboorobera kuguma nibareeba omu by’omwoyo, ahabw’okugira ngu ensi ya Sitaane eri haihi kucwekyerezibwa. (Rom. 13:12) Ka nikiba kiri eky’obusaasi munonga kugwejegyera omu bunaku nk’obu! Ni kikuru munonga ‘kwerinda’ kandi tukagyendera aha buhabuzi bw’Ebyahandiikirwe oburikutuhiga ‘kwezirikira okushaba.’​—1 Pet. 4:7.

² Ahabw’okugira ngu turi omu bwire obugumire, ni kirungi kwebuuza oti: ‘Ndi omweziriki omu kushaba? Ninshaba obutoosha kandi omu miringo yoona? Ninkira kushabira abandi, nari ninta omutima aha kushaba ebi ndikwenda byonka? Okushaba ni kukuru kuta omu kucungurwa kwangye?’

3. Ni miringo ki ei turikubaasa kushabamu?

³ Omu baruha ei entumwa Paulo yaahandiikiire Abaefeso, akagamba aha “kushaba kw’emiringo yoona.” (Efe. 6:18) Omu kushaba kwaitu, obumwe nitutakira Yehova kutuhwera kutunga ebi turikwetenga n’okusingura oburemeezi. Ogwo “ohurira okushaba” twamutakira ngu atuhwere naatuhurira. (Zab. 65:2) Kwonka, twine n’okufayo aha kushaba okw’emiringo endiijo. Emiringo egi neetwariramu okuhimbisa, okusiima, n’okweshengyereza.

4. Ahabw’enki butoosha twine kuhimbisa Yehova twaba nitushaba?

⁴ Hariho enshonga nyingi ahabw’enki okushaba  kwaitu kushemereire kutwariramu okuhimbisa. Nk’eky’okureeberaho, nituba twine ekihika ky’okuhimbisa Yehova “ahabw’eby’amaani ebi akora” hamwe ‘n’obukuru bwe obutakareebwaga.’ (Shoma Zaaburi 150:1-6.) Omuhandiiki wa zaaburi akagira ati: “Buri izooba nkuhimbisa emirundi mushanju, ahabw’emicwere yaawe y’oburyo.” (Zab. 119:164) Buzima Yehova ashemereire kuhimbisibwa. N’ahabw’ekyo, tushemereire kuhimbisa Yehova omu kushaba kwaitu “buri izooba emirundi mushanju,” ekirikumanyisa okukikora butoosha.

5. Okusiima Yehova twaba nitushaba nikiturinda kita?

⁵Okusiima n’omuringo ogundi ogw’okushaba. Paulo akeehanangiriza Abakristaayo omuri Filipi ati: “Muteemereza omutima aha kintu kyona, kureka omuri byona mumanyise Ruhanga ebi murikwetenga omu kushaba n’okweshengyereza, kandi musiime.” (Fil. 4:6) Nitutunga obugwagye twasiima Yehova omu kushaba. Eki nikyetengyesa munonga ahabw’okugira ngu turi omu biro by’aha mperu, obu abantu baingi bari “entasiima.” (2 Tim. 3:1, 2) Buzima ensi egi erimu abantu baingi abatarikusiima. Twaba tuteegyendesereize, abantu nk’abo naitwe nibabaasa kutureetera kuba entasiima. Twasiima Ruhanga omu kushaba nikitureetera okumarwa kandi twetantara okwetomboita, n’okutonzya. (Yud. 16) Kandi emitwe y’amaka ku barikusiima Yehova omu kushaba kwabo, nikihiga abakazi baabo n’abaana baabo kugira omutima gw’okusiima.

6, 7. Okweshengyereza nikimanyisa ki, kandi nitubaasa kweshengyereza Yehova aha bikwatiraine naki?

⁶Okweshengyereza n’okushaba okurikuruga aha mutima okurikworeka oku turikwehurira. Ni ryari obu twine kweshengyereza Yehova? Twaba nituhiiganisibwa nari twine endwara y’amaani munonga, nituba twine kweshengyereza Yehova kutuhwera. Kwonka shi obu nibwo bwonka obu tushemereire kumweshengyereza?

⁷ Reeba eki Yesu yaagambire aha kushaba, kandi oyetegyereze eki yaagambire aha iziina rya Ruhanga, Obukama bwe, n’ekigyendererwa kye. (Shoma Matayo 6:9, 10.) Ensi egi eijwire ebikorwa bibi, kandi na zaagavumenti ziremirwe kuhikiiriza ebyetengo by’abantu ebikuru. Buzima, twine kushaba ngu eiziina rya Tataitwe ryezibwe kandi ngu n’Obukama bwe bwije bwiheho obutegyeki bwa Sitaane. Kandi, obu n’obunaku bw’okweshengyereza Yehova kubaasisa ebi akunda kukorwa omu nsi nk’oku birikukorwa omu iguru. N’ahabw’ekyo twaba nitushaba, ka tuteereho kwezirika kuguma nituhimbisa Yehova, nitumusiima kandi tumweshengyereze.

8, 9. Ahabw’enki titwine kucwera Petero n’entumwa ezindi orubanja ahabw’okugwejegyera omu musiri Gesesemaani?

⁸ N’obu entumwa Petero araabe yaayehanangiriize Abakristaayo ‘kwezirikira okushaba,’ nawe aine obunaku obu yaaremirwe kuguma ayezirikiire okushaba. Akaba ari omwe aha bakuratsi ba Yesu abaabaire bagwejegyeire obu Yesu yaabaire ari omu musiri Gesesemaani naashaba. Nangwa na bwanyima y’okubagira ngu bagume nibareeba, tibarabaasize.​—Shoma Matayo 26:40-45.

⁹ Omu mwanya gw’okucwera Petero n’entumwa ezindi orubanja ahabw’okutaguma nibareeba, twine kuguma nitwijuka ngu eizooba eryo bakaba baruhire munonga. Bakaba baaheza kutebeekanisiza omukoro gw’okuhingurwaho ogu baakurize omu mwabazyo ogwo. Kandi Yesu  akaba yaaheza kutandikaho omukoro ogurikwetwa Ekiihuro kya Mukama waitu, arikubateeraho eky’okureeberaho aha ku baakubaire nibaija kukuza okufa kwe omu biro by’omumaisho. (1 Kor. 11:23-25) “Ku baaherize kweshongora zaaburi, baashohora, baaza omu kibungo kya Zeituuni,” barikugyenda orugyendo ruraingwaho nibaraba omu nguuto za Yerusaalemu. (Mat. 26:30, 36) Nizibaasa kuba zaabaire zaarengire omuri shaaha mukaga z’ekiro. Ku ogire ngu okaba ori omu musiri Gesesemaani ekiro ekyo, naiwe obundi okaba noija kugwejegyera. Omu mwanya gw’okucwera entumwa orubanja ahabw’okugwejegyera, Yesu akagira ati: “Omutima gwo nigukunda, kwonka omubiri n’omweremwa.”

10, 11. (a) Ekyabaire ahari Petero omu musiri Gesesemaani nitukyegaho ki? (b) Ekyabaire ahari Petero nikikukwataho kita?

¹⁰ Ekyabaireho omu musiri Gesesemaani tikirafeereire busha Petero. Akeega ngu ni kikuru okuguma ori omweziriki. Enyimaho, Yesu akaba agizire ati: “Imwe mwena, eki kiro nimwija kumpemukaho.” Reero Petero yaagira ati: “N’obu abandi boona baraagwe bakakuhemukaho, nyowe tindikwija kukuhemukaho na kakye.” Yesu akagarukamu Petero arikumugira ngu akaba naija kumwehakana emirundi eshatu. Petero akagarukamu ati: “N’obu ndaabe ow’okwitwa naiwe, tindikwija kukwehakana.” (Mat. 26:31-35) Kwonka nabwo, Petero akeehakana Yesu, nk’oku kyabaire kyagambirwe. Kikamushaasha ahabw’okwehakana Yesu, “yaarira munonga.”​—Luk. 22:60-62.

¹¹ Petero buzima akeegyera ahari ekyo ekyamubaireho kandi yaamanya ngu aine kwetantara okweyesiga ekirenga. Hatariho kubanganisa, okushaba kukahwera Petero omu nshonga egyo. Ekyo nikyeyoreka omu buhabuzi obu yaahaire ngu ‘mwezirikire okushaba.’ Nitugyendera aha buhabuzi obwo? Okwongyera ahari ekyo, nitushaba obutoosha kworeka ngu nitwesiga Yehova? Ka tugume nitwijuka obuhabuzi bwa Paulo oburikugira ngu, “orikuteekateeka ngu ayemereire ayerinde atagwa.”​—1 Kor. 10:12.

12. Ni ky’okureeberaho ki ekirungi eki Nehemia yaatuteereireho?

¹² Teekateeka ahari Nehemia owaabaire naaheereza nk’omugabuzi w’Omugabe Arutagizakiseesi owa Buperesi omu kyasha kya kataano. Nehemia akatuteeraho eky’okureeberaho kirungi arikwezirikira okushaba. Kumara ebiro, ‘akaguma naayesiibyakwo, kandi naashaba omu  maisho ga Ruhanga’ ahabw’okubonabona kw’Abayudaaya abaabaire bari Yerusaalemu. (Neh. 1:4) Arutagizakiseesi ku yaamubuurize ahabw’enki yaabaire agwirwe kubi, Nehemia akamushoboororera embeera eyaabaire eri omuri Yerusaalemu. Bwanyima omugabe yaamubuuza ati: “Mbwenu nooshaba ki?” Ahonaaho Nehemia ‘akashaba Ruhanga w’eiguru.’ (Neh. 2:2-4) Hakarugamu ki? Yehova akagarukamu okushaba kwe, kandi yaamuha obuhabuzi obwahwereire Abayudaaya boona. (Neh. 2:5, 6) Eki ka kyahamize okwikiriza kwa Nehemia!

13, 14. Tushemereire kukora ki kubaasa kuguma twine okwikiriza kuhami n’okusingura okuteeraho kwa Sitaane kutumaramu amaani?

¹³ Okushaba obutoosha nk’oku Nehemia yaakozire, nikituhwera kuguma twine okwikiriza kuhami. Sitaane taine mbabazi kandi naakira kututaahirira twaba tutaine maani. Twaba twine endwara y’amaani nari amaganya, nitubaasa kutandika kuteekateeka ngu obwire obu turikumara omu kubuurira buri kwezi, Yehova tarikubusiima. Abamwe omuriitwe nibabaasa kuba baine amaganya, obundi ahabw’ebyo ebi baarabiremu enyima. Sitaane naayenda tugume nituteekateeka ngu tituri b’omugasho. Naaba agyendereire kushiisha ebiteekateeko byaitu kugira ngu okwikiriza kwaitu kutuube. Kwonka twaguma turi abeeziriki omu kushaba, nitubaasa kuguma twine okwikiriza kuhami. Buzima, ‘engabo y’okwikiriza neija kutubaasisa kuraaza emyambi y’omuriro yoona ey’Omubi.’​—Efe. 6:16.

¹⁴ ‘Twayezirikira okushaba,’ nitwija kuba tweteekateekire kusingura kyona ekirikubaasa kugyeza okwikiriza kwaitu. Twaba nitugyezibwa, ka twijukye eki Nehemia yaakozire, kandi ahonaaho tushabe Ruhanga. Yehova niwe wenka orikutubaasisa kusingura ebirikugyeza okwikiriza kwaitu.

15. Nitubaasa kwebuuza bibuuzo ki aha bikwatiraine n’okushabira abandi?

¹⁵ Yesu akashabira Petero kugira ngu agume aine okwikiriza kuhami. (Luk. 22:32) Epafura Omukristaayo omwesigwa ow’omu kyasha ky’okubanza, akatooreza Yesu omu nshonga egyo kandi yaashabira ab’eishe-emwe omu Kolosai. Paulo akahandiika ati: ‘Ayezirika obutoosha kubaijuka omu kushaba kwe, ngu mugume muri abahikire, kandi abarikumanyira kimwe byona ebi Ruhanga akunda.’ (Kol. 4:12) Nitubaasa kwebuuza tuti: ‘Ninshabira ab’eishe-emwe abari omu nsi yoona? Ninkira kushabira ab’eishe-emwe abarikubonabona ahabw’ebihikiirizi? Ni ryari obu mpereeruka kushabira abo abaine obujunaanizibwa bw’amaani omu kibiina kya Yehova? Ninshabira abaine oburemeezi abari omu kibiina?’

16. Mbwenu shi ni kikuru okushabira abandi? Shoboorora.

¹⁶ Okushabira abandi buzima nikiija kubahwera. (Shoma 2 Abakorinso 1:11.) Yehova naagarukamu okushaba kw’abaheereza be arikwihirira aha ku barikufayo kushabira abandi baihire aha mutima, beitu kutari kugira ngu boona bagumire nibamushaba aha nshonga niyo emwe. N’ahabw’ekyo obujunaanizibwa bwaitu obw’okushabira abandi twine kubutwara nk’ekintu kikuru. Nka Epafura, twine kukyoreka ngu nitukunda ab’eishe-emwe turikuba abeeziriki omu kubashabira. Okukora ekyo nikyongyera aha kushemererwa kwaitu, ahakuba okugaba nikureeta okushemererwa kwingi okukira okuheebwa.​—Byak. 20:35.

17, 18. ‘Okwezirikira okushaba’ nikiija kutuhwera kita?

¹⁷ Atakagizire ngu “ekiro kyahweire; buri haihi kusheesha,” Paulo akagira ati: “Nimumanya ngu obunaku buhikire imwe kusisiimuka omu turo; ahabw’okuba okujunwa kutwiriire haihi okukira obu twatandika kwikiriza.” (Rom. 13:11, 12) Ensi ensya ei Ruhanga yaaraganiise eri haihi, kandi n’okujunwa kwaitu kuri haihi. N’ahabw’ekyo, titwine kuhungira omu by’omwoyo, kandi titushemereire kwikiriza ensi egi kutuhuzya tukabura obwire bw’okushaba Yehova. Omu mwanya gw’ekyo, twine kuteeraho ‘kwezirikira okushaba.’ Okukora ekyo nikiija kutuhwera “kuba abarikwera kandi abarikutiina Ruhanga omu mitwarize” yaitu tutegyereize ekiro kya Yehova. (2 Pet. 3:11, 12) N’ahabw’ekyo, oku turikutwaza nikworeka yaaba nitureeba omu bw’omwoyo kandi turikwikiriza ngu ensi egi neija kucwekyerezibwa. Ka tuteereho ‘kushaba obutoosha.’ (1 Tes. 5:17) Kandi ka tuteereho kutooreza Yesu turikutunga obwire bw’okwehereera kushaba. Twamara obwire burikumara turikushaba Yehova, nitwija kumwirira haihi. (Yak. 4:7, 8) Kandi ekyo buzima nikiija kutugasira munonga.

¹⁸ Abaheburaayo 5:7 nihagira hati: “Kristo omu biro ebi yaabaire akiriho omu mubiri, akashaba yaayeshengyereza munonga naarira, yaatakira Ogwo owaabaasize kumukiza okufa; yaahurirwa ahabw’okutiina Ruhanga.” Yesu akeeshengyereza Ruhanga omu kushaba kandi yaaguma ari omwesigwa kuhitsya obu yaitsirwe. Kandi Yehova akacungura omwana we arikumuzoora nk’ekyahangirwe eky’omwoyo kutunga amagara agatahwaho omu iguru. Naitwe, nitubaasa kuguma turi abeesigwa ahari Tataitwe ow’omu iguru twayohibwa nari twagyezibwa. Buzima, nitubaasa kutunga ekiconco ky’amagara agatahwaho twaguma ‘nitwezirikira okushaba.’