Eric: Nyowe tindi munyadiini munonga. N’ahabw’ekyo, tindikuhamya ngu twine bingi ebi turagaaniireho.

Brian: Yebare nkungambira ekyo. Nyowe ndi Brian. Kandi shi iwe?

Eric: Ndi Eric.

Brian: Eric, nashemererwa kukushanga aha.

Eric: Naanye.

Brian: Ka nkubuuze, okakurira omu ka erikukunda ediini?

Eric: Eego. Kwonka kunarugire omu ka nkaza aha ishomero, nkarekyera aho eby’ediini.

Brian: Aha ishomero okeegayo ki?

Eric: Nkeega aha ntwaza y’abantu n’ebyafaayo. Nkaba ninkunda kumanya ebyafaayo by’abantu, n’oku batwire nibatunguuka.

Brian: Ebyafaayo nibishemeza. Nk’oku orikumanya, Baibuli erimu ebyafaayo. Oraacondoorizeho omu Baibuli?

Eric: Ngaaha buzima. Nnimanya ngu n’ekitabo kirungi, kwonka tinkakiteekateekahoga ngu Baibuli erimu ebyafaayo.

Brian: Nooreebeka ori omuntu oine ekihika ky’okwenda kumanya. Waaba oine akiire kakye, nkaayenzire kukworeka bimwe aha byafaayo ebihikire ebiri omu Baibuli.

Eric: Kare. Kwonka tinyine Baibuli.

Brian: Otafayo. Nimbaasa kukworeka omu yangye. Nk’eky’okureeberaho, ka tushome 1 Obusingye 29:26, 27. Nihagira hati: “Oku nikwo Daudi mwene Yese yaategyekire Israeli yoona. Emyaka ei yaamazire naategyeka Israeli ekahika makumi ana; emyaka mushanju akagimara Heburooni, kandi emyaka makumi ashatu n’eshatu yaagimara Yerusaalemu.”

Eric: Ekyo n’eky’okureeberaho kita aha byafaayo ebihikire?

Brian: Abahakani nibagira ngu Daudi takabahoga.

Eric: Buzima? Ahabw’enki nibahakanisa okubaho kwe?

Brian: Oihireho Baibuli, hakaba hatariho obuhame bwingi oburikworeka ngu akabaho. Kwonka omuri 1993, bamwe abarikwetegyereza ebizoirwe omu itaka bakazoora eibaare eryabaire ririho ebigambo “Enju ya Daudi.”

Eric: Eki nikishemeza.

Brian: Omuntu ondiijo ou abantu baabanganiise okubaho kwe ni Pontio Pilaato, omutegyeki owaabaire naategyeka, obu Yesu yaabaire ari omu nsi. Naagambwaho aha, omuri Luka 3:1 hamwe n’abategyeki abandi ab’omu bunaku bwe.

Eric: Eego, naakireeba. Nihagira ngu ‘obu Pontio Pilaato yaabaire ari omutegyeki wa Buyudaaya, na Heroode akaba ari ow’eishaza rya Galilaaya.’

 Brian: Kare. Kumara emyaka mingi, abantu bakaba nibabangaanisa ngu Pontio Pilaato akabaho. Kwonka, emyaka nka 50 ehingwire, bakazoora eibaare omuri Asia eryabaire rihandiikirweho eiziina rye.

Eric: Nkaba ntakahurirahoga ebyafaayo ebyo.

Brian: Naashemererwa munonga kugaaniira naiwe.

Eric: Okuba ow’amazima, Baibuli ntwire ningiha ekitiinisa nk’ebindi bitabo, kwonka tinkafayoga kumanya yaaba neegamba n’aha bwire bwaitu. Neebaasa kuba erimu ebyafaayo ebihikire, kwonka tindikuhamya ngu erimu obuhabuzi oburikukora.

Brian: Abantu baingi nikwo barikugira. Kwonka nyowe nintaana nabo. Ahabw’okuba ebyetengo by’abantu tibikahindukaga kuruga aha kutandika. Nk’eky’okureeberaho, tutwire nitwetenga eby’okurya, eby’okujwara, n’oburaaro. Tutwire twine ekyetengo ky’okugaaniira n’abandi n’okugira amaka marungi. Ebintu ebi twena titurikubitwara nka bikuru?

Eric: Eego buzima.

Brian: Baibuli neebaasa kutuhwera omu nshonga nk’ezo. N’obu kiraabe kiri ekitabo kya ira, kwonka kirimu obuhabuzi oburikukora hati.

Eric: Noomanyisa ki?

Brian: Nimbaasa kukishoboorora nti: Baibuli erimu emisingye mikuru erikubaasa kutuhwera obunaku obu n’obu eraabe yaahandiikirwe ira.

Eric: Neetuhwera omuri ki?

Brian: Emisingye ya Baibuli neebaasa kutuhwera kugira emiteekateekyere mirungi aha sente, okugira eka erimu okushemererwa nari abanywani barungi. Ekitabo eki nikitwegyesa kuba abasinguzi. Nk’eky’okureeberaho, torikwikiriza ngu okuba omutwe gw’eka omurungi omu bunaku obu tikyorobi?

Eric: Aho ninyikirizana naiwe. Nyowe n’omukazi wangye tumazire omwaka gumwe omu bushwere, kwonka tikyorobi kwikirizana butoosha.

Brian: Kwonka, Baibuli erimu emisingye erikubaasa kukora. Nk’eky’okureeberaho, ka tushome Abaefeso 5:22, 23 na 28. Noobaasa kuhashoma.

Eric: Nihagira hati: ‘Imwe abakazi mworobere baabaroimwe nk’oku mworobera Mukama. Ahakuba omushaija niwe mutwe gw’omukazi, nk’oku Kristo ari omutwe gw’ekibiina, kandi niwe mujuni waakyo. Nikwo n’abashaija bashemereire kukunda abakazi baabo nk’emibiri yaabo bonka. Okunda omukazi we, biri ayekunzire.’

Brian: Yebare kushoma. Mbwenu shi t’eky’amazima ngu abari omu bushwere baagyendera aha buhabuzi obu, amaka nigaba marungi?

Eric: Ningira nikwo kiri. Kwonka ekyo kyorobi kukigamba beitu kigumire kukikora.

Brian: N’amazima; tihariho ohikiriire. Nangwa n’omu shuura niyo emwe harimu omushororongo ogurikutuhiga kuba ab’oburyo. * Okubaasa kugira omukago murungi, omushaija n’omukazi we bashemereire kwikirizana. Nyowe n’omukazi wangye tushangire ngu Baibuli neebaasa kutuhwera kukikora.

Eric: Ekyo naakyetegyereza.

Brian: Abajurizi ba Yehova baine omukura oguriho obuhabuzi burungi oburikukwata aha bushwere n’amaka. Ku oraabe oine obudakiika bukye nimbaasa kukworeka bimwe ebiriho.

Eric: Eego. Nimbaasa kukuha obudakiika bukye.

Brian: Yebare munonga. Omukura gwaitu ni www.pr2711.com/nyn. Aha n’ah’okutandikira.

Eric: Ebishushani ebiriho ni birungi.

Brian: Ebishushani ebi nibikwata aha murimo gw’okubuurira omu nsi yoona. Aha hariho ekicweka ekine omutwe “Obuhwezi bw’Abashweraine n’Abazaire.” Ahansi y’omutwe ogwo, hariho ebicweka bigufu ebirikukwata aha mbeera zitarikushushana. Hariho eki waakunda?

Eric: Eego, naakunda eki. “Okushoboorora Oburemeezi omu Bushwere Bwawe.” Nimbaasa kuba nikyo naakoresa!

 Brian: Ekicweka eki nikyoreka emiringo ena ey’okushoboororamu oburemeezi. Yetegyereze akacweka aka. Eric, nooyenda kukashoma?

Eric: Nihagira hati: “Okugaaniira nikugyeragyeranisibwa n’eshagama omu mubiri, kandi rukundo n’okuhaana ekitiinisa nibigyeragyeranisibwa nk’ebihaha n’omutima omu mubiri.” Naakunda oku baakishoboorora.

Brian: Yebare kushoma. Hariho Ekyahandiikirwe ekirikworekwa aha. Noobaasa kukiigura orikwimataho.

Eric: Naakireeba. Abaefeso 5:33, nihagira hati: “Omuntu weena omuriimwe akunde omukazi we, nk’oku ayekunda; n’omukazi nawe ashemereire kutiina iba.”

Brian: Waareeba ngu ekirikuteebwaho omutima n’okuha mugyenzi waawe ekirikwingana n’eki orikwenda ngu akuhe?

Eric: Tindikwetegyereza gye eki orikumanyisa.

Brian: Mbwenu shi omushaija naaba atarikwenda kukimanya ngu omukazi we naamuha ekitiinisa, kandi n’omukazi akamanya ngu omushaija we naamukunda?

Eric: Buzima, ninyikirizana n’ekyo.

Brian: Omushaija yaaba naakyoreka ngu naakunda omukazi we, tikirikworobera omukazi kumuha ekitiinisa?

Eric: Ningira ngu eki nikibaasa kukora.

Brian: Ekyahandiikirwe eki n’obu kiraabe kyahandiikirwe emyaka nka 2,000 enyima, nikikwata aha nshonga z’abari omu bushwere, kandi bombi baagyendera aha buhabuzi bwakyo, nibubahwera. Nk’oku twaba twareebire, obushwere bwabo nibuba burungi nk’oku omutima n’ebihaha birikuhwera omubiri kuguma omu mbeera nungi.

Eric: Buzima, Baibuli erimu ebintu bingi kukira oku naba ninteekateeka.

Brian: Eric, naashemererwa kuhurira ekyo. Nkaayenzire ngarukye nkubugane aha ongambire eki orikuteekateeka aha mutwe omukye ogu “Emiringo Ena ey’Okushoboororamu Oburemeezi” eri omu kicweka eki aha Mukura gwaitu. *

Eric: Nyowe n’omukazi wangye nitwija kukishoma hamwe.