Oreebuurizeho yaaba hariho ekigyendererwa ekirikukira aha kuzaana, okukora, okushwera, okugira eka, n’okukura? (Yobu 14:1, 2) Baibuli neeyoreka ngu n’abantu abanyabwengye nibeebuuza ekibuuzo eki.—Okushoma Omubuurizi 2:11.

Mbwenu shi okubaho kw’abantu kwine ekigyendererwa? Eky’okubanza, twine kwebuuza tuti: Ebiine amagara bikaho bita? Abantu baingi bwanyima y’okwetegyereza oku obwongo bwaitu buhangirwe n’ebindi bicweka by’omubiri gwaitu, bamanyire ngu hariho Omuhangi omunyabwengye owaatuhangire. (Okushoma Zaaburi 139:14.) Ku kiraabe kiri kityo, ashemereire kuba yaatuhangire ahabw’ekigyendererwa! Twamanya enshonga egyo nikibaasa kutureetera kugira ekigyendererwa.

Ruhanga akaha omugisha abantu babiri b’okubanza kandi yaabaha n’omurimo murungi. Ekigyendererwa kye, akaba naayenda ngu batuureho ebiro byona, baijuze ensi, kandi bagihindure paradiso.—Shoma Okutandika 1:28, 31.

Ekigyendererwa kya Ruhanga kikateganisibwa obu abantu baagomera obutegyeki bwe. Kwonka Ruhanga taratwebirwe nari kwebwa ekigyendererwa kye. Baibuli neetuhamiza ngu Ruhanga atwire naakora munonga kucungura abantu abeesigwa kandi ekigyendererwa kye ahabw’ensi nikiija kuhikiirizibwa! N’ahabw’ekyo, Ruhanga naayenda ngu otuureho ebiro byona nk’oku ekigyendererwa kye kyabaire kiri! (Shoma Zaaburi 37:29.) Kuruga omu Baibuli, Yega oku orikubaasa kugasirwa omu kigyendererwa kya Ruhanga.