1, 2. Abaheereza ba Yehova batwire nibategyereza aha bikwatiraine na ki?

ABAHEEREZA ba Yehova batwire nibategyereza okuhikiirira kw’obunabi oburi omu Baibuli. Nk’eky’okureeberaho, Yeremia akagira ngu Yuda ekaba neija kucwekyerezibwa Abababulooni, kandi ekyo nikyo kyabaireho omu gwa 607 Yesu atakazairwe. (Yer. 25:8-11) Isaaya akagira ngu Yehova akaba naija kugarura Abayudaaya kuruga omu bukwatwa. Akagira ati: “Abarikumutegyereza boona baine omugisha.” (Isa. 30:18) Miika nawe akaba ategyereize okuhikiirira kw’ebiraganiso bya Ruhanga reero yaagira ati: “Amaisho gangye ndyagata ahari” Yehova. (Mik. 7:7) Kumara emyaka mingi, abaheereza ba Ruhanga bakaba batwire bategyereize okuhikiirira kw’obunabi oburikukwata ahari Mesia, nari Kristo.—Luk. 3:15; 1 Pet. 1:10-12. *

² Abaheereza ba Ruhanga ab’obunaku obu, nabo bategyereize kureeba obunabi oburikukwata ahari Mesia nibuhikirizibwa. Yehova arikukoresa Obukama oburikwebemberwa Mesia naija kumaraho okubonabona kw’abantu arikucwekyereza ababi kandi akacungura abaheereza be kuruga omu nsi egi erikutegyekwa Sitaane. (1 Yoh. 5:19) N’ahabw’ekyo ka tugume tweteekateekire turikumanya ngu ensi egi embi juba neija kuhika aha mperu.

3. Nitubaasa kwebuuza ki twaba tutwire tutegyereize emperu kuhika?

 ³ Abaheereza ba Yehova twine ekihika ky’okureeba ebi Ruhanga arikukunda birikukorwa “omu nsi nk’oku bikorwa omu iguru.” (Mat. 6:10) Kwonka bwanyima y’okutegyereza emperu y’obusingye obu erikureebeka nk’etwireho, abamwe nibabaasa kwebuuza bati: ‘Mbwenu shi hariho ekishemereire kutureetera kugumizamu tutegyereize?’ Ka tureebe.

4. Ni nshonga ki enkuru erikutureetera kuguma nitureeba?

⁴ Baibuli neetuhwera kumanya oku tushemereire kutwara okucwekyerera kw’ensi egi. Yesu akagambira abakuratsi be ‘kuguma nibareeba.’ (Mat. 24:42; Luk. 21:34-36) Egyo n’enshonga nungi eshemereire kutureetera kuguma tutegyereize, ahakuba Yesu niwe yaatugambiire kukikora! Omu nshonga egi, ekibiina kya Yehova kitaireho eky’okureeberaho kirungi. Ebitabo by’ekibiina bitwire nibituhiga kutegyereza ekiro kya” Yehova kandi, tukata omutima aha matsiko g’ekiraganiso kye eky’ensi ensya.—Shoma 2 Petero 3:11-13.

5. Ahabw’enki ni kikuru kuguma nitureeba hati?

⁵ N’obu Abakristaayo omu byasha eby’enyima baabaire baine kuguma nibareeba, okuguma nitureeba okukira munonga ni kikuru obunaku obu. Ahabw’enki? Ahabw’okuba turi omu bwire bw’okubaho kwa Kristo. Akamanyiso k’okubaho kwe katwire nikareebwa kuruga 1914. Akamanyiso aka akarikutwariramu okusiisikara kw’embeera omu nsi, n’omurimo gw’okubuurira omu nsi yoona, nikahamya ngu turi omu bunaku bw’emperu “obu ensi egi” eraahweho. (Mat. 24:3, 7-14) Obu Yesu ataragambire obunaku oburaahingureho emperu ekahika, twine kuguma nitureeba tutahugire.

6. Ahabw’enki nituteekateeka ngu embeera omu nsi niziija kweyongyera kuba mbi emperu yaaguma neehika haihi?

⁶ Nitubaasa kwebuuza tuti: Mbwenu shi ‘emperu y’ensi egi’ erikugambwaho tekaaba neekwata aha biro by’omumaisho obu embeera omu nsi ziraayeyongyere kusiisikara? Baibuli neeyoreka ngu obubi nibwija kweyongyera ‘omu biro by’emperu.’ (2 Tim. 3:1, 13; Mat. 24:21; Kush. 12:12) N’ahabw’ekyo nitubaasa kuteekateeka ngu n’obu embeera omu nsi ziraabe ziri mbi, niziija kweyongyera kuba mbi.

7. Ebiri omu Matayo 24:37-39 nibyoreka ki aha mbeera z’ensi omu biro by’emperu?

⁷ Nooteekateeka ngu embeera niziija kwongyera kuba mbi zita ‘okubonabona kwingi’ kutakahikire? (Kush. 7:14) Nk’eky’okureeberaho, nooteekateeka ngu buri ihanga niriiza kubamu orutaro, buri omwe naija kuba ataine by’okurya, kandi buri ka erimu endwara? Omu mbeera nk’ezo, nangwa nabo abatarikwikiririza mu Baibuli nibabaasa kwikiriza ngu obunabi bwa Baibuli buriyo nibuhikiirira. Kwonka, Yesu akagira ngu abantu baingi nibaija kuba bari aho bataine eki barikumanya omu bunaku bw’okubaho kwe, barikukora emirimo yaabo y’obutoosha kuhitsya obwire bwahwayo. (Shoma Matayo 24:37-39.) N’ahabw’ekyo, Ebyahandiikirwe nibyoreka ngu embeera omu nsi omu biro by’emperu tizirikwija kubeera kimwe mbi munonga ahari buri omwe kugira ngu n’abantu bagyemeserezibwe kwikiriza ngu emperu eri haihi kuhika.—Luk. 17:20; 2 Pet. 3:3, 4.

8. Abo abarikworobera ekiragiro kya Yesu eky’okuguma nibareeba baine buhame ki?

⁸ Kwonka, akamanyiso kubaasa kuhikiiriza ekigyendererwa kyako, kashemereire kureebwa ngu kariyo nikahikiirira kwijutsya  abo abatwire niboorobera ekiragiro kya Yesu eky’okuguma nibareeba. (Mat. 24:27, 42) Kandi ekyo nikwo kitwire kiri kuruga 1914. Kuruga omu bwire obwo n’okweyongyerayo, ebiri omu kamanyiso bitwire nibihikiirira. Hatariho kubanganisa, hati turi omu biro by’emperu, harikuburayo obwire bukye ensi egi embi ekacwekyerezibwa.

9. Ni nshonga ki ezishemereire kutureetera kuguma tutegyereize emperu y’ensi egi?

⁹ Mbwenu shi ahabw’enki Abakristaayo bashemereire kuguma bategyereize? Nituguma tutegyereize ahabw’okworobera Yesu Kristo. Kandi, nitwetegyereza akamanyiso k’okubaho kwe. Titurikuguma tutegyereize ahabw’okugira ngu nitufa kwikiriza, kureka okutegyereza kwaitu nikurugiirira aha Byahandiikirwe, reero ekyo kituhiga kuguma nitureeba, tutahugire, kandi tutegyereize emperu y’ensi egi embi.

10, 11. (a) Yesu akatebeekanisa abeegi be kukora ki? (b) Yesu akagambira abakuratsi be kukora ki emperu yaareebeka nk’etwireho kuhika? (Reeba ekishushani aha kutandika.)

¹⁰ Baingi omuriitwe batwire nibareeba omu by’omwoyo kumara emyaka mingi. Kwonka, titushemereire kuhwamu amaani ahabw’okugira ngu tumazire obwire buraingwa tutegyereize. Tushemereire kuba tweteekateekiire okwija kwa Yesu kucwekyereza ensi egi embi. Ijuka ngu Yesu akahiga abakuratsi ati: “Mwerinde, mugume nimureeba, kandi mushabe, ahakuba timurikumanya ahu obunaku obwo burihikira. Nikishusha nk’omuntu orikwenda kuza omu nsi endiijo; yaaba naaruga omu ka ye, atsiga aragiire abahuuku be emirimo, buri omwe amuha ogwe, n’omurinzi okurinda eka. N’ahabw’ekyo, mugume nimureeba, ahakuba timurikumanya bunaku obu mukama w’eka ariiziramu, yaaba mu mwabazyo, nari omu itumbi, nari omu kasheeshe, atakaija kitaraariire, akashanga mugwejegyeire. Eki ndikubagambira imwe, nikyo ngambira boona, nti: Mugume nimureeba!”—Mak. 13:33-37.

¹¹ Bwanyima y’abakuratsi ba Yesu kumanya okubaho kwa Kristo omuri 1914, bakatandika kwetebeekanisiza okugaruka kwe ahonaaho. Ekyo bakakikora barikwongyera amaani omu murimo gwabo gw’okubuurira aha Bukama. Yesu akooreka ngu akaba naza kwija “omu itumbi, nari omu kasheeshe.” Mbwenu shi ekyo kyabaho, abakuratsi be bakaatwarize bata? Akagira ati: “Mugume nimureeba.” N’ahabw’ekyo n’obu twakuba nituteekateeka ngu tutegyereize kumara obwire buraingwa, tikirikumanyisa ngu emperu eri hare nari ngu terikuza kwija omu bunaku bwaitu.

12. Habakuuki akashaba ki Yehova, kandi Yehova akamugarukamu ata?

¹² Teekateeka ahari nabi Habakuuki, owaahairwe obujunaanizibwa bw’okuranga okucwekyerera kwa Yerusaalemu. Baanabi abandi bakaba baarangire obutumwa obwo emyaka mingi enyima. Embeera zikaba zisiisikaire, ‘ababi beehinguririize abahikiriire, n’emanja’ zitarikucuubwa mu buringaaniza. N’ahabw’ekyo tikirikutangaaza kureeba ngu Habakuuki akabuuza ngu ai Yehova, ndyahitsya hi okukushaba obuhwezi? Yehova omu mwanya gw’okumugarukamu ekibuuzo ekyo butunu, akamuhamiza ngu okucwekyerera okwarangirwe kukaba kutarikwija ‘kukyerererwa.’ Ruhanga akagambira Habakuuki ‘kuguma ategyereize.’—Shoma Habakuuki 1:1-4; 2:3.

13. Habakuuki akaba naabaasa kugira miteekateekyere ki, kandi ahabw’enki ekyo kyakubaire kitari ky’obwengye?

¹³ Ka tugire ngu Habakuuki akahwamu amaani reero yaateekateeka ati: ‘Ntwire nimpurira okucwekyerezibwa kwa Yerusaalemu kumara emyaka mingi. Mbwenu shi kukwakuba kukiri hare? Tikirikureebeka  nk’eky’oburyo kuguma nindanga okucwekyerera okashusha ngu orurembo niruza kucwekyerera ahonaaho. Omurimo ogu nigwija kukorwa n’abandi.’ Niki ekyabaire nikiija kubaho ku ogire ngu Habakuuki akateekateeka atyo? Akaba naija kufeerwa omukago gwe na Yehova obundi afeerwa n’amagara ge, Yerusaalemu yaaba neecwekyerezibwa Abababulooni!

14. Ahabw’enki turikubaasa kuhamya ngu twaguma tutegyereize, emperu neija kuhika tutakimanyire?

¹⁴ Omu nsi ensya, nitwija kuba tuhikire kwijuka ngu byona ebyagambirwe aha mperu y’ensi embi bikahikiirira. Okuteekateeka aha ku ebintu byabaire, nikiija kutureetera kwongyera kwesiga Yehova n’ebiraganiso bye ebiri haihi kuhikiirira. (Shoma Yoshua 23:14.) Buzima nitwija kusiima Ruhanga ‘owaataireho ebiro n’obunaku kuba omu bushoboorozi bwe,’ ahabw’okutuhiga kuguma tutegyereize kandi turikumanya ngu “emperu ya byona eri haihi.”—Byak. 1:7; 1 Pet. 4:7.

15, 16. Ahabw’enki okubuurira n’obweziriki nikyo kintu kikuru eki twine kutaho omutima hati?

¹⁵ Twine amatsiko ngu ekibiina kya Yehova nikiija kugumizamu kutwijutsya ngu twine kwebembeza okuheereza Ruhanga. Ekibiina tikirikutwijutsya kugira ngu tugume twine bingi by’okukora omu buheereza bwe kyonka, beitu nikituhwera n’okumanya ngu akamanyiso k’okubaho kwa Kristo kariyo nikahikiirizibwa. Ni kintu ki ekikuru eki tushemereire kutaho omutima omu bunaku obu turimu? Tushemereire kuba nitwebembeza okusherura Obukama bwa Ruhanga n’okuhikiirira kwe, turikwejumba omu kubuurira amakuru marungi twine omujinya!—Mat. 6:33; Mak. 13:10.

¹⁶ Munyaanyazi-itwe omwe akagira ati: “Twabuurira amakuru marungi g’Obukama bwa Ruhanga, nitubaasa . . . kuhwera abantu kutafeera omu kabi akari haihi kuhika aha nsi egi.” Naamanya eki kirikumanyisa okucungurwa, ahakuba we na iba bakahonokaho aha kihikiirizi ky’amaani omu byafaayo ekyahikire aha bwato oburikwetwa Wilhelm Gustloff omuri 1945. Nangwa n’omu bwire bw’akabi nk’obwo omuntu akaba naabaasa kutamanya ekiri kikuru buzima. Munyaanyazi-itwe naijuka ngu omukazi omwe akaba naacura ati: “Eshanduukye yangye! Eshanduukye yangye! Amahunde gangye! Amahunde gangye goona ahansi omu kashengye k’ebintu. Naafeerwa buri kimwe!” Okutaana n’ekyo, baingi aha abaabaire baine omutima gw’okuhwera bakooga amagara gaabo baakora munonga kucungura abantu abaabaire bagwire omu maizi g’enyanja agarimu orubaare. Nk’abantu abo abaabaire batarikweyendeza, nituteeraho  kuhwera abandi. Nituguma nitwijuka ngu omurimo gw’okubuurira ni mukuru, kandi obwire butakahwaireyo tuhwera abantu kwija kucungurwa ensi egi yaaba neecwekyerezibwa.

17. Niki ekirikutureetera kuhamya ngu emperu neebaasa kwija eshaaha yoona?

¹⁷ Ebirikubaho omu nsi nibyoreka gye ngu obunabi bwa Baibuli buriyo nibuhikiirira hati, kandi ngu emperu y’ensi egi tihaine ekirikubaasa kugizibira. N’ahabw’ekyo, titushemereire kuteekateeka ngu nihaburayo obwire bwingi reero “amahembe ikumi” hamwe “n’enyamaishwa” eby’omu Okushuuruurwa 17:16 bikeehindukana Babulooni Orukuru, nari shi amadiini g’ebishuba ag’omu nsi egi. Ka tugume nitwijuka ngu Ruhanga naija ‘kukita omu mitima yaabo’ kuhikiiriza ekigyendererwa ekyo, kandi eki nikiija kubaho juba omu bwire obu tutarikumanya! (Kush. 17:17) Emperu y’ensi egi embi yoona teri hare. Ahabw’ekigyendererwa kirungi, twine kworobera okurabura kwa Yesu oku: ‘Mwerinde emitima yaanyu etakaaremesibwa omururu n’obusinzi n’amaganya g’amagara aga, ekiro ekyo kikabagwaho mutakimanyire, nk’orugogo.’ (Luk. 21:34, 35; Kush. 16:15) Ka tumariire kuheereza Yehova tutarikweziringa, twine amatsiko ngu haine “eki arikukorera abarikumutegyereza.”—Isa. 64:4.

18. Ni kibuuzo ki ekirikuza kugarukwamu omu kicweka ekirikukurataho?

¹⁸ Obu tutegyereize emperu y’ensi egi embi, ka tukuratire obuhabuzi bw’omwegi wa Yesu orikwetwa Yuda obu: ‘Imwe, abarikukundwa, mweyombekye aha musingi gw’okwikiriza kwanyu okurikwera munonga; mushabe omu mwoyo gurikwera. Mwerindire omu kukunda kwa Ruhanga; mutegyereze okusaasira kwa Mukama waitu Yesu Kristo, okurikubahitsya omu magara agatahwaho.’ (Yud. 20, 21) Kwonka shi nitubaasa kworeka tuta ngu nituguma tutegyereize ekiraganiso kya Ruhanga eky’ensi ensya kandi ngu tukiniire ekihika? Eki nikyo turaagaaniireho omu kicweka ekirikukurataho.