1, 2. (a) Ahabw’enki noohamya ngu Yehova naakunda abaheereza be? (b) Abantu boona bakahangwa baine kyetengo ki?

AHABW’ENKI noohamya ngu Yehova naakunda abaheereza be? Otakagarukiremu ekibuuzo ekyo, teekateeka aha by’okureeberaho ebi: Kumara emyaka mingi, ab’eishe-emwe bakaba nibahiga munyaanyazi-itwe orikwetwa Taylene kutateekateeka ngu naabaasa kukora buri kimwe. Naagira ati: “Ku ogire ngu Yehova tarikunkunda, tiyaakugumire naampa obuhabuzi bwe.” Brigitte, owaayoroire abaana be babiri bwanyima y’okufeerwa iba, naagira ati: “Okworora abaana omu nsi ya Sitaane, ni kimwe aha bintu ebigumire, na munonga aha muzaire omwe. Kwonka nimpamya ngu Yehova nankunda ahakuba naanyebembera kuraba omu bwire bw’okurira n’obw’oburemeezi, kandi tarikubaasa kundeka kuhikwaho eki ntarikubaasa kwemera.” (1 Kor. 10:13) Sandra orikuteganisibwa endwara etarikukira, aha ruteerane oruhango, omukazi w’ow’eishe-emwe orikumanywa munonga akooreka ngu naamufaho. Iba Sandra naagira ati: “N’obu turaabe twabaire tutarikumumanya, okufayo kwe kukatureetera okushemererwa kwingi omu mutima. Nangwa n’ebikorwa bya rukundo bikye eby’ab’eishe-emwe na banyaanyazi-itwe nibyoreka ngu Yehova naatukunda.”

 ² Abantu bakahangwa baine ekyetengo ky’okukunda n’okukundwa. Kwonka, kyorobi kuhwamu amaani haabaho ekihikiirizi, omuntu yaakureebya, waagira amagara mabi, waagira oburemeezi omu by’entaasya, nari waaba otarikutunga birungi omu kubuurira. Twatandika kuhurira ngu Yehova tarikutukunda, twine kwijuka ngu turi ab’omuhendo ahariwe, kandi ngu naija ‘kutukwata omukono gwa buryo’ atuhwere. Tarikubaasa kutwebwa twaguma turi abeesigwa ahariwe.—Isa. 41:13; 49:15.

3. Niki ekirikubaasa kutuhwera kwongyera kugira obuhame ngu rukundo ya Ruhanga ahariitwe n’ey’ebiro byona?

³ Boona abaagambwaho aharuguru bakaba nibahamya ngu Ruhanga akaba ari nabo omu bwire bw’oburemeezi. Naitwe nitubaasa kuhamya ngu ari aha rubaju rwaitu. (Zab. 118:6, 7) Omu kicweka eki nituza kureeba ebintu bina ebirikworeka ngu Ruhanga naatukunda. Nibyo ebi: (1) ebi yaahangire, (2) Ekigambo kye, (3) okushaba, (4) n’ekitambo. Okuteekateeka aha bintu birungi ebi Yehova akozire, nikibaasa kutureetera kwongyera kusiima rukundo ye etahwaho.—Shoma Zaaburi 77:11, 12.

4. Okuteekateeka aha bi Yehova yaahangire nikyoreka ki? (Reeba ekishushani aha kutandika.)

⁴ Nitubaasa kureeba rukundo ei Yehova atwiniire kurabira omu bintu ebi yaahangire? Buzima nitubaasa, ahabw’okuba ebi yaahangire nibyoreka rukundo ye. (Rom. 1:20) Akahanga ensi erikubaasisa ebiine amagara kutuuramu. Kwonka, naayenda ngu tukore ekirikukira aha kugira amagara. Twine kurya kubaasa kuguma tuhuriire. Yehova akahamya ngu ensi yaameramu ebimera nyamwingi ebirikubaasa kurugamu eby’okurya. Akatuhanga turikubaasa kurya kandi tukatunga okumarwa! (Mub. 9:7) Munyaanyazi-itwe orikwetwa Catherine naakunda kureeba ebyahangirwe, na munonga omu bwire obu omushana gurikuba nigutandika kujwa omuri Canada. Naagira ati: “Buzima nikitangaaza oku ebintu byona birikugaruka kugira amagara, nk’ebimuri ebirikubaasa kugina kuruga omu itaka, ebinyonyi ebirikugaruka kuruga ahu birikuba bifurukiire, otwariiremu n’akanyonyi kakye, akarikwetwa kanywataabe akarikugaruka kuriira omu katiba aku ebinyonyi birikuriiramu omu dirisa enyima y’ekiyungu kyangye. Yehova ashemereire kuba naatukunda munonga ahabw’okutuha ebintu bingi ebirikushemeza.” Tataitwe ow’omu iguru naakunda ebi yaahangire, kandi naayenda ngu naitwe tubikunde.—Byak. 14:16, 17.

5. Rukundo ya Yehova neereebekyera eta omu muringo ogu abantu bahangirwemu?

⁵ Yehova akatuhanga turikubaasa kukora emirimo ekirikutureetera kugira okushemererwa. (Mub. 2:24) Akaba naayenda ngu abantu baijure ensi, bagireeberere, ebe eyaabo, kandi bategyekye eby’enyanja, ebinyonyi, n’ebindi ebiine amagara. (Kut. 1:26-28) Yehova ka naatukunda ahabw’okutuhanga twine emitwarize erikutubaasisa kumutooreza!—Efe. 5:1.

6. Ahabw’enki twine kukundira kimwe Ekigambo kya Ruhanga?

⁶ Ruhanga atworekire rukundo mpango ahabw’okutuha Ekigambo kye. Kurabira omu Kigambo kye nitumumanya kandi tumanya n’oku atwire naakoragana n’abantu. Nk’eky’okureeberaho, Ebyahandiikirwe nibitworeka oku yaabaire naatwariza Abaisraeli, abaabaire bamugomera butoosha. Zaaburi 78:38 nihagira hati: ‘We ahabw’embabazi  ze nyingi akabasaasira okutahikiirira kwabo, tiyaabahwerekyereza; kaingi akaba ayezibira kubagwerwa kubi, areka kubamariraho ekiniga kye kyona.’ Okuteekateeka aha mushororongo ogu nikibaasa kukuhwera kumanya ngu Yehova naakukunda kandi naakufaho. Kimanye ngu Yehova naakutwara nk’ow’omuhendo.—Shoma 1 Petero 5:6, 7.

7. Ahabw’enki twine kutwara Baibuli nk’ey’omuhendo?

⁷ Tushemereire kutwara Baibuli nk’ey’omuhendo, ahakuba nigwo muhanda mukuru ogu Ruhanga arikukoresa kugaaniira naitwe. Abazaire baine kugaaniira gye n’abaana baabo, abaana kubaasa kuhurira ngu nibeesigwa kandi nibakundwa. Kandi shi Yehova? N’obu turaabe tutakamureebaga nari tutakahuriraga eiraka rye, ‘naagamba’ naitwe kurabira omu Kigambo kye, kandi twine kuhurikiza. (Isa. 30:20, 21) Yehova aine ekyetengo ky’okwebembera abantu be abeehaireyo, n’okuturinda akabi. Naayenda ngu tumumanye kandi tumwesigye.—Shoma Zaaburi 19:7-11; Enfumu 1:33.

8, 9. Yehova naayenda ngu tumanye ki? Shoboorora orikukoresa eky’okureeberaho ky’omu Baibuli.

⁸ Yehova naayenda tumanye ngu naatukunda kandi ngu tarikuta mutima aha nshobe zaitu. Naatusheruramu ebirungi. (2 Bus. 16:9) Nk’eky’okureeberaho, eki nikyo yaakozire aha Mugabe Yehoshafaati owa Yuda. Eizooba rimwe, Yehoshafaati akaikiriza kugyenda n’Omugabe Ahabu owa Israeli kurwanisa Abaasiria omuri Ramosi-gileadi. N’obu baanabi 400 b’ebishuba baraabe baahamiize Ahabu ngu naija kusingura, nabi wa Yehova orikwetwa Mikaaya akooreka ngu Ahabu akaba naaza kusingurwa. Ahabu akafeera omu rutaro,  kandi Yehoshafaati nawe akaba ari hakye kufeerayo. Ku yaagarukire Yerusaalemu, akahanwa munonga ahabw’okwegaita ahari Ahabu. N’obu kiraabe kiri kityo, Yehu mutabani wa Hanani omuhanuuzi, akagambira Yehoshafaati ati: “Omuriiwe harimu n’ebirungi.”—2 Bus. 18:4, 5, 18-22, 33, 34; 19:1-3.

⁹ Yehoshafaati omu kutandika kw’obutegyeki bwe akaba aragiire abanyiginya, Abaleevi, n’abanyamurwa kugyenda nibaraba omu ndembo zoona eza Yuda kwegyesa abantu be Ebiragiro bya Yehova. Kampeyini ekagyenda gye n’abantu b’amahanga agetooroire Israeli gaatandika kutiina Yehova. (2 Bus. 17:3-10) Buzima, Yehoshafaati akakora ekintu ky’obushema, kwonka Yehova akaguma naareeba ebintu birungi ebi yaabaire akozire. Ebiri omu Baibuli ebirikumukwataho nibituhwera kumanya ngu n’obu turaabe tutahikiriire, Yehova naija kuguma naatukunda twateeraho kumushemeza.

10, 11. (a) Ahabw’enki okushaba kushemereire kureebwa nk’ekintu ky’omuhendo kuruga ahari Yehova? (b) Yehova naabaasa kugarukamu ata okushaba kwaitu?

¹⁰ Omuzaire murungi naahurikiza abaana be baaba baine eki barikumugambira. Naaba naayenda kumanya ebirikubeerarikiriza ahakuba naafayo kumanya ebiri omu mitima yaabo. Tataitwe ow’omu iguru Yehova, naatuhurikiza twaba nitumushaba.

¹¹ Nitubaasa kushaba Yehova obwire bwona. Tatuteereireho obugarukiro. Ni munywani waitu orikuba ayeteekateekire kutuhurira. Taylene, owaaba yaagambirweho, naagira ati: “Noobaasa kumugambira buri kintu kyona.” Twagambira Ruhanga ebiteekateeko byaitu kurabira omu kushaba, naabaasa kutugarukamu kurabira omu Kyahandiikirwe, ekicweka ekiri omu magaziini, nari ebigambo ebirikugaruramu amaani kuruga aha w’eishe-emwe mugyenzi waitu. Yehova naahurira okweshengyereza kwaitu kandi naatwetegyereza n’obu haakuba hatariho ondiijo orikutwetegyereza. Yehova okugarukamu okushaba kwaitu n’obuhame oburikworeka ngu atwiniire rukundo etarikuhwaho.

12. Ahabw’enki twine kwetegyereza okushaba okuri omu Baibuli? Ha eky’okureeberaho.

¹² Nitubaasa kwega bingi aha kushaba okuri omu Kigambo kya Ruhanga. Obumwe, nikibaasa kuba eky’omugasho kushwijuma okushaba nk’okwo omu kuramya kw’eka. Okuteekateeka aha ku abaheereza ba Yehova aba ira baamugambiire ebiteekateeko byabo nikibaasa kutuhwera kushemeza omuringo ogu turikushabamu. Nk’eky’okureeberaho, teekateeka aha kushaba kwa Yona ari omunda y’eky’enyanja. (Yon. 1:17–2:10) Noobaasa kushwijuma okushaba kwa Sulemaani obu yaashaba Yehova aha kuhayo hekalu. (1 Bag. 8:22-53) Teekateeka aha kushaba kw’eky’okureeberaho oku Yesu yaayegyeise kutuhwera. (Mat. 6:9-13) Okukira byona, obutoosha “mumanyise Ruhanga ebi murikwetenga.” N’ekiraarugyemu, “obusingye bwa Ruhanga oburengire okwetegyereza kw’omuntu weena, buryaguma burinde emitima yaanyu n’obwengye bwanyu.” Okusiima rukundo ya Yehova etahwaho nikwija kweyongyera.—Fil. 4:6, 7.

13. Abantu baine mugisha ki ahabw’entebeekanisa y’ekitambo eya rukundo?

¹³ Ekitambo kya Yesu kikaheebwaho ahabw’embabazi za Ruhanga “ngu tube abahuriire.” (1 Yoh. 4:9) Entumwa Paulo arikugamba ahari rukundo ya Ruhanga akahandiika ati: ‘Kristo akafeera abatatiina  Ruhanga. Nimumanya ku kigumire omuntu kufeera ohikiriire; nangwa shana akaayemera kufeera ow’emicwe mirungi; kwonka Ruhanga ayoreka okukunda kwe oku atukunda, ahakuba ku twabaire tukiri abanyabibi, Kristo yaatufeera.’ (Rom. 5:6-8) Ekikorwa kya Ruhanga ekya rukundo kikabaasisa abantu kutunga omugisha gw’okugira omukago murungi nawe.

14, 15. Ekitambo nikihwera kita (a) abashukirweho amajuta? (b) abaine amatsiko g’okutuura omu nsi?

¹⁴ Bakye aha baheereza ba Yehova nibamanya ngu naabakunda omu muringo gw’omutaano. (Yoh. 1:12, 13; 3:5-7) Ku barikushukwaho omwoyo gurikwera, nibaba “abaana ba Ruhanga.” (Rom. 8:15, 16) Paulo naagamba aha Bakristaayo abashukirweho amajuta ‘nk’abazoirwe, bakashutama omu myanya y’omu iguru bakwataniise na Kristo Yesu.’ (Efe. 2:6) Nibaza omu mwanya ogu ogw’eby’omwoyo ahabw’okugira ngu ‘nibahamibwa omuriwe n’akamanyiso k’omwoyo gurikwera ogwaraganisiibwe; nigwo mukwato gw’obuhunguzi bwabo,’ ekirikumanyisa, ‘amatsiko agu babiikiirwe omu iguru.’—Efe. 1:13, 14; Kol. 1:5.

¹⁵ Abantu baingi abarikwikiririza omu kitambo baine omugisha gw’okwetwa banywani ba Ruhanga kandi baine amatsiko g’okwija kwetwa abaana ba Ruhanga, bakatuura n’omu Paradiso omu nsi. N’ahabw’ekyo kurabira omu kitambo, Yehova naayoreka ngu naakunda abantu. (Yoh. 3:16) Ku turaabe twine amatsiko g’okutuura omu nsi ebiro byona, kandi tugumire nituheereza Yehova omu bwesigwa, nitubaasa kuhamya ngu naija kutuha amagara marungi omu nsi ensya. Ka nikiba kihikire kureeba ekitambo nk’obuhame ngu Ruhanga atwiniire rukundo etahwaho!

16. Okuteekateeka aha miringo mingi ei Yehova atworekiremu rukudo, nikituhwera kita?

¹⁶ Tikirikubaasika kubara emiringo ei Yehova ayorekire ngu naatukunda. Omuhandiiki wa Zaaburi Daudi akeeshongora ati: “Ai Ruhanga, ebiteekateeko byawe ka n’eby’obuguzi bwingi ahariinye! Ku orikubiteeranira hamwe ni bingi. Ku naakubibara, bikaakira omusheenyi obwingi.” (Zab. 139:17, 18) Twateekateeka munonga aha miringo mingi ei Yehova ayorekire ngu naatukunda, nikiija kutuhwera naitwe kumukunda. Omu muringo gwona, ka tumuhe ekirikukirayo oburungi.

17, 18. Nitubaasa kworeka tuta ngu nitukunda Ruhanga?

¹⁷ Hariho emiringo mingi ei turikubaasa kworekamu ngu nitukunda Ruhanga. Nk’eky’okureeberaho, nitworeka ngu nitukunda Ruhanga n’abataahi turikwejumba omu murimo gw’okubuurira aha Bukama turi abeeziriki. (Mat. 24:14; 28:19, 20) Nitworeka ngu buzima nitukunda Yehova turikusingura ebirikugyeza okwikiriza kwaitu. (Shoma Zaaburi 84:11; Yakobo 1:2-5.) Twagyezibwa munonga, nitubaasa kuhamya ngu Ruhanga naareeba okubonabona kwaitu kandi naija kutuhwera, ahakuba turi ab’omuhendo ahariwe.—Zab. 56:8.

¹⁸ Rukundo ei twiniire Yehova neetuhiga kuteekateeka aha bi yaahangire n’ebi yaakozire eby’omutaano. Nitworeka ngu nitukunda Ruhanga kandi ngu nitutwara Ekigambo kye nk’eky’omuhendo turikwezirika kukyega. Okushaba nikutuhwera kwongyera kumwirira haihi. Kandi rukundo ei tumwiniire neeyeyongyera twateekateeka aha kitambo eki yaahaireyo ahabw’ebibi byaitu. (1 Yoh. 2:1, 2) Ezi ni zimwe aha nshonga nyingi ezirikutureetera kukunda Yehova nka we oku arikutukunda.