Mbwenu shi Ruhanga Ari Buri Hamwe?
Eki Baibuli erikugarukamu
Ruhanga naareeba buri kimwe kandi naabaasa kukora eki arikwenda buri hamwe. (Enfumu 15:3; Abaheburaayo 4:13) Kwonka, Baibuli terikwegyesa ngu ari buri hamwe, omuri buri kintu kyona. Kureka, neeyoreka ngu n’owaabuzima kandi aine omwanya ogu arikutuuramu.
Oku Ruhanga ari: Ruhanga aine omubiri gw’omwoyo. (Yohaana 4:24) Tarikubaasa kureebwa abantu. (Yohaana 1:18) Ebi Ruhanga yaayorekire abantu omu kworekwa ebiri omu Baibuli nibyoreka ngu aine omwanya ogu arikutuuramu. Tarikugambwaho nk’orikutuura buri hamwe.—Isaaya 6:1, 2; Okushuuruurwa 4:2, 3, 8.
Omwanya ogu Ruhanga Arikutuuramu: Naatuura omu mwanya ogw’eby’omwoyo, ogurikutaanira kimwe aha myanya erikureebwa. Ruhanga naatuura ‘omu iguru, omu mwanya gwe ogu atuuramu.’ (1 Abagabe 8:30) Baibuli neegamba obu ebihangirwe eby’omwoyo byaija ‘kwemurika omu maisho ga’ Yehova, a ekirikworeka ngu hariho omwanya ogu Ruhanga arikutuuramu.—Yobu 1:6.
Ruhanga ku araabe atari buri hamwe, buzima naabaasa kunfaho?
Eego. Ruhanga naafayo ahari buri omwe. N’obu araabe ari hare omu iguru, naayetegyereza abari omu nsi abarikumushemeza, kandi naabahwera. (1 Abagabe 8:39; 2 Obusingye 16:9) Yetegyereza oku Yehova arikworeka ngu naafayo aha barikumuramya omu mazima:
Waashaba: Yehova naahurira okushaba kwawe waatandika oti kumushaba.—2 Obusingye 18:31.
Waaba oine amaganya: ‘Yehova ari haihi ab’emitima ehendekire, kandi naabajuna.’—Zaaburi 34:18.
Waaba nooyenda obuhabuzi: Yehova ‘naija kukuhabura kandi akwegyese’ kurabira omu Kigambo kye, Baibuli.—Zaaburi 32:8.
Okuhabisibwa aha bikwatiraine n’okuba buri hamwe
Okuhabisibwa: Ruhanga ari buri hamwe omu bihangirwe.
Ekihikire: Ruhanga tarikutuura mu nsi nari ahandi hoona omu bihangirwe ebirikureebwa. (1 Abagabe 8:27) N’amazima ngu enyonyoozi n’ebihangirwe ebindi ‘nibimanyisa ekitiinisa kya Ruhanga.’ (Zaaburi 19:1) Kwonka, Ruhanga tarikutuura omu bi yaahangire nk’oku omuhuugi w’ebishushani atarikutuura omu bishushani bye. Kwonka nabwo, ekishushani nikikwegyesa bingi ahari ogwo waakihuugire. Nikyo kimwe, eiguru n’ensi nibitwegyesa aha mitwarize y’Omuhangi etarikureebwa nk’amaani ge, obwengye, na rukundo.—Abarooma 1:20.
Okuhabisibwa: Ruhanga ashemereire kuba naatuura buri hamwe kubaasa kumanya buri kimwe n’okworeka amaani ge.
Ekihikire: Omwoyo gurikwera, n’amaani ga Ruhanga agu arikukoresa ebintu bitari bimwe na bimwe. Ruhanga arikukoresa omwoyo gwe naabaasa kwetegyereza kandi akore eki arikwenda, omu mwanya gwona, obwire bwona, atarugire omu mwanya gwe.—Zaaburi 139:7.
Okuhabisibwa: Zaaburi 139:8 neeyegyesa ngu Ruhanga ari buri hamwe ku harikugira hati: “Ku ndaatembe omu iguru, okwo niyo ori, ku ndaatinde ekitabo kyangye okuzimu, reeba nayo oriyo.”
Ekihikire: Ekyahandiikirwe eki tikirikugamba aha mwanya ogu Ruhanga arikutuuramu. Kureka nikyegyesa ngu tihariho mwanya ogu turikuba turimu ogurikubaasa kuremesa Ruhanga kutuhwera.
a Yehova n’eiziina rya Runyankore nk’oku ririkworekwa omu Baibuli.
Noobaasa Kukunda n'Ebi
Vidiyo z'Enyegyesa za Baibuli Enkuru
Ruhanga shi n’Owaabuzima
Shwijuma obuhame oburikworeka ngu okwikiririza omuri Ruhanga n’eky’obwengye
EBIBUUZO EBI BAIBULI ERIKUGARUKAMU
Omwoyo Gurikwera Niki?
Baibuli eine eshonga zihikire ahabw’enki neegamba aha mwoyo gurikwera “nk’omukono” gwa Ruhanga.
EBIRIKUTUKWATAHO
Shaba Kutaayaayirwa Abajurizi ba Yehova
Gaaniira n’Abajurizi ba Yehova aha nshonga kuruga omu Baibuli, nari gyezaho kwejumba omu ntebeekanisa yaitu y’Okwega Baibuli otashashwire.