Kurugiirira aha kucondooza kumwe okwakozirwe omuri America, kukooreka ngu eminyeeto 80 ahari igana nibashaba, kwonka kimwe kya kabiri nibo bonka abarikushaba buri izooba. Hatariho kubangaanisa, abamwe nibeebuuza bati: ‘Okushaba nikukureetera kwehurira gye kyonka nari nikukora ekirikukira ahari ekyo?’

•  Okushaba niki?

•  Ruhanga shi naahurikiza?

•  Nimbaasa kushaba ahari ki?

•  Eki ab’orwingano rwawe barikugamba

 Okushaba n’okuhurizana n’Omuhangi w’ebintu byona. Yetegyereze amakuru g’eki! Yehova naakirira kimwe abantu, kwonka ‘tari hare n’omuntu weena omuriitwe.’ (Ebyakozirwe 17:27) Nangwa Baibuli neegira eti: “Mwirire haihi Ruhanga, nawe abone kubairira haihi.”—Yakobo 4:8.

 Noobaasa kwirira ota haihi Ruhanga?

•   Omuringo gumwe n’okushaba orikugira eki waagambira Ruhanga.

•   Omuringo ogundi n’okwega Baibuli, ekirikumanyisa Ruhanga okugamba naiwe.

 Waaguma noohurizana na Ruhanga kurabira omu kushaba n’okwega Baibuli, nooba munywani wa Ruhanga.

 “Okugamba na Yehova Rukira Boona, ni gumwe aha migisha ei ahaire abantu.”—Jeremy.

 “Naagambira Yehova oku ndikwehurira kurabira omu kushaba nimpurira ndi haihi nawe.”—Miranda.

 N’obu waakuba noikiririza omuri Ruhanga kandi orikumushaba, nikibaasa kukugumira kwikiriza ngu buzima naaba akuhurikiize. Kwonka, Baibuli neegira ngu Yehova niwe ‘arikuhurira okushaba.’ (Zaaburi 65:2) Nangwa neekuhiga ‘kumwegyekyerera okushoberwa kwawe kwona.’ Ahabw’enki? “Ahabw’okuba naakutaho omutima.”—1 Petero 5:7.

 Eky’okuteekateekaho: Butoosha nootunga obwire bw’okugaaniira na banywani baawe ab’aha mara? Tunga obwire bw’okugamba na Ruhanga. Gamba nawe butoosha kurabira omu kushaba, kandi orikukoresa eiziina rye, Yehova. (Zaaburi 86:5-7; 88:9) Baibuli neekuhiga “kushaba obutoosha.”—1 Abatesalonika 5:17.

 “Omu kushaba nimba ningaaniira na Tataitwe ow’omu iguru, ou ndikugambira byona ebiri omu mutima gwangye.”—Moises.

 “Ningambira Yehova omu kushaba, nk’oku ndikuba ningaaniira na maama nari munywani wangye ow’aha mara.”—Karen.

 Baibuli neegira ngu “omuri byona mumanyise Ruhanga ebi murikwetenga omu kushaba n’okweshengyereza, kandi musiime.”—Abafilipi 4:6.

 Eki shi nikimanyisa ngu kihikire kugamba aha buremeezi bwawe? Eego! Nangwa Baibuli neegira eti: ‘Yegyekyera [Yehova] omutwaro gwawe, nawe naija kuguma naakukwatirira.’—Zaaburi 55:22.

 Kwonka, waaba nooshaba Ruhanga, toine kugamba bugamba aha buremeezi bwawe kyonka. “Ekyo tikirikworeka ngu oine omukago murungi nawe waaguma noomushaba obuhwezi kyonka,” nikwo omwishiki omwe orikwetwa Chantelle arikugamba. “Ninteekateeka ngu nyine kubanza kumusiima, kandi ebi nyine kumusiimira nibyo biine kuba bingi.”

 Eky’okuteekateekaho: Ni bintu ki ebi orikwenda kwebariza Ruhanga? Noobaasa kuteekateeka aha bintu bishatu ebi orikwenda kwebariza Yehova izooba eri?

 “Nangwa n’obu kaakuba akantu kakye, nk’ekimuri kirungi, noobaasa kukisiimira Yehova.”—Anita.

 “Noobaasa kureeba ekihangirwe ekirikutangaaza nari Ekyahandiikirwe ekyakushemeza, reero oyebaze Yehova.”—Brian.