Neɛnleanu ɛmaa yela ali kɛ menli mɔɔ kile anyezɔlɛ la anye die yɛɛ bɛlɛ kpɔkɛdelɛ kpalɛ, bɛkola bɛgyinla ɛkpɔlɛ nloa yɛɛ bɛlɛ agɔnwolɛma kpalɛ. Robert A. Emmons mɔɔ yɛ neɛnleanu la hanle kɛ awie kile anyezɔlɛ a, “ɔbɔ ɔ nwo bane ɔfi subane mɔɔ ɛnle kpalɛ le kɛ anyebolo, ɛya mɔɔ bɛfa bɛsie bɛ nu nee ɛkpɔlɛ nwo.” a

 Saa ngakula kile anyezɔlɛ a kɛzi ɔboa bɛ ɛ? Wɔ mekɛ mɔɔ bɛvale ɛvolɛ nna bɛyɛle neɛnleanu wɔ mgbavolɛ nee mbɛlɛra 700 anwo la, bɛnwunle kɛ nuhua ne mɔɔ kile ninyɛne nwo anyezɔlɛ la ɛnwua wɔ sɔnea mekɛ nu, bɛnno nyiletane, bɛmbo nza yɛɛ bɛda subane kpalɛ ali.

•   Saa yɛte nganeɛ kɛ yɛ mɔdenlebɔlɛ a ɛmaa yɛnyia debie bie a, ɔmmaa yɛngile anyezɔlɛ. Ngakula dɔɔnwo te nganeɛ kɛ bɛfɛta ninyɛne mgbalɛ mɔɔ bɛ sa ka bɛ la. Saa yɛte nganeɛ kɛ yɛ mɔdenlebɔlɛ a maa yɛnyia nyilalɛ anzɛɛ ahatualɛ bie na ɔnle ahyɛlɛdeɛ a, ɔmmaa yɛngile anyezɔlɛ.

   Subane ɛhye ɛbu zo ɛnɛ. Ninli bie mɔɔ bɛfɛlɛ ye Katherine la ka kɛ, “Ewiade ne kilehile menli kɛ ɔwɔ kɛ bɛnyia debie biala mɔɔ bɛkpondɛ la. Bɛye ninyɛne dɔɔnwo wɔ TV nee Yintanɛte ne azo na bɛka bɛkile yɛ kɛ ‘ɔhyia’ kɛ yɛnyia bie yɛɛ yɛdayɛ a ɔwɔ kɛ yɛdimoa yɛnyia ye a.”

•   Ngakula bahola azukoa kɛzi bɛda anyezɔlɛ ali wɔ mekɛ mɔɔ bɛle ngyikyi la. Ninli bie mɔɔ bɛfɛlɛ ye Kaye la ka kɛ: “Ngakula ahonle le bɛtɛɛ. Ɛkilehile ngakula kɛzi bɛda subane kpalɛ ali la ndɛ a, ɔle kɛ ɛlɛfa baka wɔazua baka bie wɔamaa yeadenrɛ la.”

•   Kilehile bɛ mɔɔ ɔwɔ kɛ bɛka la. Ngakula ngyikyi bɔbɔ bahola azukoa kɛzi bɛka meda wɔ ase wɔ mekɛ mɔɔ awie kɛhyɛ bɛ debie anzɛɛ kɛyɛ bɛ kpalɛ la. Mekɛ mɔɔ bɛlɛyɛ mgbanyinli la ngyikyi ngyikyi, bɛbavi bɛ ahonle nu bɛahile kpalɛ mɔɔ awie mɔ yɛ maa bɛ la anwo anyezɔlɛ.

   Baebolo ngyinlazo: “Bɛhile anyezɔlɛ.”​—Kɔlɔsaema 3:15.

   “Yɛ anlɔnra mɔɔ ɛnyia ɛvolɛ nsa la fi ye ahonle nu ka ‘meda wɔ ase,’ yɛɛ ɔbiza debie biala a ɔka ‘mekpa wɔ kyɛlɛ.’ Ɔzukoale ɔvile ye awovolɛ ɛkɛ. Bɛ subane mgbalɛ nee anyezɔlɛ mɔɔ bɛda ye ali ɛlɛmaa ɔdaye noko yeahile anyezɔlɛ.”​—Jeffrey.

•   Kilehile bɛ mɔɔ ɔwɔ kɛ bɛyɛ la. Saa awie kyɛ ɛ ra debie mekɛ fofolɛ a, boa ye maa ɔhɛlɛ kɛlata ɔla ye ase. Bieko, saa ɛmaa ɛ mra gyima wɔ sua nu ɛmaa bɛyɛ a, ɛbaboa wɔamaa banwu kɛ ɔhyia mɔdenlebɔlɛ amaa sua nu ɛkɛ ne ayɛ bɔkɔbɔkɔ.

   Baebolo ngyinlazo: “Anyelielɛ dɔɔnwo wɔ ɛmaanlɛ nu tɛla ɛlielɛ.”​—Gyima ne 20:35.

   “Yɛ mra nwiɔ ne yɛ aleɛ mɔɔ yɛbali la anwo ngyehyɛleɛ na bɛto yɛɛ bɛyɛ gyima wɔ sua nu. Ɛhye boa bɛ maa bɛnwu gyima ɛsesebɛ mɔɔ yɛyɛ kɛ bɛ awovolɛ la na bɛkile nwolɛ anyezɔlɛ.”​—Beverly.

•   Kilehile bɛ subane mɔɔ ɔwɔ kɛ bɛnyia la. Awie mɔɔ bɛlɛ ɔ nwo aze la kile anyezɔlɛ. Menli mɔɔ bɛlɛ bɛ nwo aze la die to nu kɛ bɛhyia moalɛ amaa bahola bayɛ debie biala, ɔti saa awie mɔ boa bɛ a ɔmaa bɛkile nwolɛ anyezɔlɛ.

   Baebolo ngyinlazo: “Bɛbɛlɛ bɛ nwo aze na bɛbu bɛ gɔnwo mɔ bɛdɛla bɛ nwo, bɛmmadwenle bɛ ngomekye bɛ boɛyɛlɛ nwo, emomu bɛdwenle awie mɔ noko ɛdeɛ nwo.”​—Felepaema 2:3, 4.

   “Ɔdwu mekɛ ne bie na yɛlɛdi aleɛ a yɛka anyezɔlɛ nwo edwɛkɛ. Yɛ nuhua ko biala ka debie mɔɔ ɔwɔ kɛ ɔkile nwolɛ anyezɔlɛ la. Ɛhye maa awie biala anwosesebɛ ɔmaa ɔdwenle ninyɛne mgbalɛ mɔɔ ɔ nye sɔ ye la anwo na tɛ mɔɔ nvasoɛ ɛnle zo na ɔmaa bɛyɛ angomedi la anwo.”​—Tamara.

 Nzuzulɛ: Yɛ neazo. Saa ngakula te kɛ ɛlɛkile ninyɛne mɔɔ awie mɔ nee bɛdabɛ mumua ne bɛyɛ bɛmaa wɔ la anwo anyezɔlɛ a, ɔbamaa bazukoa wɔ na bahile anyezɔlɛ.