Ɛtane a le nyɛleɛ, nganeɛdelɛ anzɛɛ adwenle biala mɔɔ nee Nyamenle ngyinlazo ne mɔ ɛnyia la. Saa yɛbulu Nyamenle mɛla ne mɔ azo na yɛyɛ debie mɔɔ ɛnle kpalɛ anzɛɛ ɛndenrɛ la a, ɔle ɛtane. (1 Dwɔn 3:4; 5:​17) Baebolo ne eza kile kɛ saa awie anye fuu anyɛ mɔɔ le kpalɛ la a, ɔle ɛtane​​—Gyemise 4:​17.

 Wɔ aneɛ mɔɔ bɛlimoale bɛvale bɛhɛlɛle Baebolo ne la anu, edwɛkɛ agbɔkɛ mɔɔ bɛhile ɔ bo ɛtane la kile kɛ “ɛndwu bodane bie anwo.” Kɛ neazo la, sogyama ekpunli bie mɔɔ ɛnee bɛwɔ tete Yizilayɛ la ɛnee ze totoabɔ to kpalɛ mɔɔ ‘bɛnli mgba’ anzɛɛ bɛnvo a. Saa yɛkile zɔhane edwɛkɛ ne abo a, yɛbagenga ye kɛ ‘bɛnyɛ ɛtane.’ (Maanlebuvolɛma 20:16) Ɔti, saa awie yɛ ɛtane a, ɛnee yevo Nyamenle ngyinlazo ne mɔ mɔɔ di munli la.

 Kɛ Bɔvolɛ la, Nyamenle lɛ adenle fa ngyinlazo maa alesama. (Yekile 4:11) Yɛbabu yɛ nyɛleɛ nwo mgbonda yɛahile ye.​​—Wulomuma 14:12.

 Asoo ɔbahola yeara ye kɛ yɛnrɛyɛ ɛtane ɛlɛ?

 Kyɛkyɛ. Baebolo ne ka kɛ “bɛ muala bɛyɛ ɛtane na bɛndwu Nyamenle anyunlunyia ne anwo.” (Wulomuma 3:23; 1 Arelemgbunli 8:46; Nolobɔvo 7:20; 1 Dwɔn 1:8) Duzu ati ɔ?

 Mɔlebɛbo ne, ɛnee ɛtane biala ɛnle Adam nee Yive, alesama mɔɔ limoa la anwo. Ɛhye le zɔ, ɔluakɛ bɛbɔle bɛ kɛ Nyamenle ɛsaso mɔɔ ɛnee bɛdi munli. (Mɔlebɛbo 1:​27) Noko akee, kɛ mɔɔ bɛandie Nyamenle la ati, bɛanli munli bieko. (Mɔlebɛbo 3:​5, 6, 17-​19) Bɛvale ɛtane nee sinlidɔlɛ bɛwole bɛ mra. (Wulomuma 5:​12) Ɔle kɛ mɔɔ Yizilayɛ Belemgbunli Devidi hanle la, “bɛwole me amumuyɛ nu.”​​—Edwɛndolɛ 51:5.

 Asoo ɛtane ne bie le kpole tɛla bie?

 Ɛhɛe. Kɛ neazo la, Baebolo ne ka mrenyia mɔɔ ɛnee wɔ tete Sodɔm anwo edwɛkɛ kɛ ɛnee bɛle “amumuyɛ, bɛyɛle ɛtane mgbole” na ɛnee bɛ ɛtane ne “ɛzo somaa.” (Mɔlebɛbo 13:13; 18:20) Suzu ninyɛne nsa mɔɔ maa yɛnwu kɛzi ɛtane bie kpole anzɛɛ ɛlomboɛ de la anwo.

1.   Kɛzi anyebolo wɔ nu la. Baebolo ne bɔ yɛ kɔkɔ kɛ yɛhwe yɛ nwo yɛvi ɛtane mɔɔ anyebolo wɔ nu le kɛ adwɔmane ɛbɛla, awozonle ɛzonlenlɛ, awule, nzabolɛ, nzisi, sonla ɛhunlɛ nee sunsum ɛtane nyɛleɛ nwo. (1 Kɔlentema 6:9-11; Yekile 21:8) Baebolo ne maa yɛnwu kɛ ngakyile wɔ ɛtane ɛhye mɔ nee ɛtane mɔɔ yɛndwenle nwo na yɛayɛ yɛɛ ɛtane mɔɔ tɛ yɛ nye fuu a yɛyɛ la anu le kɛ yɛ edwɛkɛ nee yɛ nyɛleɛ mɔɔ gyegye awie mɔ la. (Mrɛlɛbulɛ 12:18; Ɛfɛsɛsema 4:31, 32) Noko akee, Baebolo ne maa yɛ anwosesebɛ kɛ yɛmmabu yɛ nye yɛgua ɛtane ngyikyi zo, ɔluakɛ bɛbahola bɛamaa yɛyɛ ɛtane mgbole.​​—Mateyu 5:​27, 28.

2.   Adwenle mɔɔ bɛfa bɛyɛ la. Bie mɔ yɛ ɛtane ɔluakɛ bɛnze mɔɔ Nyamenle kpondɛ avi bɛ ɛkɛ ne la. (Gyima ne 17:30; 1 Timote 1:13) Baebolo ne ɛnlie ɛtane ɛhye mɔ ɛndo nu, noko ɔmaa yɛnwu kɛ bɛle ngakyile bɛfi ɛtane mɔɔ awie yɛ ɔluakɛ ɔ nye fuu ɔbu ɔ nye ɔgua Nyamenle mɛla ne mɔ azo la anwo. (Ɛdianlɛ 15:30, 31) “Ahonle ɛtane” a maa awie anye fuu yɛ ɛtane a.​​—Gyɛlɛmaya 16:12; New World Translation.

3.   Fane dodo mɔɔ bɛfa bɛyɛ la. Baebolo ne eza maa yɛnwu ye kɛ ngakyile wɔ ɛtane mɔɔ bɛyɛ ye kokye nee ɛtane mɔɔ bɛkɔ zo bɛyɛ la anu. (1 Dwɔn 3:​4-8) Nyamenle babua menli mɔɔ ‘bɛ nye fuu bɛkɔ zo bɛyɛ ɛtane’ ɔnva nwo kɛ bɛzukoa kɛzi bɛyɛ mɔɔ tenrɛ la ndɛne.​​—Hibuluma 10:26, 27.

 Adwenleadwenle bahola adɔ bɛdabɛ mɔɔ bɛyɛ ɛtane kpole la anwo. Kɛ neazo la, Belemgbunli Devidi hɛlɛle kɛ: “Me amumuyɛ ɛbo me nwo zo, bɛ ɛnlomboɛ ɛyɛ adesoa ɛbo me nwo zo.” (Edwɛndolɛ 38:4) Noko, Baebolo ne maa yɛnyia anyelazo ɛhye: “Bɛmaa amumuyɛnli ne ɛgyakyi ɛtaneyɛlɛ, na mɔɔ ɛndwenle kpalɛ nwo la ɛgyakyi; bɛmaa ɔzia ɔrɛla [Gyihova] ɛkɛ, amaa [Gyihova] aze ye anwunvɔne, bɛmaa ɔzia ɔrɛla yɛ Nyamenle ne ɛkɛ, na Nyamenle bava ye ɛtane ahyɛ ye.”​​—Ayezaya 55:7.