Asoo Gyisɛse Wule Wɔ Meanubaka Zo?
Baebolo ne bua kɛ
Menli dɔɔnwo bu meanubaka ne kɛ ɔle Kilisiene ɛzonlenlɛ sɛkɛlɛneɛ titili. Noko akee, Baebolo ne ɛnga debie mɔɔ bɛhunle Gyisɛse wɔ zo la anwo edwɛkɛ dɔɔnwo, ɔti awie biala ɛnze kɛzi ɛnee ɔde la kpalɛ. Noko, daselɛ mɔɔ wɔ Baebolo ne anu la maa yɛnwu ye kɛ bɛhunle Gyisɛse wɔ mgbunla anzɛɛ baka ko mɔɔ bɛkpɔnla la azo na tɛ meanubaka zo ɔ.
Baebolo ne ɛlɛka debie mɔɔ bɛhunle Gyisɛse wɔ zo la anwo edwɛkɛ a, ɔfa Giliki edwɛkɛkpɔkɛ stau·rosʹ a ɔdi gyima a. (Mateyu 27:40; Dwɔn 19:17) Ɔwɔ nuhua kɛ Baebolo ngilebɛbo bie mɔ fa “meanubaka” a di gyima a noko mbɔlɔba dɔɔnwo die di kɛ edwɛkɛkpɔkɛ zɔhane ne abo kile “mgbunla” anzɛɛ baka ko mɔɔ bɛkpɔnla. * Kɛ mɔɔ A Critical Lexicon and Concordance to the English and Greek New Testament ne ka la, stau·rosʹ “ɛngile mbaka nwiɔ mɔɔ bɛva ko bɛbia ko anu wɔ ɛleka biala.”
Baebolo ne eza fa Giliki edwɛkɛkpɔkɛ xyʹlon di gyima wɔ mekɛ mɔɔ ɔlɛka stau·rosʹ anwo edwɛkɛ la. (Gyima ne 5:30; 1 Pita 2:24) Edwɛkɛkpɔkɛ ɛhye kile “baka,” “dubinli,” “mgbunla,” anzɛɛ “egyane.” * Ɔlua ɛhye ati The Companion Bible ne ka kɛ: “Debie biala ɛnle Giliki N[ew] T[estament] ne anu mɔɔ kile kɛ ɔle mbaka nwiɔ.”
Nyamenle die to nu kɛ yɛbalua meanubaka ne azo yɛazonle ye ɔ?
Crux simplex—Latɛn edwɛkɛ mɔɔ kile baka ko mɔɔ bɛkenda kodiawu wɔ zo la
Ɔnva nwo kɛzi debie mɔɔ bɛhunle Gyisɛse wɔ zo de biala la, Baebolo ngyehyɛnu ɛhye mɔ mɔɔ doɔdoa zo la kile kɛ ɔnle kɛ yɛdua meanubaka ne azo yɛsonle Nyamenle.
Nyamenle kyi nvoninli anzɛɛ sɛkɛlɛneɛ biala mɔɔ meanubaka boka nwo mɔɔ bɛdua zo bɛsonle ye la. Nyamenle hanle hilele Yizilayɛma kɛ “bɛmmayɛ debie” biala sɛkɛlɛneɛ bɛfa bɛsonle ye, eza bɛha bɛhile Kilisienema kɛ “bɛhwe bɛ nwo bɛvi awozonle ɛzonlenlɛ nwo.”—Mɛla ne 4:15-19; 1 Kɔlentema 10:14.
Alimoa Kilisienema anva meanubaka anli gyima. * Ɛzoanvolɛma ne ngilehilelɛ nee bɛ neazo a ɔwɔ kɛ Kilisienema kɔsɔɔti di zo a.—2 Tɛsalonaekama 2:15.
Meanubaka mɔɔ bɛdua zo bɛsonle la vi awozonle ɛzonlenlɛ nu. * Gyisɛse wule la ye ɛvolɛ dɔɔnwo anzi mɔɔ asɔne asɔne ne mɔ hwenle bɛ nwo vile ye ngilehilelɛ ne anwo la, bɛmaanle menli fofolɛ mɔɔ ɛnee bɛkɔ asɔne la “adenle kɛ bɛva bɛ awozonle ɛzonlenlɛ sɛkɛlɛneɛ ne mɔ” mɔɔ meanubaka boka nwo la bɛli gyima. (The Expanded Vine’s Expository Dictionary of New Testament Words) Noko, Baebolo ne ɛnlie ɛndo nu kɛ yɛbalua awozonle ɛzonlenlɛ sɛkɛlɛneɛ zo yɛaboa menli yɛamaa bɛayɛ Kilisienema.—2 Kɔlentema 6:17.
^ Nea New Bible Dictionary, Third Edition mɔɔ D. R. W. Wood yɛle ye fofolɛ la mukelɛ 245; Theological Dictionary of the New Testament, Volume VII, mukelɛ 572; The International Standard Bible Encyclopedia, Revised Edition, Volume 1, mukelɛ 825; nee The Imperial Bible-Dictionary, Volume II, mukelɛ 84.
^ Nea The Expanded Vine’s Expository Dictionary of New Testament Words, mukelɛ 1165; A Greek-English Lexicon, mɔɔ Liddell nee Scott hɛlɛle la, Ninth Edition ne, mukelɛ 1191-1192; nee Theological Dictionary of the New Testament, Volume V, mukelɛ 37.
^ Nea Encyclopædia Britannica, 2003 na kɔ “Cross” abo; The Cross—Its History and Symbolism, mukelɛ 40; nee The Companion Bible, Oxford University Press, mokanwo 162, mukelɛ 186.
^ Nea The Encyclopedia of Religion, Volume 4, mukelɛ 165; The Encyclopedia Americana, Volume 8, mukelɛ 246; nee Symbols Around Us, mukelɛ 205-207.
Bie A Eza Ɛ Nye Balie
KPUYA MƆƆ MENLI TA BIZA
Duzu Ati A Gyihova Alasevolɛ Ɛnva Meanubaka Ɛnli Gyima Wɔ Ɛzonlenlɛ Nu A?
Yɛle Keleseɛnema ɛdeɛ, noko yɛnva meanubaka ne yɛnli gyima wɔ yɛ ɛzonlenlɛ nu. Duzu ati ɔ?
BAEBOLO KPUYA MƆƆ BƐBUA
Asoo Ɔwɔ Kɛ Yɛsonle Ananze?
Saa yɛfa ananze anzɛɛ aboduaba yɛdi gyima wɔ yɛ ɛzonlenlɛ nu a, asoo ɔfale Nyamenle anwo?
