Kɛ Gyihova Alasevolɛ la, yɛ nye die kɛ yɛbaha yɛ diedi ne anwo edwɛkɛ yɛahile menli mɔɔ wɔ ɛzonlenlɛ biala anu la, noko yɛnlie diedi afonlafonla yɛndo nu. Baebolo ne ka kɛ ɔwɔ kɛ nɔhalɛ Kilisienema “toɔdoa nu pɛpɛɛpɛ” na debie ko mɔɔ ka yɛ bɔ la a le diedi. (Ɛfɛsɛsema 4:16; 1 Kɔlentema 1:10; Felepaema 2:2) Tɛ yemɔ a le kɛ yɛ nee menli bayɛ ko wɔ subane kpalɛ le kɛ ɛlɔlɛ, anwunvɔnezelɛ, nee ɛtanefakyɛ nwo. Yɛ ɛzonlenlɛ ne diedi ne gyi nɔhalɛ ndelebɛbo mɔɔ wɔ Baebolo ne anu la azo, tɛ ye zɔhane ne a yɛ diedi ne bayɛ mgbane.​​—Wulomuma 10:2, 3.

 Baebolo ne fa menli gyɛne mɔɔ asolo bɛ diedi mɔɔ yɛ nee bɛ bɔ nu azonle la toto gyɛnvayile ko mɔɔ yɛ nee bɛ twe la anwo, debie mɔɔ bahola azɛkye Kilisienenli bie diedi la. (2 Kɔlentema 6:14-17) Yemɔti, Gyisɛse ammaa ye ɛdoavolɛma ne anva bɛ nwo anwula diedi afonlafonla nu. (Mateyu 12:30; Dwɔn 14:6) Zɔhane ala a Nyamenle mɛla mɔɔ ɔvale ɔmaanle Mosisi la duale Yizilayɛma kɛ bɛ nee menli mɔɔ zuozua bɛ la mmabɔ nu sonle a. (Ɛzɛdɔso 34:11-14) Nzinlii, Yizilayɛma mɔɔ ɛnee di nɔhalɛ la kpole moalɛ mɔɔ anrɛɛ ɔbamaa bɛava menli mɔɔ asolo bɛ diedi agɔnwolɛ la.​​—Ɛzela 4:1-3.

 Ɛhɛe. Yɛle kɛ ɛzoanvolɛ Pɔɔlo la, yɛkulo kɛ yɛnwu “menli dɔɔnwo” mɔɔ yɛyia bɛ wɔ yɛ daselɛlilɛ gyima ne anu la adwenle na yɛte bɛ diedi ne abo. (1 Kɔlentema 9:19-22) Saa yɛ nee awie ɛlɛtendɛ a, yɛbɔ mɔdenle kɛ yɛbava Baebolo nu folɛdulɛ yɛali gyima amaa yɛala “ɛbulɛ kpole” ali yɛahile ye.​​—1 Pita 3:15.