Wɔ July 2009, Gyihova Alasevolɛ dɔle azɛlɛ wɔ New York amaa bɛaye ewiade amuala gyima ne ati bɛahɔ ɛkɛ. Ɔbɔ ye 1909 toonwo mɔɔ ba la bɛ gyima ne ati ne wɔ Brooklyn, New York. Ɔvi ɛkɛ ne mɔɔ kɔ azɛlɛ fofolɛ ne azo la bayɛ kilomita 80 (ma 50). Azɛlɛ fofolɛ ne mɔɔ ye kpole le hɛkta 102 (p. 253) la wɔ dɛba ne sɔlɔ.

Alasevolɛ kɛyɛ 800 badɛnla ɛkɛ ayɛ gyima, mɔɔ ɔfese azua, azua mɔɔ bɛyɛ ninyɛne boɛ wɔ nu nee azua mgbole nna mɔɔ bɛbala nu la boka nwo. Bɛyɛ ngyehyɛleɛ noko kɛ bɛbazi sua ekyi mɔɔ bɛbava Gyihova Alasevolɛ anwo tetedwɛkɛ bɛazie nu.

Bɛbava nuhua hɛkta 18 (p. 45) bɛazi sua ne na bɛagyakyi mɔɔ ɛha la. Bɛnrɛlua ndile dɔɔnwo wɔ azɛlɛ ne azo. Emomu, bɛbaziezie azɛlɛ ne bamaa ɔ nee ɛleka mɔɔ bɛanlɔ la ayɛ ko.

Menli mɔɔ ze suazilɛ nye zo la bayɛ sua ne wɔ adenle mɔɔ ɔnrɛmaa bɛnrɛzɛkye ninyɛne mɔɔ wɔ azɛlɛ ne azo la dɔɔnwo yɛɛ bɛnrɛbɔ sua ne anwo kakɛ dɔɔnwo. Kɛ neazo la, kɛzi bɛbadu sua ne azo la ɛnrɛmaa nuhua ɛnrɛyɛ wuluwulu anzɛɛ yɔlɔkɔkɔ somaa. Ewia ne bɛamaa ɔfese ne mɔ anu ayɛ wienyi mɔɔ bɛnrɛhyia kɛnlaneɛ dɔɔnwo wɔ nu a. Eza bɛbayɛ ɛleka mɔɔ bɛsie nzule la.

Duzu ati a bɛlɛtu a? Gyihova Alasevolɛ ɔfese mɔɔ wɔ maanle gyɛne zo la ɛlɛpelente Baebolo nee Baebolo nwo mbuluku, mɔɔ ɛnee Brooklyn ala a bɛyɛ ye la. Wɔ 2004 anu, bɛyele mbuluku mɔɔ bɛyɛ wɔ United States na bɛava bɛanwa la anwo gyimalilɛ ne bɛhɔle Wallkill, New York. Ɔwɔ Brooklyn sɔlɔ adɔleɛ mɔɔ bɛ avinli tendenle bayɛ kilomita 145 (ma 90) la.

Yɛzuzule kakɛ mɔɔ ɛnee yɛbɔ la noko anwo. Yɛbɔ azua mɔɔ wɔ Brooklyn la anwo kakɛ dɔɔnwo. Saa yɛtu yɛkɔtɛnla ɛleka ko a, Alasevolɛ ne mɔ bahola ava ezukoa ne aboa Baebolo ngilehilelɛ gyima ne.

Ɔwɔ kɛ bɛdabɛ mɔɔ bɛnea suazilɛ zo la maa adenle kolaa na yɛahola yɛazi. Saa ninyɛne kɔ zo boɛ a, yɛbabɔ gyima ne abo wɔ 2013 na yɛava ɛvolɛ nna yɛawie.

Saa ɛye Wallkill, New York, ɛleka mɔɔ bɛpelente mbuluku dɔɔnwo la ɛsie ahane a, Gyihova Alasevolɛ lɛ ngilehilelɛ ɛleka wɔ Patterson, New York. Ahyehyɛdeɛ ne lɛ ɔfese dɔɔnwo wɔ maanle dɔɔnwo anu. Alasevolɛ mɔɔ wɔ ewiade amuala la bo mgbe nsuu nee foa.