Mɔɔ Limoa Kɔmaa Kɔlentema 7:1-40
7 Na mɔɔ fale ninyɛne ne mɔ mɔɔ bɛhɛlɛle la anwo la, ɔle kpalɛ ɔmaa nrenyia kɛ ɔnrɛva ɔ nwo ɔnrɛha raalɛ;*
2 noko ɔluakɛ adwɔmane ɛbɛla* ɛbu zo la ati, nrenyia biala ɛnyia ɔ ti anwo ɔ ye+ na raalɛ biala ɛnyia ɔ ti anwo ɔ hu.+
3 Kunli ɛva mɔɔ fɛta ɔ ye la ɛmaa ye, na yelɛ noko ɛyɛ ye zɔhane ala ɛmaa ɔ hu.+
4 Yelɛ ɛnlɛ ɔdaye ye sonlabaka ne azo tumi, emomu ɔ hu ɔ; zɔhane ala noko a kunli ɛnlɛ ɔdaye ye sonlabaka ne azo tumi, emomu ɔ ye a.
5 Bɛmmabɔ bɛ nwo abokɛ kyesɛ bɛ mu nwiɔ bɛkponle zolɛ kɛ bɛbahendɛ ekyii, amaa bɛanyia mekɛ bɛayɛ asɔne na bɛayia nuhua bieko, amaa Seetan angɔ zo anzɔ bɛ annea ɔluakɛ bɛangola bɛ nwo zo komo la ati.
6 Noko mɔɔ melɛka la le nzuzulɛ ala, ɔnle mɛla.
7 Na me kunlu a anrɛɛ menli kɔsɔɔti le kɛ mɔɔ mede la. Noko Nyamenle ɛmaa awie biala ahyɛlɛdeɛ,+ ɛhye ati a bie mɔ gya na bie mɔ noko ɛngya la.
8 Akee meka meahile bɛdabɛ mɔɔ bɛtɛgyale la nee ahunlanvolɛ kɛ ɔle kpalɛ ɔmaa bɛ kɛ bɛkɛdɛnla ɛkɛ ne kɛ mɔɔ meyɛ ye la.+
9 Noko saa bɛngola bɛngomo bɛ nwo zo a, bɛgya, ɔluakɛ ɔle kpalɛ kɛ awie kɛgya tɛla kɛ ye atiakunluwɔzo kɛvo ɔ nwo zo la.+
10 Metu bɛdabɛ mɔɔ bɛgya la folɛ, ɔnvi me ɛkɛ, emomu ɔvi Awulae ɛkɛ ne kɛ, yelɛ nee ɔ hu mmatete nu.+
11 Noko saa ɔ nee ye tete nu a, ɔmmakɔ agyalɛ bieko, tɛ ye zɔhane a ɔ nee ɔ hu ɛhɔbɔ nu bieko; na ɔnle kɛ kunli fi ɔ ye anwo.+
12 Na bɛdabɛ mɔɔ bɛha la ɛdeɛ, meka meahile bɛ, medame ɔ, tɛ Awulae ɔ,+ kɛ: Saa adiema bie aye ɛnle diedinli na ɔkponle zo kɛ ɔ nee ye badɛnla a ɔmmagyakyi ye;
13 na saa raalɛ ɔ hu ɛnle diedinli na ɔkponle zo kɛ ɔ nee ye badɛnla a, ɔmmagyakyi ɔ hu ne.
14 Ɔluakɛ kunli mɔɔ ɔnle diedinli la anwo te wɔ ɔ ye anu, yɛɛ yelɛ mɔɔ ɔnle diedinli la anwo te wɔ adiema nrenyia ne anu; tɛ ye zɔhane a, bɛ mra nwo ɛnrɛde, noko kɛkala bɛyɛ nwuanzanwuanza.
15 Noko saa mɔɔ ɔnle diedinli la kulo kɛ ɔkɔ* a, maa ɔhɔ; mɛla biala ɛnkyekye adiema nrenyia anzɛɛ raalɛ ne wɔ tɛnlabelɛ zɛhae mɔ anu, emomu Nyamenle ɛvɛlɛ bɛ ɛra anzodwolɛ nu.+
16 Na yelɛ, saa wɔmɔ a ɛbalie ɛ hu ngoane a, asoo ɛze?+ Anzɛɛ kunli, saa wɔmɔ a ɛbalie ɛ ye ngoane a, asoo ɛze?
17 Noko, kɛ mɔɔ Gyihova* ɛmaa awie biala ɛnyia ye kyɛfoa la, zɔhane ala a awie biala ɛbɔ ye ɛbɛla kɛ mɔɔ Nyamenle vɛlɛle ye la a.+ Na adehilelɛ ɛhye a mefa memaa wɔ asafo ne mɔ amuala anu a.
18 Bɛvɛlɛle awie la ɛnee yepɛ ye mrenyiazo ɔ?+ Maa ɔva ye zɔhane ala. Bɛvɛlɛle awie la ɛnee ɔtɛpɛle ye mrenyiazo ɔ? Ɔmmamaa bɛpɛ ye mrenyiazo.+
19 Mrenyiazo ɛpɛlɛ ɛngile ɛhwee, yɛɛ mrenyiazo mɔɔ bɛampɛ la noko ɛngile ɛhwee;+ debie mɔɔ hyia la a le Nyamenle mɛla ne mɔ azo ɛlilɛ.+
20 Tɛnlabelɛ biala mɔɔ bɛvɛlɛle bɛ nuhua ko biala wɔ nu la, ɔdɛnla nu.+
21 Mɔɔ bɛvɛlɛle wɔ la, ɛnee ɛle akɛlɛ ɔ? Mmamaa ɔgyegye wɔ;+ noko saa ɛbahola wɔalie ɛ nwo a, ɛnee fa nwolɛ adenle ne die ɛ nwo.
22 Na awie biala mɔɔ bɛvɛlɛle ye wɔ Awulae anu wɔ mekɛ mɔɔ ɔle akɛlɛ la ɛnyia fanwodi wɔ Awulae anu;+ zɔhane ala yɛɛ awie biala mɔɔ lɛ fanwodi na bɛvɛlɛ ye la, le akɛlɛ maa Kelaese a.
23 Bɛdɔle bɛ bolɛ ɛsesebɛ;+ bɛmmayɛ ngɛkɛlɛ bɛmaa menli bieko.
24 Mediema, tɛnlabelɛ biala mɔɔ bɛvɛlɛle bɛ nuhua ko biala wɔ nu la, ɔdɛnla nu wɔ Nyamenle anyunlu.
25 Na mɔɔ fale bɛdabɛ mɔɔ bɛnze mrenyia* la anwo la, menlɛ mɛla biala mɔɔ vi Awulae ɛkɛ ne a, noko kɛ awie mɔɔ Awulae ɛze me anwunvɔne kɛ menli nɔhalɛ la, mekile me adwenle.+
26 Ɔti mesuzu kɛ anwongyelelɛ ne mɔɔ yɛwɔ nu la ati, ɔle kpalɛ ɔmaa sonla kɛ ɔkɛdɛnla ye kɛ mɔɔ ɔde ye ala la.
27 Ɛgya raalɛ ɔ? Mmagyakyi ye.+ Ɛngya raalɛ ɔ? Mmakpondɛ bie.
28 Na saa ɛgya noko a, ɛnee ɛtɛyɛle ɛtane. Na saa awie mɔɔ ɛnze nrenyia la kɔ agyalɛ a, sonla zɛhae ɛtɛyɛle ɛtane. Noko bɛdabɛ mɔɔ bɛbagya la anwo bahyele bɛ wɔ nwonane nu. Na melɛbɔ mɔdenle kɛ memaa yeakpa bɛ ti.
29 Bieko, mediema, mɔɔ melɛka la a le kɛ, mekɛ mɔɔ ɛha la le ekyi.+ Ɔvi ɛnɛ mɔɔ kɔ la, bɛdabɛ mɔɔ bɛgya mraalɛ la ɛyɛ bɛ nwo kɛ bɛngya bie,
30 na bɛdabɛ mɔɔ bɛsu la ɛyɛ bɛ nwo kɛ bɛnzu, na bɛdabɛ mɔɔ bɛdi fɛlɛko la ɛyɛ bɛ nwo kɛ bɛnli fɛlɛko, na bɛdabɛ mɔɔ bɛtɔ la ɛyɛ bɛ nwo kɛ bɛnlɛ bie,
31 na bɛdabɛ mɔɔ bɛnyia nvasoɛ bɛfi ewiade ɛhye anu la mmamaa ewiade di bɛ adwenle; ɔluakɛ ewiade ɛhye subane ɛlɛkakyi.
32 Nɔhalɛ nu, mengulo kɛ bɛkɛdwenledwenle. Nrenyia mɔɔ ɛtɛgyale la dwenledwenle Awulae ninyɛne nwo, kɛ ɔkɛyɛ na yeazɔ Awulae anye la.
33 Noko nrenyia mɔɔ ɛgya la dwenledwenle ewiade ninyɛne nwo,+ kɛ ɔkɛyɛ na yeazɔ ɔ ye anye la,
34 na ye nuhua ɛhyɛ. Bieko, raalɛ mɔɔ bɛtɛgyale ye yɛɛ raalɛ mɔɔ ɛnze nrenyia la dwenledwenle Awulae ninyɛne nwo,+ kɛ ɔbayɛ nwuanzanwuanza wɔ ye sonlabaka ne nee ye sunsum ne anu. Noko, raalɛ mɔɔ bɛgya ye la dwenledwenle ewiade ninyɛne nwo, kɛ ɔkɛyɛ na yeazɔ ɔ hu anye la.
35 Noko melɛka ɛhye wɔ bɛ boɛyɛlɛ ti, mensisi bɛ nwo zo, emomu, amaa bɛayɛ mɔɔ le kpalɛ la na bɛadu bɛ nwo bɛamaa Awulae bɔkɔɔ na debie biala andwehwe bɛ adwenle.
36 Noko saa awie suzu kɛ mɔɔ ɔlɛyɛ la ɛnle kpalɛ ɔluakɛ ɔtɛgyale la ati, na saa ɔnle kakula somaa a, ɛnee mɔɔ ɔwɔ kɛ ɔyɛ la ɛne: Maa ɔyɛ mɔɔ ɔkulo la; ɔtɛyɛle ɛtane. Maa bɛgya.+
37 Na saa awie ɛzi kpɔkɛ wɔ ye ahonle nu na ɔnlɛ ngyegyelɛ biala, na ɔlɛ tumi wɔ ɔdaye ye ɛhulolɛdeɛ zo na yezi kpɔkɛ ɛhye wɔ ye ahonle nu kɛ ɔnrɛgya a, yeyɛ ye boɛ.+
38 Na mɔɔ kɛgya la noko yɛ ye boɛ, noko mɔɔ ɛngya la yɛ ye boɛ tɛla ye.+
39 Saa raalɛ ɔ hu de aze a mɛla kyekye ye.+ Na saa ɔ hu wu* a, ɔlɛ adenle kɛ ɔgya awie biala mɔɔ ɔkulo la, noko kyesɛ Awulae anu ala.+
40 Noko me adwenle se me kɛ, saa ɔtɛnla ɛkɛ ne zɔhane ala a, ɔ nye balie kpalɛ; na medie medi kɛ medame noko melɛ Nyamenle sunsum.
Ɔbodwɛkɛ
^ Ɛhye kile, kɛ ɔ nee ye bala.
^ Giliki, por·nei′a. Nea Edwɛkɛbohilelɛ.
^ Anzɛɛ “ɔgyakyi ye.”
^ Anzɛɛ “bɛdabɛ mɔɔ bɛtɛgyale ɛlɛ.”
^ Giliki aneɛ nu, “da wɔ ewule nu.”
