Dwɔn Edwɛkpa 5:1-47
5 Ɛhye anzi Dwuuma ɛvoyia+ bie dwule zo, na Gyisɛse hɔle Gyɛlusalɛm.
2 Wɔ Gyɛlusalɛm Mboane Anlenkɛ Kpole ne+ anloa, nzubula bie mɔɔ bɛfɛlɛ ye Hibulu nu Bɛtezata la wɔ ɛkɛ, kpɔda* nnu wɔ nwolɛ.
3 Menli mɔɔ ɛnde kpɔkɛ, anyenzinliravolɛma, abuburama yɛɛ bɛdabɛ mɔɔ bɛ sa nee bɛ gyakɛ ɛdwe la dɔɔnwo da ɛkɛ.
4 * ——
5 Na ɛnee nrenyia bie wɔ ɛkɛ mɔɔ ɔ nwo ɛdo ye ɛvolɛ 38 a.
6 Mekɛ mɔɔ Gyisɛse nwunle kɛ nrenyia ɛhye la ɛkɛ na ɔze kɛ ɔ nwo ɛdo ye ɛhyɛ kpalɛ la, ɔbizale ye kɛ: “Ɛkpondɛ kɛ ɛte kpɔkɛ ɔ?”+
7 Nrenyia ne mɔɔ ɛnde kpɔkɛ la buale ye kɛ: “Yɛmenle, menlɛ awie mɔɔ saa nzule ne kpoto a ɔfa me ɔto nu a, saa melɛkɔ a ɛnee sonla fofolɛ ɛlimoa me nyunlu ɛhɔdɔ nu.”
8 Gyisɛse zele ye kɛ: “Dwazo! Fa wɔ ɛkpa ne na tia.”+
9 Ɛkɛ ne ala nrenyia ne dele kpɔkɛ na ɔvale ye ɛkpa ne na ɔbɔle ɔ bo kɛ ɔtia.
Ɛnee ɔle Ɛnwomenlelielɛ kenle.
10 Yemɔti Dwuuma ne zele nrenyia ne mɔɔ ɛde kpɔkɛ la kɛ: “Ɔle Ɛnwomenlelielɛ kenle, na mɛla ɛmmaa adenle kɛ ɛkɛzoa ɛkpa ne.”+
11 Noko ɔbuale bɛ kɛ: “Ahenle mɔɔ yɛle me ayile la a zele me kɛ, ‘Fa wɔ ɛkpa ne na tia’ a.”
12 Bɛbizale ye kɛ: “Ɛnee nwane a ɔdaye ɔzele wɔ kɛ, ‘Fa wɔ ɛkpa ne na tia a’?”
13 Noko ɛnee nrenyia ne mɔɔ ɛde kpɔkɛ la ɛnze ye sonla holɛ ɔluakɛ ɛnee Gyisɛse ɛwolo menli dɔɔnwo ne mɔɔ wɔ ɛkɛ la anu.
14 Ɛhye anzi Gyisɛse nwunle ye wɔ ɛzonlenlɛsua ne anu na ɔzele ye kɛ: “Nea, wɔde kpɔkɛ. Mmayɛ ɛtane bieko na debie mɔɔ tɛla ɛhye la anyɛ wɔ.”
15 Nrenyia ne hɔle na ɔhɔhanle ɔhilele Dwuuma ne kɛ Gyisɛse a maanle ɔdele kpɔkɛ a.
16 Ɔlua ɛhye ati Dwuuma ne bɔle ɔ bo kɛ bɛyɛ Gyisɛse kpɔdekpɔde ɔluakɛ ɔyɛle ninyɛne ɛhye mɔ wɔ Ɛnwomenlelielɛ kenle.
17 Na ɔbuale bɛ kɛ: “Me Ze ɛhɔ zo ɛyɛ gyima badwu ɛnɛ, na medame noko mekɔ zo meyɛ gyima.”+
18 Ɛhye ati Dwuuma ne bɔle mɔdenle ɛsesebɛ kɛ bɛku ye, ɔluakɛ tɛ kɛ ɔnli Ɛnwomenlelielɛ kenle ne azo ala, emomu, ɔfɛlɛ Nyamenle kɛ ɔdaye mumua ne ɔ Ze,+ na ɔyɛ ɔ nwo kɛ ɔ nee Nyamenle bɛsɛ.+
19 Yemɔti Gyisɛse buale bɛ kɛ: “Nɔhalɛ nu meka meahile bɛ, Ralɛ ne ɛngola ɛmbɔ ɔ ti anu ɛnyɛ debie kyesɛ mɔɔ ɔkɛnwu kɛ Selɛ ne ɛlɛyɛ la ala.+ Ɔluakɛ debie biala mɔɔ Selɛ ne yɛ la yɛɛ Ralɛ ne noko yɛ a.
20 Ɔluakɛ Selɛ ne kulo ralɛ ne+ yɛɛ ɔkile ye ninyɛne kɔsɔɔti mɔɔ ɔyɛ la, na ɔbahile ye ninyɛne mgbole yeadɛla ɛhye mɔ na yeayɛ bɛ azibɛnwo.+
21 Na kɛ mɔɔ Selɛ ne dwazo mowuamra na ɔmaa bɛ ngoane la,+ zɔhane ala a Ralɛ ne noko maa bɛdabɛ mɔɔ ɔkulo la ngoane a.+
22 Selɛ ne ɛmbua awie biala ndɛne, emomu yeva ndɛnebualɛ kɔsɔɔti yewula Ralɛ ne asa anu,+
23 amaa menli kɔsɔɔti ali Ralɛ ne eni kɛ mɔɔ bɛdi Selɛ ne eni la. Awie biala mɔɔ ɛnli Ralɛ ne eni la ɛnli Selɛ ne mɔɔ zoanle ye la noko eni.+
24 Nɔhalɛ nu meka meahile bɛ kɛ, awie biala mɔɔ tie me edwɛkɛ na ɔdie Mɔɔ zoanle me di la lɛ dahuu ngoane+ na bɛnrɛbua ye ndɛne, yɛɛ yevi ewule nu yera ngoane nu.+
25 “Nɔhalɛ nu meka meahile bɛ kɛ, mekɛ ne ɛlɛba yɛɛ yedwu bɔbɔ, mɔɔ mowuamra bade Nyamenle Ara ne ane, na bɛdabɛ mɔɔ bɛdiele ye la banyia ngoane.
26 Na kɛ mɔɔ Selɛ ne lɛ ngoane* wɔ ye nu la,+ zɔhane ala a yemaa Ralɛ ne noko ɛnyia ngoane wɔ ye nu a.+
27 Eza yemaa ye tumi kɛ ɔbua ndɛne+ ɔluakɛ ɔle sonla Ra.+
28 Bɛmmamaa ɛhye yɛ bɛ nwanwane, ɔluakɛ mekɛ ɛlɛba mɔɔ bɛdabɛ mɔɔ bɛwɔ ngakyelɛ nla ne mɔ anu la kɔsɔɔti bade ɔ ne+
29 na bɛavinde a, bɛdabɛ mɔɔ bɛyɛle ninyɛne mgbalɛ la, bɛbadwazo bɛ bɛara ngoane nu, na bɛdabɛ mɔɔ bɛyɛle ninyɛndane la, bɛbadwazo bɛ na bɛabua bɛ ndɛne.+
30 Membɔ me ti anu menyɛ debie. Mɔɔ mekɛde la yɛɛ megyinla zo mebua ndɛne a, yɛɛ me ndɛnebualɛ ne le fɔɔnwo+ ɔluakɛ menyɛ mɔɔ mekulo la, emomu meyɛ mɔɔ zoanle me la ɛhulolɛdeɛ.+
31 “Saa me ngome medi me nwo daselɛ a, me daselɛlilɛ ne ɛnle nɔhalɛ.+
32 Awie wɔ ɛkɛ mɔɔ di me nwo daselɛ a, na meze kɛ me nwo daselɛ ne mɔɔ ɔdi la le nɔhalɛ.+
33 Bɛzoa menli wɔ Dwɔn anwo ɛkɛ ne, na yeli nɔhalɛ ne anwo daselɛ.+
34 Noko mengyia sonla daselɛlilɛ nwo, emomu meka ɛhye amaa bɛanyia ngoane.
35 Ɛnee nrenyia zɔhane le kɛnlaneɛ mɔɔ ɛlɛsɔ na ɔlɛta a, na ɛnee bɛkulo kɛ bɛ nye die kpole wɔ ye wienyi ne anu mekɛ ekyi.+
36 Noko melɛ daselɛ kpole mɔɔ tɛla Dwɔn ɛdeɛ ne a, ɔluakɛ gyima mɔɔ Egya ɛva ɛmaa me kɛ menyɛ, mɔɔ le gyima ɛhye mɔɔ melɛyɛ la di daselɛ kɛ Selɛ ne a zoanle me a.+
37 Na Selɛ ne mɔɔ zoanle me la mumua ne ɛli me nwo daselɛ.+ Bɛtɛtele ɔ ne yɛɛ bɛtɛnwunle kɛzi ɔde la ɛlɛ,+
38 yɛɛ ye edwɛkɛ ne ɛnle bɛ ahonle nu ɔluakɛ bɛnlie ahenle mɔɔ ɔzoanle ye la bɔbɔ bɛnli.
39 “Bɛneɛnlea Ngɛlɛlera ne anu+ ɔluakɛ bɛdwenle kɛ ɔbamaa bɛanyia dahuu ngoane; na ninyɛne ɛhye mɔ* noko ala a di me nwo daselɛ a.+
40 Noko bɛngulo kɛ bɛba me nwo ɛkɛ+ na bɛanyia ngoane.
41 Tɛ menli anyunlunyia yɛɛ mekpondɛ a,
42 noko meze ye wienyi kɛ bɛnlɛ Nyamenle anwo ɛlɔlɛ wɔ bɛ ahonle nu.
43 Mera wɔ me Ze duma nu, noko bɛnlie me. Saa awie gyɛne ba wɔ ɔdaye mumua ne ye duma nu a, bɛbalie ye.
44 Kɛ ɔkɛyɛ na bɛalie bɛali wɔ mekɛ mɔɔ bɛlɛdie menli nyunlu anyunlunyia na bɛmkpondɛ anyunlunyia ne mɔɔ vi Nyamenle kokye ne ɛkɛ ne la ɛ?+
45 Bɛmmadwenle kɛ mebabɔ bɛ somolɛ meahile Egya; Mosisi+ mɔɔ bɛ nye la ɔ nwo zo la a babɔ bɛ somolɛ a.
46 Nɔhalɛ nu, saa bɛliele Mosisi bɛlile a, anrɛɛ bɛbalie me bɛali ɔluakɛ ɔhɛlɛle me nwo edwɛkɛ.+
47 Na saa bɛnlie mɔɔ ɔhɛlɛle la bɛnli a, ɛnee kɛ ɔkɛyɛ na bɛalie mɔɔ meka la bɛali ɛ?”
