Mrɛlɛbulɛ 1:1-33
1 Yizilayɛ Belemgbunli Sɔlɔmɔn, Devidi ara ne mrɛlɛbulɛ ɛne:+
2 Amaa bɛazukoa* nrɛlɛbɛ+ na bɛalie ɛdenrɛdenrɛlɛ bɛado nu;Amaa bɛade nrɛlɛbɛ edwɛkɛ bo;
3 Amaa bɛanyia ɛdenrɛdenrɛlɛ+ mɔɔ maa nwunu,Tenleneyɛlɛ,+ ndɛnebualɛ kpalɛ*+ yɛɛ fɔɔnwoyɛlɛ;*
4 Amaa mɔɔ ɛnlɛ anwubielɛ la anwu nrɛlɛbɛ;+Amaa kpavolɛ anyia ndelebɛbo* na ye adwenle nu abuke.+
5 Nrɛlɛbɛvolɛ tie na ɔnyia adehilelɛ dɔɔnwo;+Sonla mɔɔ lɛ ndelebɛbo la nyia adehilelɛ kpalɛ*+
6 Amaa bɛade ɛrɛlɛ nee agyiba,*Nrɛlɛbɛvolɛ edwɛkɛ nee bɛ agyebɛ* bo.+
7 Gyihova ɛzulolɛ le adwenle mɔlebɛbo.+
Ahoasea ala a kyi nrɛlɛbɛ nee ɛdenrɛdenrɛlɛ a.+
8 Me ra, die wɔ papa ɛdenrɛdenrɛlɛ to nu,+Yɛɛ mmakpo wɔ mame adehilelɛ.*+
9 Bɛle ndotolo abotile kɛnlɛma wɔ ɛ ti zo+Yɛɛ ndweabane kɛnlɛma wɔ ɛ kɔme nu.+
10 Me ra nrenyia, saa ɛtanevolɛma bɔ mɔdenle kɛ bɛbɛlɛbɛla wɔ a, mmadie ɛto nu.+
11 Saa bɛka kɛ: “Bɛla maa yɛhɔ.
Maa yɛhɔbu yɛzia yɛha mogya yɛgua.
Yɛbavea yɛahendɛ mɔɔ edwɛkɛ ɛnle ɔ nwo la.
12 Yɛbame bɛ anyewɔzo kɛ mɔɔ Nla* yɛ ye la,Yɛbame bɛ bɔkɔɔ kɛ bɛdabɛ mɔɔ bɛlɛkɔ ewule kuma nu la.
13 Maa yɛlie bɛ ninyɛne mɔɔ sonle bolɛ la kɔsɔɔti;Yɛbava ninyɛne mɔɔ yɛve la yɛayi yɛ azua ne mɔ tetɛkɛɛ.
14 Ɔwɔ kɛ ɛbaboka yɛ nwo,*Na yɛbahyɛ ninyɛne mɔɔ yɛbawua la amuala pɛpɛɛpɛ” a.*
15 Me ra nrenyia, mmatoa bɛ.
Ye egyakɛ fi bɛ adenle zo,+
16 Ɔluakɛ bɛ gyakɛ nriandi kɔyɛ ɛtane;Bɛka bɛ nwo bɛkɔka mogya bɛgua.+
17 Nɔhalɛ nu, saa aloma anye gyi ɛ nwo na ɛgua ye asawu a, ɛgua ye mgbane.
18 Ɛhye ati a menli ɛhye mɔ bu sia kɛ bɛka mogya bɛagua la;Bɛkɔfea kɛ bɛku awie mɔ.
19 Kɛ bɛdabɛ mɔɔ bɛkpondɛ nvasoɛ ɛtane la ndenle de la ɛne,Ɔbaye bɛdabɛ mɔɔ bɛnyia ye la ngoane* yeavi ɛkɛ.+
20 Nɔhalɛ nrɛlɛbɛ+ ɛlɛtea nu kpole wɔ awɔdenle ne azo.+
Ɔmaa ɔ ne zo wɔ gua ne mɔ azo.+
21 Ɔtea nu wɔ awɔdenle ne mɔ mɔɔ alagye ɛnle zolɛ la kodoka ne anu.*
Ɔka ye wɔ suakpole ne nlenkɛ mgbole ne mɔ anloa kɛ:+
22 “Bɛmɛ mɔɔ bɛnlɛ anwubielɛ la bɛkulo kɛ bɛdua ye kɛ menli mɔɔ ɛnlɛ anwubielɛ la bɛkɔdwu kenlenzu?
Bɛmɛ agolobɛnwoma, bɛ nye die agolobɛnwo nwo bɛahɔdwu kenlenzu?
Yɛɛ bɛmɛ ahoasea, bɛkyi nrɛlɛbɛ bɛahɔdwu kenlenzu?+
23 Bɛlie me ahwibɛnyunlu bɛdo nu.*+
Na mebawola me sunsum ne meamaa bɛ;Mebamaa bɛanwu me edwɛkɛ ne.+
24 Ɔluakɛ menvɛlɛle, noko bɛandie me,Mendendenle me sa, noko awie biala andɛne me zo,+
25 Bɛbule bɛ nye bɛguale me folɛdulɛ kɔsɔɔti azoNa bɛkpole me ahwibɛnyunlu,
26 Saa esiane to bɛ a, medame noko mebazele bɛ;Mebagolo bɛ nwo, saa mɔɔ bɛsulo ye la ba bɛ nwo zo a,+
27 Saa mɔɔ bɛsulo ye la ba bɛ nwo zo kɛ ahumu,Na esiane to bɛ kɛ ahumuakyima,Saa amaneɛnwunlɛ nee ngyegyelɛ ba bɛ nwo zo a.
28 Mekɛ zɔhane bɛbahɔ zo bɛazu bɛavɛlɛ me noko menrɛdɛne bɛ zo;Bɛbakpondɛ me ɛsesebɛ, noko bɛnrɛnwu me,+
29 Ɔluakɛ bɛhyile nrɛlɛbɛ,+Yɛɛ bɛkpale kɛ bɛnrɛzulo Gyihova.+
30 Bɛkpole me folɛdulɛ;Bɛambu me ahwibɛnyunlu ne mɔ amuala bie.
31 Ɔti bɛbanwu bɛ ndenle ne mɔ anwo amaneɛ,*+Na bɛdabɛ mumua ne bɛ folɛdulɛ* abɔ bɛ ti.
32 Ɔluakɛ bɛdabɛ mɔɔ bɛnlɛ anwubielɛ la atuadelɛ bahu bɛ,Yɛɛ ahoasea ati anu mɔɔ yɛ bɛ fɛ la bazɛkye bɛ.
33 Noko mɔɔ tie me la badɛnla anzodwolɛ nu,+Na ɔ nwo adɔ ye mɔɔ ɔnrɛzulo munzule biala a.”+
Ɔbodwɛkɛ
^ Hibulu aneɛ nu, “Amaa bɛanwu.”
^ Anzɛɛ “mɔɔ le pɛlepɛlelilɛ.”
^ Anzɛɛ “mɔɔ tenrɛ.”
^ Anzɛɛ “anwu debie.”
^ Anzɛɛ “adehilelɛ mɔɔ nrɛlɛbɛ wɔ nu.”
^ Anzɛɛ “ndonwo.”
^ Anzɛɛ “abɛladolɛ.”
^ Anzɛɛ “mɛla.”
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Anzɛɛ “yɛ muala yɛ ezukoa kodoku bayɛ ko.”
^ Anzɛɛ “Fa wɔ ɛdeɛ ne baboka yɛ ɛdeɛ ne anwo.”
^ Anzɛɛ “ɛkɛla.”
^ Hibulu aneɛ nu, “ati nehane.”
^ Anzɛɛ “Saa metwi bɛ nyunlu a anrɛɛ bɛyɛ nzenzaleɛ.”
^ Hibulu aneɛ nu, “bɛbali zolɛ ma.”
^ Anzɛɛ “adwenle ɛtane; adwenle ngyehyɛleɛ.”
