Nolobɔvo 9:1-18
9 Yemɔti menvale ɛhye mɔ amuala menziele me ahonle nu na menwunle kɛ, tenlenema nee nrɛlɛbɛvolɛma nee bɛ gyima wɔ nɔhalɛ Nyamenle ne asa anu.+ Menli ɛnze ɛlɔlɛ nee ɛkpɔlɛ mɔɔ hɔle zo kolaa na bɛawo bɛ la.
2 Bɛ muala bɛ awieleɛ le ko,+ tenlenenli nee amumuyɛnli,+ sonlakpalɛ nee awie mɔɔ anwo te, yɛɛ mɔɔ anwo ɛnde, menli mɔɔ bɔ afɔle yɛɛ menli mɔɔ ɛmbɔ afɔle. Sonlakpalɛ le kɛ ɛtanevolɛ ala la; sonla mɔɔ ka ndane la le kɛ sonla mɔɔ nea boɛ wɔ ndane ɛhanlɛ nwo la.
3 Ɛhye le nyane debie mɔɔ kɔ zo wɔ ewiade ye anu a: Kɛmɔ bɛ muala bɛ awieleɛ le ko la ati,+ ɛtane ngome ɛyi menli ahonle nu; yɛɛ ɛzɛlɛde wɔ bɛ ahonle nu wɔ mekɛ mɔɔ bɛde ngoane nu la, na akee bɛwu!*
4 Awie biala mɔɔ boka anyewɔzoamra anwo la lɛ anyelazo, ɔluakɛ twea anyewɔzo le kpalɛ tɛla awenade funli.+
5 Ɔluakɛ anyewɔzoamra ze kɛ bɛbawu+ noko mowuamra ɛnze ɛhwee,+ yɛɛ bɛnlɛ ahatualɛ bieko, ɔluakɛ menli arɛle ɛvi bɛ nwo edwɛkɛ biala.+
6 Eza bɛ ɛlɔlɛ, bɛ ɛkpɔlɛ nee bɛ nungule ɛhwenlɛ muala ɛminli dɛbadɛba, yɛɛ bɛnlɛ kyɛfoa bieko wɔ mɔɔ bɛyɛ ye wɔ ewiade ye anu la anu.+
7 Kɔ, fa anyelielɛ di wɔ aleɛ na fa ahonle nu fɛlɛkolilɛ no wɔ nwanye,+ ɔluakɛ nɔhalɛ Nyamenle ne anye ɛlie wɔ gyima nwo dɛbadɛba.+
8 Maa wɔ adɛladeɛ ɛyɛ fufule* dahuu, yɛɛ mmamaa nwole kpa ɛ ti zo ɛlɛ.+
9 Ɛ nee ɛ ye ne mɔɔ ɛkulo ye la ɛlie bɛ nye+ wɔ wɔ ngoane mekɛ ne mɔɔ se ndɛndɛ mɔɔ Nyamenle ɛva ɛmaa wɔ wɔ ewiade ye anu la anu; wɔ wɔ ngoane mekɛ mɔɔ se ndɛndɛ la amuala anu, ɔluakɛ yemɔ a le wɔ afoa nu ɛdeɛ wɔ wɔ ɛbɛlabɔlɛ nee wɔ gyima ɛsesebɛ mɔɔ ɛfɛ ɛyɛ wɔ azɛlɛ ye azo la anu a.+
10 Debie biala mɔɔ ɛ sa kɛha ye kɛ ɛyɛ la, fa wɔ anwosesebɛ kɔsɔɔti yɛ, ɔluakɛ gyima anzɛɛ ngyehyɛleɛ anzɛɛ adwenle anzɛɛ nrɛlɛbɛ ɛnle Nla* ne anu,+ ɛleka mɔɔ ɛlɛkɔ la.
11 Menwu debie bieko wɔ ewiade ye anu kɛ, tɛ menli mɔɔ anwo yɛ ndɛ la a dahuu di konim wɔ ɛnriandilɛ nu a, yɛɛ tɛ menli mɔɔ anwo yɛ se la a dahuu di konim wɔ konle nu a,+ yɛɛ tɛ nrɛlɛbɛvolɛma a dahuu nyia aleɛ a, yɛɛ tɛ menli mɔɔ lɛ adwenle la a dahuu nyia bɛ nwo a,+ yɛɛ tɛ menli mɔɔ bɛ adwenle nu ɛbuke la a dahuu ɔwie bɛ boɛ a,+ ɔluakɛ mekɛ nee edwɛkɛ mɔɔ bɛ nye ɛnla la* to bɛ muala.
12 Ɔluakɛ sonla ɛnze ye mekɛ.+ Kɛ mɔɔ avonle kye fɛlɛ na ɛhane kye aloma la, zɔhane ala a esiane* to menli arɛlevilɛ nu na ɔkye bɛ kɛ ɛhane a.
13 Eza menwunle ɛhye wɔ nrɛlɛbɛ nwo wɔ ewiade ye anu, na me nye liele nwolɛ:
14 Sua ekyi bie wɔ ɛkɛ mɔɔ nuhua menli anzo; na belemgbunli kpole bie ratetale ye na ɔliele bane kpole bie ɔbɛngale ye ɔyiale.
15 Ɛnee nrenyia ehyianli nrɛlɛbɛvolɛ bie wɔ sua ne azo na ɔvale ye nrɛlɛbɛ ɔliele sua ne. Noko awie biala angakye zɔhane nrenyia ehyianli ne.+
16 Na menganle kɛ: ‘Nrɛlɛbɛ le kpalɛ tɛla anwosesebɛ;+ noko bɛbu bɛ nye bɛgua ehyianli nrɛlɛbɛ zo yɛɛ bɛndie ye edwɛkɛ.’+
17 Ɔle kpalɛ kɛ ɛkɛdie nrɛlɛbɛvolɛ edwɛkɛ mɔɔ ɔka ye bɛtɛɛ la tɛla kɛ ɛkɛdie belemgbunli mɔɔ di ahoasea nwo zo tumi la ɛdeɛdeanlɛ.
18 Nrɛlɛbɛ le kpalɛ tɛla konle ninyɛne, noko ɛtanevolɛ ko kola sɛkye ninyɛne mgbalɛ dɔɔnwo.+
Ɔbodwɛkɛ
^ Hibulu aneɛ nu, “na yemɔ anzi—bɛkɔboka mowuamra anwo!”
^ Ɛhye kile, adɛladeɛ mɔɔ anye te mɔɔ kile fɛlɛkolilɛ, tɛ nyanelilɛ adɛladeɛ.
^ Anzɛɛ “Sheol,” ɛhye kile, alesama nla. Nea Edwɛkɛbohilelɛ.
^ Anzɛɛ “esiane.”
^ Anzɛɛ “munzule.”
